திருச்சி உட்பட 12 விமான நிலையங்களை தனியார்மயமாக்க மத்திய அரசு திட்டம்

by **ayyasamy ram** Wed Aug 19, 2020 6:58 am

-
புதுடில்லி:
'திருச்சி உட்பட, 12 விமான நிலையங்களை தனியார்மயமாக்கும்
பரிந்துரைகள், டில்லியில் இன்று நடக்கும் மத்திய அமைச்சரவை
கூட்டத்தில் தாக்கல் செய்யப்படும்,'' என, மத்திய விமான
போக்குவரத்து அமைச்சர் ஹர்தீப் சிங் பூரி தெரிவித்தார்.

ஆண்டுக்கு, 10 - 15 லட்சம் பயணியர் வந்து செல்லும் விமான
நிலையங்கள் பராமரிப்பை தனியார்மயமாக்குவது என,
மத்திய அரசு முடிவு செய்தது.

ஒப்புதல்

முதல் கட்டமாக, லக்னோ, ஆமதாபாத், ஜெய்ப்பூர், மங்களூரு,
திருவனந்தபுரம், கவுஹாத்தி விமான நிலையங்களை
தனியார்மயமாக்க, மத்திய அமைச்சரவை, கடந்த ஆண்டு ஒப்புதல்
அளித்தது.

இதையடுத்து, ஆமதாபாத், மங்களூரு, லக்னோ விமான
நிலையங்களை பராமரிக்கும் ஒப்பந்தத்தில், அதானி குழுமம்
கையெழுத்திட்டது.

இந்நிலையில், இரண்டாம் கட்டமாக, மேலும், சில விமான
நிலையங்களை தனியார் மயமாக்க, மத்திய விமான
போக்குவரத்து அமைச்சகம் முடிவு செய்துள்ளது.

இது பற்றி, மத்திய விமான போக்குவரத்து துறை
அமைச்சர் ஹர்தீப் சிங் பூரி கூறியதாவது:

இந்திய விமான நிலைய ஆணையம், அமிர்தசரஸ், வாரணாசி,
புவவேஸ்வர், இந்துார், ராய்ப்பூர், திருச்சி ஆகிய விமான
நிலையங்களை தனியார்மயமாக்க, கடந்த ஆண்டே
பரிந்துரைத்துள்ளது.

100 விமான நிலையங்கள்

இந்த விமான நிலையங்கள் உட்பட, 12 விமான நிலையங்களை
தனியார்மயமாக்க திட்டமிடப்பட்டுள்ளது. இது தொடர்பான
பரிந்துரைகள், டில்லியில், இன்று நடக்கும் மத்திய அமைச்சரவை
கூட்டத்தில் தாக்கல் செய்யப்படும்.

2030ம் ஆண்டுக்குள், 100 விமான நிலையங்கள் புதிதாக கட்டப்படும்.
இவ்வாறு அவர் கூறினார்.

இதற்கிடையே, கொரோனா பரவல் காரணமாக, உள்நாட்டு
விமான போக்குவரத்து, கடந்த மார்ச், 23ல் தடை செய்யப்பட்டது.
ஜூன் முதல், உள்நாட்டு விமான சேவை, குறைந்த அளவில்
நடந்து வருகிறது.

கொரோனா பரிசோதனை மையம்

சீனாவில், முதன்முதலில் பரவ ஆரம்பித்த கொரோனா, இப்போது,
உலக நாடுகள் அனைத்திலும் பரவியுள்ளது. இதையடுத்து,
கடந்த மார்ச், 23 முதல், இந்தியாவில், சர்வதேச விமான போக்குவரத்து
தடை செய்யப்பட்டுள்ளது.

வெளிநாடுகளில் பாதிக்கப்பட்டுள்ள இந்தியர்கள், 'வந்தே பாரத்'
திட்டத்தின் கீழ், சிறப்பு விமானங்களில், இந்தியாவுக்கு அழைத்து வரப்படுகின்றனர். இவர்களுக்கு, கொரோனா இல்லை என்பதை
உறுதி செய்தால் மட்டுமே, விமானத்தில் பயணம் செய்ய முடியும்.

மேலும், இந்த சோதனை, 96 மணி நேரத்துக்குள்
மேற்கொள்ளப்பட்டிருக்க வேண்டும். அப்படியிருந்தால் மட்டுமே,
இவர்கள், இந்தியா திரும்பியவுடன், ஏழு நாள் கட்டாயமாக
தனிமைப்படுத்திக் கொள்வதிலிருந்து விலக்கு அளிக்கப்பட்டு
வருகிறது.

இதற்கிடையே, கடந்த, 8ம் தேதி முதல், இந்த விதியில், சில மாற்றங்கள் செய்யப்பட்டன.

கர்ப்பிணியர், குடும்பத்தில் ஒருவர் இறந்ததற்காக வருபவர்கள்,
வேறு நோயால் கடுமையாக பாதிக்கப்பட்டிருப்பவர்கள்,
10 வயதுக்குட்பட்ட குழந்தைகளுடன் வரும் பெற்றோர்
ஆகியோருக்கும், ஏழு நாள் கட்டாய தனிமைப்படுத்தலில்
இருந்து விலக்கு அளிக்க முடிவு செய்யப்பட்டுள்ளது.

இந்நிலையில், வெளிநாடுகளிலிருந்து வருபவர்களை
பரிசோதிப்பதற்காக, டில்லி விமான நிலையத்தில், கொரோனா
பரிசோதனை மையம் ஏற்படுத்த முடிவு செய்யப்பட்டுள்ளது.
இந்த மையத்தில், சோதனையின் முடிவு, எட்டு மணி நேரத்தில்
வெளியாகும்.

அதனால், வெளிநாடுகளில் இருந்து வரும் பயணியர், எட்டு மணி
நேரம் விமான நிலையத்திலேயே தங்கியிருக்க வேண்டும்.

இதில், கொரோனா இல்லை என்பது உறுதியானால், அவர்கள்,
வீடுகளுக்கு செல்லலாம்.இல்லாவிடில், தனிமை முகாமில்
ஏழு நாட்கள் தங்கியிருக்க வேண்டும் என, மத்திய சுகாதாரத்துறை
தெரிவித்து உள்ளது.

தினமலர்