கெட்டியாகத்தான் ரசம் இருக்கணும் என்பதில்லை!

-


'ரசம் டைஜஸ்ட்' என்ற பெயரில், 1,000 வகையான ரசம்
செய்வது எப்படி என புத்தகம் எழுதியுள்ள, சென்னை
வழக்கறிஞர் உஷா பிரபாகரன்:

என் மாமியார், ஊறுகாய் ஸ்பெஷலிஸ்ட். எந்த காய், செடி, இலை,
பழத்திலும் ஊறுகாய் செய்து விடுவார். அவ்வளவு ருசியாக
இருக்கும். அவரைப் பார்த்து நானும், ஊறுகாய் செய்யத்
துவங்கினேன். நான் அவரை விட ரொம்ப ருசியாக செய்வதாக
சொல்வர்.

நான் செய்யும் ஊறுகாய், அடுத்த சில நாட்களில் காலியாகி
விடும். அந்த அளவுக்கு, என் குடும்பத்தினருக்கு பிடிக்கும்.
அதனால் ஏற்பட்ட உத்வேகத்தில், 'பிக்கிள் டைஜஸ்ட்' என்ற
பெயரில், 1,000 ஊறுகாய் செய்யும் பக்குவத்தை, 1999ம் ஆண்டு
வெளியிட்டேன். பயங்கர வரவேற்பு பெற்றது அந்த புத்தகம்.

அதில் நான் சொன்ன பக்குவத்தில் ஊறுகாய் போட்டவர்கள்,
இப்போதும் என்னை பாராட்டுகின்றனர்.அந்த மகிழ்ச்சியில்,
1,000 ரசம் செய்வதற்கான பக்குவத்தை, புத்தகமாக போட்டுள்ளேன்.

தமிழகத்தில், சங்க காலத்திலேயே ரசம் முக்கிய உணவாக
இருந்துள்ளது. அப்போது இதை, சாறு என சொல்லியுள்ளனர்.
சமஸ்கிருதத்தில், 'ரஸ்' என்றால், ஆங்கிலத்தில், 'எசென்ஸ்' என்று
அர்த்தம். அதிலிருந்து தான், ரசம் என்ற வார்த்தை வந்திருக்க
வேண்டும்.

ஆனால், ரசத்திற்கு இன்று மரியாதை இல்லை. காரணம், ரசம்
சரியாக யாருக்கும் வைக்கத் தெரியவில்லை. ரசம் வைக்க
பொறுமையும், பக்குவமும் வேண்டும். ரசம் சரியாக வைக்கத்
தெரிந்து விட்டால், எல்லா பிற உணவு பதார்த்தங்களும் எளிதாக
வந்து விடும்.

இந்த ரசம் புத்தகம் எழுத, எனக்கு பத்தாண்டுகள் ஆனது.
1,500 ரச வகைகளை தயாரித்து பார்த்து, அதிலிருந்து,
1,000 ரசத்தை இந்த புத்தகத்தில் தெரிவித்துள்ளேன்.

பொதுவாக, வீடுகளில் உள்ள பெண்களிடம் கேட்டால், நான்கைந்து
ரசம் பெயர்களைத் தான் கூறுவர். ஆனால், 1,000த்திற்கும் மேற்பட்ட
ரசத்தை வைக்க முடியும். பிற உணவு வகைகளை விட, ரசத்தில்
சேர்க்கப்படும் அனைத்தும், மருத்துவ குணம் வாய்ந்தவை.

ரசம் செய்வதில் சில, 'டெக்னிக்' உள்ளது. கொதிக்க விடக் கூடாது.
ஈய பாத்திரத்தில் தான், ரசம் வைக்க வேண்டும். அதுபோல,
ரசத்துக்கு, பழைய புளி தான் சிறந்தது. புளி உடம்புக்கு ஆகாது
என்ற எண்ணமும் சிலருக்கு இருக்கிறது.

அது, தவறு. புளியில் உள்ள சத்து, கொலஸ்ட்ராலை
கட்டுப்படுத்துகிறது. அதுபோல, ரசம் என்றால், தண்ணீராகத் தான்
இருக்க வேண்டும் என்பது கட்டாயம் இல்லை. கெட்டியாகவும் ரசம்
வைக்கலாம். தாமரைத் தண்டு ரசம், வெற்றிலை ரசம், இளநீர் ரசம்
செய்து கொடுத்தால், ரசம் பிடிக்காதவர்கள் கூட, விரும்பி சாப்பிட
துவங்கி விடுவர்!
-
--------------------------தினமலர் (சொல்கிறார்கள்)