ரோஹித் 80; மும்பைக்கு முதல் வெற்றி

-
அபுதாபி:
ஐபிஎல் கிரிக்கெட் தொடரின் 5-ஆவது லீக் ஆட்டத்தில் மும்பை இண்டியன்ஸ் அணி 49 ரன்கள் வித்தியாசத்தில் கொல்கத்தா நைட் ரைடர்ஸ் அணியை வீழ்த்தியது.

இந்த சீசனில் முதல் ஆட்டத்தில் சென்னை அணியிடம் தோற்றிருந்த மும்பை இண்டியன்ஸ், இந்த ஆட்டத்தில் கொல்கத்தாவை வீழ்த்தியதன் மூலம் முதல் வெற்றியைப் பதிவு செய்துள்ளது.

முன்னதாக முதலில் பேட் செய்த மும்பை இண்டியன்ஸ் 20 ஓவர்களில் 5 விக்கெட் இழப்புக்கு 195 ரன்கள் குவித்தது. பின்னர் ஆடிய கொல்கத்தா 20 ஓவர்களில் 9 விக்கெட் இழப்புக்கு 146 ரன்கள் மட்டுமே எடுத்து தோல்வி கண்டது.

அபுதாபியில் புதன்கிழமை நடைபெற்ற இந்த ஆட்டத்தில் டாஸ் வென்ற கொல்கத்தா கேப்டன் தினேஷ் கார்த்திக் பீல்டிங்கை தேர்வு செய்தார்.

இதையடுத்து பேட் செய்த மும்பை அணியில் குவின்டன் டி காக் 1 ரன்னில் வெளியேற, கேப்டன் ரோஹித் சர்மாவுடன் இணைந்தார் சூர்யகுமார் யாதவ்.
முதல் 2 ஓவர்களில் மும்பை அணி 8 ரன்கள் மட்டுமே எடுத்த நிலையில், சந்தீப் வாரியார் வீசிய 3-ஆவது ஓவரில் சூர்யகுமார் தொடர்ச்சியாக 3 பவுண்டரிகளை விரட்ட, மும்பையின் ஸ்கோர் உயர ஆரம்பித்தது.

அதைத் தொடர்ந்து பட் கம்மின்ஸ் வீசிய 5-ஆவது ஓவரில் ரோஹித் சர்மா இரு சிக்ஸர்களை விளாசினார். தொடர்ந்து வேகம் காட்டிய ரோஹித், ஆன்ட்ரே ரஸல் ஓவரில் ஒரு சிக்ஸர், ஒரு பவுண்டரியை விளாச, 7 ஓவர்களில் 72 ரன்களை எட்டியது மும்பை.

மறுமுனையில் சிறப்பாக ஆடிய சூர்யகுமார் யாதவ் அரை சதமடிப்பார் என எதிர்பார்க்கப்பட்ட நிலையில், 28 பந்துகளில் 1 சிக்ஸர், 6 பவுண்டரிகளுடன் 47 ரன்கள் சேர்த்து ரன் அவுட்டானார். சூர்யகுமார்-ரோஹித் ஜோடி 2-ஆவது விக்கெட்டுக்கு 90 ரன்கள் சேர்த்தது. இதையடுத்து செளரப் திவாரி களமிறங்க, மறுமுனையில் சிறப்பாக ஆடிய ரோஹித் 39 பந்துகளில் அரைசதம் கண்டார்.

தொடர்ந்து வேகம் காட்டிய ரோஹித், குல்தீப் வீசிய 14-ஆவது ஓவரில் இரு சிக்ஸர்களை விளாசினார். பட் கம்மின்ஸ் வீசிய அடுத்த ஓவரில் செளரப் திவாரி தன் பங்கிற்கு ஒரு சிக்ஸர், ஒரு பவுண்டரியை விளாசிய நிலையில், சுநீல் நரேன் பந்துவீச்சில் ஆட்டமிழந்தார். அவர் 13 பந்துகளில் 21 ரன்கள் எடுத்தார்.

இதையடுத்து வந்த ஹார்திக் பாண்டியா, கம்மின்ஸ் பந்துவீச்சில் ஒரு சிக்ஸர், ஒரு பவுண்டரியை விளாச, மறுமுனையில் சதமடிப்பார் என எதிர்பார்க்கப்பட்ட ரோஹித் சர்மா, ஷிவம் மவி பந்துவீச்சில் சிக்ஸர் அடிக்க முற்பட்டு கம்மின்ஸிடம் கேட்ச் ஆனார். அவர் 54 பந்துகளில் 6 சிக்ஸர், 3 பவுண்டரிகளுடன் 80 ரன்கள் குவித்தார்.

இதையடுத்து கிரண் போலார்ட் களமிறங்க, ஹார்திக் பாண்டியா 13 பந்துகளில் 18 ரன்கள் சேர்த்த நிலையில் ஹிட் விக்கெட் முறையில் ஆட்டமிழந்தார். இறுதியில் மும்பை அணி 20 ஓவர்களில் 5 விக்கெட் இழப்புக்கு 195 ரன்கள் குவித்தது.

கிரண் போலார்ட் 13, கிருணால் பாண்டியா 1 ரன்னுடன் ஆட்டமிழக்காமல் இருந்தனர்.

கொல்கத்தா தரப்பில் ஷிவம் மவி 4 ஓவர்களில் 32 ரன்களைக் கொடுத்து 2 விக்கெட்டுளையும், சுநீல் நரேன் 4 ஓவர்களில் 22 ரன்களைக் கொடுத்து ஒரு விக்கெட்டையும் வீழ்த்தினர்.

கொல்கத்தா தோல்வி: பின்னர் ஆடிய கொல்கத்தா அணியில் ஷுப்மான் கில் 7 ரன்களில் வெளியேற, சுநீல் நரேன் 10 ரன்களில் நடையைக் கட்டினார்.

இதையடுத்து இணைந்த கேப்டன் தினேஷ் கார்த்திக்-நிதிஷ் ராணா ஜோடி சிறிது நேரம் தாக்குப்பிடித்தது. கொல்கத்தா 71 ரன்களை எட்டியபோது, தினேஷ் கார்த்திக் 30 ரன்களில் (23 பந்துகள்) வெளியேற, நிதிஷ் ராணா 24 ரன்களில் ஆட்டமிழந்தார்.
இதையடுத்து ஆன்ட்ரே ரஷலும், இயோன் மோர்கனும் ஜோடி சேர்ந்தனர்.

இந்த ஜோடியை 16-ஆவது ஓவரை வீசிய ஜஸ்பிரித் பூம்ரா வீழ்த்தினார். ஆன்ட்ரே ரஷல் 11 ரன்களில் ஸ்டெம்பை பறிகொடுக்க, இயோன் மோர்கன் 16 ரன்கள் சேர்த்த நிலையில் ஸ்டெம்பிங் ஆனார். அப்போதே கொல்கத்தாவின் தோல்வியும் உறுதியானது. பின்னர் வந்தவர்களில் பட் கம்மின்ஸ் 12 பந்துகளில் 4 சிக்ஸர், ஒரு பவுண்டரியுடன் 33 ரன்கள் சேர்த்து வெளியேற, கொல்கத்தா 20 ஓவர்களில் 9 விக்கெட் இழப்புக்கு 146 ரன்கள் எடுத்து தோல்வி கண்டது.

மும்பை தரப்பில் டிரென்ட் போல்ட், ஜேம்ஸ் பட்டின்சன், ஜஸ்பிரித் பும்ரா, ராகுல் சாஹர் ஆகியோர் தலா 2 விக்கெட்டுகளை சாய்த்தனர். 80 ரன்கள் குவித்த மும்பை கேப்டன் ரோஹித் சர்மா ஆட்டநாயகனாகத் தேர்வு செய்யப்பட்டார்.

தினமணி

சுருக்கமான ஸ்கோர்


மும்பை 195/5

ரோஹித் சர்மா 80 (54)
சூர்யகுமார் யாதவ் 47 (28)
ஷிவம் மவி 2வி/32

கொல்கத்தா 146/9


பட் கம்மின்ஸ் 33 (12)
தினேஷ் கார்த்திக் 30 (23)
ஜேம்ஸ் பட்டின்சன் 2வி/25

சுருக்கமான ஸ்கோர்


மும்பை 195/5

ரோஹித் சர்மா 80 (54)
சூர்யகுமார் யாதவ் 47 (28)
ஷிவம் மவி 2வி/32

கொல்கத்தா 146/9


பட் கம்மின்ஸ் 33 (12)
தினேஷ் கார்த்திக் 30 (23)
ஜேம்ஸ் பட்டின்சன் 2வி/25

தோல்வி ஏன்?: கேகேஆர் கேப்டன் தினேஷ் கார்த்திக் பதில்
-

-
மும்பை இந்தியன்ஸ் அணிக்கு எதிராகத் தோல்வியடைந்தது குறித்து கொல்கத்தா நைட்ரைடர்ஸ் அணி கேப்டன் தினேஷ் கார்த்திக் பதில் அளித்துள்ளார்.

ஐபிஎல் போட்டியின் 5-ஆவது லீக் ஆட்டத்தில் மும்பை இந்தியன்ஸ் அணி 49 ரன்கள் வித்தியாசத்தில் கொல்கத்தா நைட் ரைடர்ஸ் அணியை வீழ்த்தியது. முதல் ஆட்டத்தில் சென்னை அணியிடம் தோற்றிருந்த மும்பை இந்தியன்ஸ், இந்த ஆட்டத்தில் கொல்கத்தாவை வீழ்த்தியதன் மூலம் முதல் வெற்றியைப் பதிவு செய்துள்ளது.

முன்னதாக முதலில் பேட் செய்த மும்பை இந்தியன்ஸ் 20 ஓவர்களில் 5 விக்கெட் இழப்புக்கு 195 ரன்கள் குவித்தது. பின்னர் ஆடிய கொல்கத்தா 20 ஓவர்களில் 9 விக்கெட் இழப்புக்கு 146 ரன்கள் மட்டுமே எடுத்து தோல்வி கண்டது.

கொல்கத்தா அணியின் ஆட்டத்தை அனைவரும் எதிர்பார்த்த நிலையில் பேட்டிங்கில் மிகவும் சுமாராகவே விளையாடியது. இதுபற்றி கேகேஆர் கேப்டன் தினேஷ் கார்த்திக் கூறியதாவது:

பேட்டிங், பந்துவீச்சில் இன்னும் நாங்கள் நன்றாக விளையாட வேண்டியிருக்கிறது. முதல் ஆட்டத்தில் சுமாராகவே ஆடியிருக்கிறோம். தோல்வியை மிகவும் ஆராய விரும்பவில்லை. எங்குத் தவறு செய்தோம் என வீரர்களுக்குப் புரிந்துள்ளது.

பேட் கம்மின்ஸ், மார்கன் ஆகிய இருவரும் இன்றுதான் தனிமைப்படுத்துதலை முடித்துள்ளார்கள். இந்த வெயிலில் இந்தச் சூழலில் விளையாடுவது கடினமானது. எங்கள் வீரர்கள் நன்கு முயற்சி செய்தார்கள். பேட்டிங் வரிசையை மாற்றுவது குறித்து பயிற்சியாளர் மெக்கல்லமுடன் விவாதிக்கவில்லை என்றார்.

தினமணி