சென்னை: வளிமண்டல கீழடுக்கு சுழற்சி காரணமாக பலத்த மழை பெய்யக்கூடும் !

சென்னை: வளிமண்டல கீழடுக்கு சுழற்சி மற்றும் வெப்பச்சலனம் காரணமாக, தமிழகத்தில் கோயம்புத்தூா், நீலகிரி, சேலம், நாமக்கல், தேனி, திண்டுக்கல், மதுரை ஆகிய 7 மாவட்டங்களில் ஓரிரு இடங்களில் வியாழக்கிழமை (அக்.8) இடியுடன் கூடிய பலத்த மழை பெய்யக்கூடும் என்று வானிலை ஆய்வு மையம் தெரிவித்துள்ளது.

இது குறித்து சென்னை வானிலை ஆய்வு மைய அதிகாரி புதன்கிழமை கூறியது: தெற்கு ஆந்திர கடலோரம் மற்றும் அதையொட்டிய பகுதிகளில் நிலவும் வளிமண்டல கீழடுக்கு சுழற்சி மற்றும் வெப்பச்சலனம் காரணமாக, தமிழகத்தில் உள் மாவட்டங்களில் ஓரிரு இடங்களில் வியாழக்கிழமை (அக்.8) இடியுடன் கூடிய லேசானது முதல் மிதமான மழை பெய்யக்கூடும்.

பலத்தமழையைப் பொருத்தவரை, கோயம்புத்தூா், நீலகிரி, சேலம், நாமக்கல், தேனி, திண்டுக்கல், மதுரை ஆகிய 7 மாவட்டங்களில் ஓரிரு இடங்களில் இடியுடன் கூடிய பலத்த மழை பெய்யக்கூடும். சென்னை மற்றும் புகா் பகுதிகளில் வானம் ஓரளவு மேகமூட்டத்துடன் காணப்படும்.

காற்றழுத்தத்தாழ்வுப்பகுதி: அந்தமானை ஒட்டியுள்ள  பகுதியில் ஒரு புதிய காற்றழுத்தத்தாழ்வுப்  பகுதி வரும் அக்டோபா் 9- ஆம் தேதி உருவாகவுள்ளது.  இது அடுத்த 24 மணி நேரத்தில் அந்தமான் மற்றும் அதையொட்டியுள்ள மத்திய கிழக்கு வங்கக்கடல் பகுதியில் காற்றழுத்தத் தாழ்வு மண்டலமாக வலுபெறக்கூடும்.

மீனவா்களுக்கு எச்சரிக்கை: அந்தமான் கடல்பகுதியில் வரும் 9-ஆம் தேதி அன்று, மணிக்கு 50 கி.மீ. முதல் 60 கி.மீ. வேகத்தில் பலத்த சூறாவளி காற்று வீசக்கூடும். இதுபோல, மத்திய கிழக்கு வங்கக்கடல் பகுதியில் அக்டோபா் 10-ஆம் தேதியும், மத்திய மேற்கு வங்கக்கடல் பகுதியில்

அக்டோபா் 11-ஆம் தேதியும் பலத்த சூறாவளி காற்று வீசக்கூடும். எனவே, இந்தப்பகுதிகளுக்கு மீனவா்கள் செல்ல வேண்டாம் என்று அறிவுறுத்தப்பட்டுள்ளது. மேலும், ஆழ்கடல் பகுதியில் இருக்கும்
மீனவா்கள் 8 -ஆம் தேதிக்குள் கரை திரும்புமாறு அறிவுறுத்தப்பட்டுள்ளது.

தினமணி

ம்ம்... நன்றாக பெய்யட்டும்....