ராம.அரங்கண்ணன் எழுதிய, ‘நினைவுகள்’ நுாலிலிருந்து

ராம.அரங்கண்ணன் எழுதிய, ‘நினைவுகள்’ நுாலிலிருந்து:

முதன் முதலாக, அண்ணாதுரை எழுதிய, சந்திரோதயம்
நாடகம், நிதி வசூலுக்காக நடத்தப்பட்டது. ஈ.வெ.ரா.,
தலைமை வகிக்க, என்.எஸ்.கிருஷ்ணன்,
தண்டபாணி தேசிகர், தியாகராஜ பாகவதர் ஆகியோர்,
சிறப்பு விருந்தினர்களாக கலந்து கொண்டனர்.

மூவரையும் பார்த்த, ஈ.வெ.ரா., தன் தலைமை உரையில்:

நாட்டில் எத்தனையோ நாடகங்களும், சினிமாக்களும்
நடைபெறுகின்றன. அவையெல்லாம் மக்களை மடமையில்
ஆழ்த்துகின்றனவே தவிர, அறிவு விளக்கம் பெறுவதாக
காணோம். அ

வ்வித நடிகர்களுக்கு, 20, 30, 50 ஆயிரம் என்று, ஒரு படத்துக்கு
கொட்டி கொடுக்கப்படுகிறது.

(என்.எஸ்.கே., அப்போது, ஒரு படத்துக்கு, 50 ஆயிரமும்,
பாகவதர், ஒரு லட்சமும் சம்பளமாக வாங்கி வந்தனர்.)

இதனால், யாருக்கு லாபம்… சினிமாவிலும், நாடகத்திலும்,
சில மணி நேரம் அர்த்தங்கெட்ட கூத்து அடிப்பதற்காக,
பல ஆயிரம் ரூபாய் கொட்டி கொடுக்கப்படுகிறது.

அது போலவே, கச்சேரிகளும் நடைபெறுகின்றன.
அங்கேயாகிலும், அறிவு வளர்ச்சிக்கு ஏற்றார் போல்,
பாடல்கள் உண்டா எனில் அறவே கிடையாது. ராமா,
கிருஷ்ணா, முருகா, சிவ சிவா என்று பாடுகிறவர்களுக்கு,
ஒரு கச்சேரிக்கு, 3,000 – 4,000 என்று கொட்டி அழுகின்றனர்.

இவர்களுக்கெல்லாம் தேசிகர், பாகவதர் என்கிற
பட்டங்களும் குறைவில்லை.

கச்சேரி, சினிமாகாரர்களுக்கு, ஆயிரக்கணக்கில் கொடுத்து
ஏமாறுவதும், அதை பெறுகிறவர்கள் மைனர்களை போல்
வாழ்க்கை நடத்துவதும் ஒழிய வேண்டும்.

இவ்வாறு, ஈ.வெ.ரா., பேசியதும், தேசிகரும், பாகவதரும்
திடுக்கிட்டனர். நாடகத்திற்கு, 1,100 ரூபாய் வசூலாகி இருந்தது.
தேசிகரும், பாகவதரும், தங்கள் கையிலிருந்து,
900 ரூபாய் போட்டு, 2,000 ரூபாயாக, ஈ.வெ.ரா.,விடம் கொடுத்துச்
சென்றனர்-
-----------------------------
நடுத்தெரு நாராயணன்
திண்ணை -வாரமலர்