ராணுவத்துடனான சண்டையில் பிரபாகரன் மகன் காயம்

கொழும்பு (ஏஜென்சி), 1 ஏப்ரல் 2009 ( 16:33 IST )

புதுக்குடியிருப்பு புறநகர் பகுதியில் இலங்கை ராணுவத்துடன் நடந்த சண்டையில் விடுதலைப் புலிகள் இயக்கத் தலைவர் பிரபாகரனின் மகன் சார்லஸ் அந்தோணி காயமடைந்ததாக தகவல் வெளியாகி உள்ளது.

விடுதலைப்புலிகளின் தலைவர் பிரபாகரனுக்கு 24 வயதில் சார்லஸ் அந்தோணி,பதின் வயதில் பாலச்சந்திரன் என்ற இரண்டு மகன்களும், 20 வயதை தொடும் துவாரகா என்ற மகளும் உள்ளனர். இதில் மூத்த மகன் சார்லஸ் அந்தோணி வெளிநாடு சென்று ஏரோநாட்டிக்கல் என்ஜினியரிங் படிப்பு படித்தவர்.

விடுதலைப் புலிகளின் விமானப்படையை உருவாக்குவதில் முக்கிய பங்கு வகித்த சார்லஸ்,விமானப் படை தளபதியாகவும் உள்ளார்.சமீப காலமாக புலிகள் நடத்திய விமான தாக்குதலுக்கு அவர்தான் மூளையாக இருந்து செயல்பட்டதாகவும் கூறப்பட்டது.

இந்நிலையில் புதுக்குடியிருப்பு போர் களத்தில் சிங்கள ராணுவத்தை எதிர்த்து விடுதலைப்புலிகளின் மூத்த தளபதிகளான பானு மற்றும் லட்சுமணன் ஆகியோருடன் சேர்ந்து சார்லஸ்தான் போர் வியூகங்களை அமைத்து போரை நடத்தி வருவதாக தகவல்கள் வெளியானது.

இத்தகவலை தங்களிடம் பிடிபட்ட விடுதலைப் புலிகளின் தற்கொலைப்படையைச் சேர்ந்த ஒருவர் தெரிவித்ததாக இலங்கை ராணுவ அதிகாரி ஒருவரே முன்னர் கூறியிருந்தார்.

இந்நிலையில், கடந்த மார்ச் மாதம் 8 ம் தேதி புதுக்குடியிருப்பு புறநகர் பகுதியில் சிங்கள ராணுவத்தின் அதிரடி படைக்கும், சார்லஸ் அந்தோணி தலைமையிலான விடுதலைப்புலிகளின் படைக்கும் கடும் சண்டை நடந்ததாகவும்,இந்த சண்டையின் போது பீரங்கி தாக்குதலில் சார்லசுக்கு பலத்த காயம் ஏற்பட்டதாகவும் தற்போது தகவல் வெளியாகி உள்ளது.

தற்போது அவர் சண்டை நடக்காத பொதுவான பகுதிக்கு கொண்டு செல்லப்பட்டு இருப்பதாகவும், பிரபாகரனின் பிரத்யேக டாக்டர் அவருக்கு சிகிச்சை அளித்து வருவதாகவும் கொழும்பிலிருந்து வெளியாகும் ' த பாட்டம் லைன் ' என்ற பத்திரிகையில் செய்தி வெளியாகி உள்ளது.

கனடாவில் வசிக்கும் விடுதலைப்புலி தலைவர்களில் ஒருவரான ராமச்சந்திரன் என்பவர் பிரபாகரன் மனைவி மதிவதனியின் உறவினர் என்றும், இவர்தான் வெளிநாடுகளில் புலிகளுக்காக நிதி திரட்டி வருவதாகவும் கூறப்படுகிறது.இந்நிலையில், ராமச்சந்திரனுக்கு அனுப்பப்பட்ட ஒரு இ.மெயில் மூலம் சார்லஸ் காயம் அடைந்த தகவல் தெரிய வந்துள்ளதாக அந்த பத்திரிகையில் மேலும் செய்தி வெளியிடப்பட்டுள்ளது.

இதனிடையே சார்லஸ் அந்தோணி காயமடைந்த தகவலை இலங்கை பாதுகாப்பு அமைச்சக அதிகாரி ஒருவரும் உறுதிபடுத்தியுள்ளார்.ஆனால் இது குறித்து புலிகள் தரப்பில் இதுவரை எதுவும் தெரிவிக்கப்படவில்லை.


(மூலம் - வெப்துனியா )