கோவிட் -19 கதை

**M.Jagadeesan** · **M.Jagadeesan** Tue Aug 18, 2020 9:42 am

பெண்ணின் போட்டோ வேண்டுமென்று , பிள்ளையின் அப்பா கேட்டார் .

நாளைக்குத்தான் பெண் பார்க்கப் போகிறோமோ ! எதற்கு போட்டோ ? என்று கேட்டார் புரோக்கர் பொன்னம்பலம் ,

மாப்பிள்ளையின் போட்டோ வேண்டுமென்று பெண்ணின் அப்பா கேட்டபோதும் இதே பதிலைத்தான் புரோக்கர் பொன்னம்பலம் சொன்னார் .

நாளைக்குதான் பெண் பார்க்க வருகிறார்களே : அப்போது மாப்பிள்ளையை நேரிலேயே பார்த்துக்கொள்ளலாம் என்று சொன்னார் .

ஆனால் இருவர் வீட்டிலும் புரோக்கர் பொன்னம்பலம் ஒரு விஷயத்தைக் கராறாகச் சொன்னார் . எல்லோரும் முகக்கவசம் அணிந்துகொண்டு வரவேண்டும் ; குறிப்பாகப் பெண்ணும் மாப்பிள்ளையும் கன்டிப்பாக முகக்கவசம் அணியவேண்டும் என்று சொல்லிவிட்டார் .மாப்பிள்ளை வீட்டில் பத்து பேரும் , பெண் வீட்டில் பத்து பேரும் வந்தால் போதுமானது என்று சொல்லிவிட்டார் .

மறுநாள் ..

பெண்பார்க்கும் படலம் சிறப்பாக நடந்தேறியது . மாப்பிள்ளைக்குப் பெண்ணை பிடித்துவிட்டது ; பெண்ணுக்கும் மாப்பிள்ளையைப் பிடித்துவிட்டது . அப்போதே நிச்சயம் செய்து திருமண நாளும் குறிக்கப்பட்டது .

திருமணத்திற்கு பெண் வீட்டார் 25 பேர் , மாப்பிள்ளை வீட்டார் 25 பேர் ஆக மொத்தம் 50 பேர் வந்தால் போதுமானது என்று புரோக்கர் பொன்னம்பலம் சொல்லிவிட்டார் . எல்லோரும் முகக்கவசம் அணிந்து வரவேண்டும் ; குறிப்பாகப் பெண்ணும் , மாப்பிள்ளையும் கண்டிப்பாக முகக்கவசம் அணியவேண்டும் என்றும் ; மணமேடையிலும் முகக்கவசம் அணிந்துதான் தாலி கட்டவேண்டும் என்றும் கன்டிப்பாகப் புரோக்கர் சொல்லிவிட்டார் .

திருமண நாளும் வந்தது . திருணம் சிறப்பாக நடந்தேறியது .விருந்து தடபுடலாக இருந்தது. தாலி கட்டி முடிந்தவுடன் பெண்ணும் , மாப்பிள்ளையும் சாப்பிடுவதற்கு தனி அறை ஏற்பாடு செய்யப்பட்டு இருந்தது .
சாப்பாட்டு அறைக்குள் பெண்ணும் , மாப்பிள்ளையும் நுழைந்தார்கள் . இலை முன்பு அமர்ந்தார்கள் . சாப்பிடுவதற்காக முகக்கவசத்தை இருவரும் கழட்டினார்கள் .

பெண்ணின் முகத்தைப் பார்த்த மாப்பிள்ளைக்கு ஒரே அதிர்ச்சி . மாப்பிள்ளையின் முகத்தைப் பார்த்த பெண்ணுக்குத் தூக்கிவாரிப் போட்டது .

பெண்ணுக்கு மூக்கு சப்பையாக இருந்தது ; மூக்கு இருக்கவேண்டிய இடத்தில் இரு துவாரங்கள் மட்டும் இருந்தன. மாப்பிள்ளைக்கு முன்வரிசைப் பற்கள் வெளியே துருத்திக்கொண்டு இருந்தன . செய்தி சம்மந்திகளுக்கு ஈட்டவும் , கல்யாண வீடு களேபரமானது .

சப்பை மூக்குப் பெண்ணை என் பையனின் தலையில் கட்டிவிட்டார்கள் என்று மாப்பிள்ளையின் அப்பா குதிக்கத் தொடங்கிவிட்டார் .

தெத்துப் பல்லுக்காரனை என் மகளின் தலையில் கட்டிவிட்டார்கள் என்று பெண்ணின் அப்பா ஆர்ப்பாட்டம் பண்ணினார் .

" கூப்பிடு அந்தப் புரோக்கரை ! " என்று எல்லோரும் கூச்சலிட்டனர் .

புரோக்கர் பொன்னம்பலம் ஓடோடி வந்தார் . நிலைமையைச் சட்டெனப் புரிந்துகொண்டார் .

" பெண்ணிடம் ஒரு குறை உள்ளது ; மாப்பிள்ளையிடமும் ஒரு குறை உள்ளது . இருவருக்கு அழகான துணை அமைவது கண்டிப்பாக நடக்காது . நான் வேண்டுமென்றுதான் உண்மையை மறைத்தேன் . ஆயிரம் பொய் சொல்லியாவது ஒரு திருமணத்தைச் செய்யலாம் என்று பெரியவர்கள் சொல்லுவார்கள் ; நான் ஒரேயொரு பொய்யைத்தான் சொன்னேன் . இருவர் மனமும் ஒத்துப் போனால் காலப்போக்கில் எல்லாம் சரியாகிவிடும் "

என்று புரோக்கர் சொன்னவுடன் எல்லோரும் அதை ஆமோதித்தார்கள் '

தெலுங்கில் ஒரு பழமொழி உண்டு . " தானிகி தீனிகி சரிகா போயிந்தி " என்று சொல்வார்கள் . அதாவது பெண்ணிடம் உள்ள குறைக்கும் ' மாப்பிள்ளையிடம் உள்ள குறைக்கும் சரியாகப் போய்விட்டது என்று புரோக்கர் பொன்னம்பலம் சொன்னதும் அனைவரும் கொல்லென்று சிரித்தார்கள் .