தொடர்ந்து 3 நாட்கள் விடுமுறை ஆயுத பூஜைக்கு 500 சிறப்பு பஸ்கள்: போக்குவரத்து துறை ஆலோசனை

சென்னை:
தொடர்ந்து 3 நாட்கள் விடுமுறை வருவதால், ஆயுதபூஜைக்கு
வெளியூர்களுக்குச் செல்ல சிறப்பு பேருந்துகள் இயக்க
போக்குவரத்து துறை  அதிகாரிகள் நடவடிக்கை எடுத்து
வருகின்றனர்.

தமிழகத்தில் கொரோனா பரவல் காரணமாக அரசு பஸ்களை
கடந்த 6 மாதமாக இயக்காமல் இருந்தது. பின்னர், தளர்வுகள்
அறிவிக்கப்பட்டதையடுத்து  மீண்டும் அரசு பஸ்கள் இயக்கப்பட்டு
வருகின்றன.

சென்னையில் 2500 பஸ்கள் இயக்கப்பட்டு வருகின்றன.
வெளியூர்களுக்குச் செல்லும் பயணிகளின்  வசதிக்காக
600 பஸ்கள் இயக்கப்படுகின்றன. அதாவது பாதிக்குப் பாதி
பஸ்கள்தான் இயக்கப்பட்டு வருகின்றன.

இந்நிலையில் வரும் 25ம் தேதி ஆயுதபூஜை கொண்டாடப்படுகிறது.
26ம் தேதி விஜயதசமி கொண்டாடப்படுகிறது. 24ம் தேதி
சனிக்கிழமையாக  வருகிறது. இதனால் தொடர்ந்து 3 நாட்கள்
விடுமுறை விடப்படுகிறது.

எனவே பலரும் 23ம் தேதி மாலையே சொந்த ஊர்களுக்கு செல்ல  
திட்டமிடுவார்கள். குறிப்பாக நீண்ட தூரம் செல்ல விரும்பும் பயணிகள்
அதிகமாக இருப்பார்கள்.

மேலும் ஆம்னி பஸ்கள் இயக்கம் குறித்து எவ்வித அறிவிப்பும்
இதுவரை செய்யப்படவில்லை. ரயில் போக்குவரத்தும் குறைவாகவே
உள்ளன. சிறப்பு  ரயில்கள் மட்டும்தான் இயக்கப்படுகிறது.
எனவே மக்கள் அதிக அளவில் அரசு பஸ்களில் செல்ல வாய்ப்புள்ளது.

அவர்களின் வசதிக்காக சிறப்பு  பேருந்துகளை இயக்க வேண்டும்
என்று அரசுக்கு பொதுமக்கள் கோரிக்கை விடுத்துள்ளனர். இதனால்,
நீண்ட தூர சிறப்பு பஸ்களை இயக்க அரசு  போக்குவரத்து கழக
அதிகாரிகள் ஆலோசித்து வருகின்றனர்.இதுதொடர்பாக அரசு
போக்குவரத்துக் கழக அதிகாரிகள் கூறியதாவது:ஊரடங்கு தளர்வுக்கு
பிறகு பேருந்துகள் இயங்க துவங்கியது.

முதலில் குறைவான பயணிகளே பயணித்தனர். தற்போது எண்ணிக்கை
அதிகரித்துள்ளது.

இந்நிலையில் வரும் 25ம் தேதி ஆயுதபூஜை கொண்டாடப்படுகிறது.
இதை முன்னிட்டு, பயணிகளின் வசதிக்காக கூடுதல் பேருந்துகளை
இயக்க  ஆலோசனை நடத்தி வருகிறோம். பயணிகளின் வருகையை
பொறுத்து அரசு போக்குவரத்துக் கழகங்கள் சார்பில் 500க்கும் மேற்பட்ட
சிறப்பு  பேருந்துகளை இயக்க வாய்ப்புள்ளது. அதிகாரப்பூர்வமாக
விரைவில் அறிவிக்கப்படும்.

பயணிகள் முன்பதிவு மையங்கள் அல்லது www.tnstc.in என்ற  
இணையதளத்தில் டிக்கெட் முன்பதிவு செய்து கொள்ளலாம்.
இவ்வாறு கூறினர்.

தினகரன்