ஜெனரிக் மருந்துகளின் விலை மட்டும் குறைவாக இருப்பது ஏன்?

நம் நாட்டில் மருத்துவத்துக்குச் செய்யும் செலவால் மட்டும் வருடத்துக்கு 6 கோடிக்கும் அதிகமான மக்கள் வறுமைக்கோட்டுக்குக் கீழ் தள்ளப்படுகிறார்கள்’ என்கின்றன ஆய்வுகள்.

அதில், 70 சதவிகித தொகை, மருந்து, மாத்திரைகளுக்காக மட்டுமே செலவிடப்படுகின்றன என்பதுதான் நம்மை அதிர்ச்சியுறச்செய்கிறது. அப்படி மருந்து மாத்திரைகளின் அசுர விலையிலிருந்து மக்களை ஓரளவேணும் மீட்க வந்தவைதான் ஜெனரிக் மருந்துகள். ஆனால், `ஜெனரிக் மருந்தா…அப்படின்னா?’ என்று கேட்கும் நிலையில்தான் நம்மிடம் விழிப்புணர்வு இருக்கிறது

“நாம் கடையில் வாங்கும் மருந்துகளைவிட ஜெனரிக் மருந்துகள் மிகக்குறைவான விலையில் கிடைக்கும் என்கின்றனரே? அது என்ன ஜெனரிக் மருந்து? அது எங்கே கிடைக்கும்? ஏன் அதுமட்டும் விலை குறைவாக இருக்கிறது?” என்கிற கேள்விகளை #DoubtOfCommonMan பக்கத்தில் எழுப்பியிருந்தார் மாரிமுத்து என்ற வாசகர். அந்தச் சந்தேகங்களுக்கான விளக்கம்தான் இந்தக் கட்டுரை.

அதென்ன ஜெனரிக் மருந்து?

ஒரு மருந்தையோ மாத்திரையையோ அதன் மூலப்பொருள்களின் வேதியியல் பெயரால் அழைப்பது ‘ஜெனரிக்’. ஒரு மருந்து நிறுவனம் புதிதாக ஒரு மருந்தைக் கண்டுபிடித்தால், முதல் 20 ஆண்டுகளுக்கு அந்த நிறுவனம் மட்டுமே அதை விற்பனை செய்யமுடியும். இதைக் ‘காப்புரிமைக் காலம்’ என்று சொல்லலாம்.
காப்புரிமைக் காலம் முடிந்தபிறகு அது எல்லோருக்கும் பொதுவானதாகிவிடும். பிறகு அதை எந்த மருந்து நிறுவனம் வேண்டுமானாலும் தயாரித்து விற்பனை செய்யலாம். அப்படி விற்கப்படும் மருந்துகளையே ‘ஜெனரிக் மருந்துகள்’ என்கிறோம்.

காப்புரிமைக் காலம் முடிந்தபின்னர், அந்த மருந்துகளைத் தயாரிக்கும் நிறுவனங்கள் தங்களுக்கு விருப்பப்பட்ட பெயர்களைச் சூட்டிக்கொள்வார்கள். ‘பாராசிட்டாமல்’ என்பது ஜெனரிக் பெயர். அதுவே தயாரிக்கும் நிறுவங்களைப்பொறுத்து, கால்பால், குரோசின், டோலோ, மெட்டாசின் எனப் பலபெயர்களில் அழைக்கப்படுகிறது.

காப்புரிமைக் காலத்தில் அதிகமான விலையில் மருந்து விற்பனை செய்யப்படுவது ஏன்?

மருந்தைக் கண்டுபிடித்த நிறுவனம், மருந்தின் விலையை நிர்ணயம் செய்யும்போது மூலப்பொருள்களுக்கு ஆகும் செலவோடு, மருந்தைக் கண்டுபிடிக்க ஆன செலவுகளையும் சேர்த்து விலை நிர்ணயம் செய்வார்கள்.

அதனால்தான் மருந்தின் விலை அதிகமாக இருக்கிறது. காப்புரிமைக் காலத்தில் பிற நிறுவனங்கள் அந்த மருந்தைத் தயாரிக்க விரும்பினால், மருந்தைக் கண்டுபிடித்த நிறுவனத்துக்கு ‘ராயல்டி’ (காப்புத்தொகை) கொடுக்கவேண்டும். அதனால், மருந்துகளின் ஒட்டுமொத்த தயாரிப்புச் செலவு என்பது ராயல்டிக்கான செலவு, மூலப்பொருள்களின் செலவு என அனைத்தையும் உள்ளடக்கியதாக இருப்பதால் மருந்துகளின் விலையும் அதிகமாக நிர்ணயிக்கப்படுகிறது.

மருந்து ஜெனரிக் ஆனபின் குறைவான விலைக்குக் கிடைப்பது ஏன்?

காப்புரிமைக் காலம் முடிந்துவிட்டால், யார் வேண்டுமானாலும் மருந்தைத் தயாரித்து விற்பனை செய்யமுடியும். மருந்தைக் கண்டுபிடித்த நிறுவனத்துக்கு ராயல்டி எதுவும் கொடுக்கத் தேவையில்லை. மருந்தின் மூலப்பொருள்களுக்கு ஆகும் செலவு மட்டும்தான். அதனால் மருந்து தயாரிக்கும் நிறுவனங்கள் குறைந்த செலவில் தயாரித்து, குறைந்த விலையில் விற்பனை செய்யும்.

தயாரிக்கும் நிறுவனங்களின் லாப எதிர்பார்ப்பைப்பொறுத்து மருந்தின் விலையில் சிறு ஏற்ற இறக்கங்கள் இருக்கும். இப்படி மற்ற நிறுவனங்கள் குறைந்த விலைக்கு விற்பனை செய்வதால், மருந்தைக் கண்டுபிடித்த நிறுவனமும் குறைந்த விலைக்கே மருந்தை விற்கவேண்டிவரும். அதனால், ஒட்டுமொத்தமாக மருந்தின் விலை குறையும்.

நன்றி-விகடன்

அருமையான பதிவு அண்ணா, மிகவும் நன்றி !

எனது வெகு நாள் சந்தேகம் தீர்த்து வைத்த பகிர்வுக்கு மிக்க நன்றி

பயனுள்ள தகவல் பகிர்ந்தமைக்கு நன்றி
ஐயா

T.N.Balasubramanian wrote:பிராண்டட் மருந்துகள் தயாரிக்கும் விலை /விற்கும் விலை அறிந்தால்
ஆச்சர்யமாக இருக்கும் .தயாரிப்பு செலவு ஒரு ரூபாய் என்றால் விற்கும் விலை கிட்டத்தட்ட 30 ரூபாய்.ஏன் என்றால் ,
தயாரிப்பாளர் லாபம் 10 ரூபாய் முதல் 12 ரூபாய்.
மெடிக்கல் ரெப் /கமிஷன் /போக்குவரத்து செலவு --6ரூபாய்.
மெடிக்கல் ஸ்டோர்களுக்கு விற்பனை கமிஷன்.-- 6-9 ரூபாய்
மருத்துவர்களுக்கு பரிசு/பரிந்துரை செலவு --3 ரூபாய்.
பெரிய இடங்களுக்கு தயாரிப்பாளர் லாபத்தில் இருந்து கணிசமான தொகை.
(மருந்து தயாரிக்கும் கம்பெனியில் தயாரிப்பு வல்லுநர் கூறி தகவல்)
மெடிக்கல் ஸ்டோர் வைத்து நஷ்டம் வந்தது என கடையை மூடியவர்கள் யாருமிலர்.

ரமணியன்

மேற்கோள் செய்த பதிவு: 1328792

உண்மை உண்மை உண்மை

மருந்து கடையில் வேலை செய்யும் எனது நண்பர் என்னிடம் இதுபோல் சொல்லி இருக்கிறார்