அதிவேக ஏவுகணை இன்ஜின் பரிசோதனை

-

புதுடில்லி :
ஒலியின் வேகத்தை விட ஐந்து மடங்கு அதிக வேகத்தில் செல்லக்
கூடிய 'ஹைப்பர்சானிக்' தொழில்நுட்பத்தில் ஏவுகணைகள்
தயாரிப்பதற்கான முன்னோட்டமாக இந்திய விஞ்ஞானிகள்
மேற்கொண்ட முதல் ராக்கெட் இன்ஜின் பரிசோதனை
வெற்றிகரமாக அமைந்தது.

இந்த தொழில்நுட்பத்தை பயன்படுத்தும் நான்காவது நாடாக
இந்தியா விளங்குகிறது. இந்த ராக்கெட் இன்ஜின் சோதனையின்
மூலம் நம் ராணுவ ஆயுதங்களின் திறன் அதிகரிக்கும் என்ற
நம்பிக்கை ஏற்பட்டுள்ளது.

ஒரு பொருள் ஒலியின் வேகத்தைவிட ஐந்து மடங்கு அதிக
வேகத்தில் இயங்கக் கூடிய திறன் ஹைப்பர்சானிக் என்று
அழைக்கப்படும். தற்போதைக்கு அமெரிக்கா, சீனா, ரஷ்யா
ஆகியவை மட்டுமே இந்த உயர் தொழில் நுட்பத்தைக் கொண்ட
ஏவுகணைகளை வெற்றிகரமாக பரிசோதனை செய்துள்ளன.

இந்த தொழில் நுட்பத்தின் மூலம் போக்குவரத்துக்கான
ரயில்களை இயக்க முடியும்; அதிநவீன ஏவுகணைகளை இயக்க
முடியும்.'கொரோனா' மற்றும் சீன ஆக்கிரமிப்பு கற்றுத் தந்த
பாடமாக நம் நாட்டை 'ஆத்ம நிர்பார்' எனப்படும் தற்சார்பு
உடைய நாடாக மாற பிரதமர் மோடி வலியுறுத்தி வருகிறார்.

இதையடுத்து ராணுவ ஆயுத தயாரிப்பிலும் 'மேக் இன் இந்தியா'
எனப்படும் உள்நாட்டிலேயே உற்பத்தி செய்வதற்கும் நம் நாட்டில்
முன்னுரிமை அளிக்கப்படுகிறது.

இந்நிலையில் டி.ஆர்.டி.ஓ. எனப்படும் ராணுவ ஆராய்ச்சி மற்றும்
மேம்பாட்டு அமைப்பு உள்நாட்டிலேயே எச்.எஸ். டி.டி.வி. எனப்படும்
ஹைப்பர்சானிக் தொழில்நுட்பத்தில் ஏவுகணைகளை விண்ணுக்கு
அனுப்பும் 'ஸ்கிராம்ஜெட்' ராக்கெட் இன்ஜினைத் தயாரித்துள்ளது.


இதன் முதல் பரிசோதனை ஒடிசா மாநிலத்தின் பாலாசோர்
பகுதியில் அப்துல் கலாம் ஏவுதளத்தில் நேற்று காலை 11:03 மணிக்கு
நடந்தது. திட்டமிட்டபடி இந்த பரிசோதனை வெற்றிகரமாக
அமைந்ததாக டி.ஆர்.டி.ஓ. தெரிவித்துள்ளது.

ஒலியை விட ஐந்து மடங்கு அதாவது மணிக்கு 7400 கி.மீ. வேகத்தில்
செல்லக் கூடிய திறன் வாய்ந்தது இந்த 'ஸ்கிராம்ஜெட்' இன்ஜின்
பொருத்தப்பட்ட ராக்கெட். ஆனால் தற்போது செய்யப்பட்ட
பரிசோதனையில் இந்த ராக்கெட் ஆறு மடங்கு வேகத்தில் சென்றது.

இதையடுத்து இந்தத் தொழில்நுட்பத்தை இதுவரை பரிசோதித்துள்ள
நான்காவது நாடாக இந்தியா விளங்குகிறது. அடுத்த ஐந்து
ஆண்டுகளுக்குள் ஹைப்பர்சானிக் ஏவுகணைகள் ராக்கெட்களை நம்
நாட்டிலேயே தயாரிப்பதற்கான முன்னோட்டமாக இந்த பரிசோதனை
விளங்குகிறது.

சீனாவிடம் மணிக்கு 5000 கி.மீ. வேகத்தில் இயங்கக் கூடிய
ஏவுகணை உள்ளது. அமெரிக்காவிடம் மணிக்கு 20,000 கி.மீ.
வேகத்தில் இயங்கக் கூடிய ஏவுகணை உள்ளது.

நாம் நடத்திய இந்த பரிசோதனைக்கு பா.ஜ. மூத்த தலைவரும்
ராணுவ அமைச்சருமான ராஜ்நாத் சிங் பாராட்டு தெரிவித்துள்ளார்.
இது குறித்து அவர் கூறியுள்ளதாவது:

இந்த திட்டத்தில் ஈடுபட்டுள்ள விஞ்ஞானிகள் உள்ளிட்டோரிடம்
பேசினேன். வரலாற்று சிறப்புமிக்க சாதனையை படைத்துள்ள
அவர்களை பாராட்டினேன்.

பிரதமர் நரேந்திர மோடியின் தற்சார்பு கோஷத்துக்கு
வலுசேர்ப்பதாக இந்த பரிசோதனை வெற்றி அமைந்துள்ளது.
இவ்வாறு அவர் கூறினார்.

தினமலர்