கமலா ஹாரிசை விமர்சித்த வியாபாரி; வர்த்தக உரிமையை நீக்கியது அமேசான்

-
அமெரிக்காவில் வரும் நவ., 3ம் தேதி அதிபர் தேர்தல்
நடக்க உள்ளது. ஜனநாயகக் கட்சி சார்பாக அதிபர்
வேட்பாளராக ஜோ பிடேனும் குடியரசுக் கட்சி சார்பாக
அமெரிக்க அதிபர் டிரம்ப்பும் போட்டியிடவுள்ளனர்.

ஜமைக்கா மற்றும் இந்தியப் பூர்விகம் கொண்ட கமலா ஹாரிஸ்
ஜனநாயக கட்சியால் துணை அதிபராக போட்டியிட உள்ளார்.

அமெரிக்க வரலாற்றில் கருப்பினத்தைச் சேர்ந்தவரும் ஆசிய
இனத்தை பூர்வீகமாகக் கொண்டவருமான ஒரு பெண்,
துணை அதிபர் பதவிக்குப் போட்டியிடுவது இதுவே முதல்முறை.
இதற்கு உலகம் முழுவதும் ஆதரவு குவிந்தது.


சமீபத்தில் நடந்த ஜார்ஜ் புளாயிட் படுகொலையை அடுத்து
அமெரிக்காவில் கருப்பின மக்கள் வெகுண்டெழுந்தனர். இவர்களின்
வாக்குகளைக் கவரவே கமலா ஹாரிஸ் ஜனநாயகக் கட்சியால்
இப்பதவிக்கு முன்நிறுத்தப்பட்டு உள்ளார் என குடியரசு கட்சி
விமர்சனம் செய்தது.

மேலும், கமலா ஹாரிசை அமெரிக்க அதிபர் டிரம்ப் தொடர்ந்து
விமர்சித்து வருகிறார்.

இந்நிலையில் அமெரிக்காவில் வெள்ளை இனப்பற்று கொண்ட
சில குடிமக்கள் கமலாவுக்கு எதிரான மீம்கள் பகிர்ந்து வருகின்றனர்.
அமேசான் நிறுவனத்தில் கமலா ஹாரிஸ் எதிர்ப்பாளர் ஒருவர்
ஜோ மற்றும் கமலா ஹாரிஸ் ஆகியோரை தரக்குறைவாக சித்தரிக்கும்
வகையில் வாசகம் கொண்ட ஒரு டி-சர்ட்டை விற்பனைக்கு கொண்டு
வந்தார்.

'இனப்பாகுபாடு காட்டும் எந்த விளம்பரத்தையும் பொருட்களையும்
அமேசான் தளத்தில் பதிவிடக்கூடாது' என, அமேசானின் கொள்கைக்கு
எதிராக இந்த டி-ஷர்ட்கள் அமேசான் தளத்தில் விற்பனைக்கு வந்தன.

இதயைடுத்து ஒரு டுவிட்டர் பயனாளர் இந்த டி-சர்ட் விற்பனைத் தளத்தை
ஸ்கிரீன்ஷாட் எடுத்து டுவிட்டரில் பதிவிட்டார். இதனால் அமேசான்
நிறுவனம் விமர்சனத்துக்கு உள்ளானது.

இதைக் கண்டதும் அமேசான் நிறுவனம் அந்த மூன்றாம் நபர்
விற்பனையாளருக்கு தடைவிதித்துள்ளது. அந்த பதிவும் அமேசான்
தளத்தில் இருந்து நீக்கப்பட்டுள்ளது. மேலும், 'அந்த வியாபாரி மீது தக்க
நடவடிக்கை எடுக்கப்படும் என அமேசான் தலைமை நிர்வாகி உறுதி
அளித்துள்ளார்.
-
தினமலர்