'விசா, கிரீன் கார்டு' முறைகளில் மாற்றம்: இந்தியர்களுக்கு ஜோ பிடன் உறுதி

வாஷிங்டன்;
'அமெரிக்க அதிபராக தேர்ந்தெடுக்கப்பட்டால், 'எச் 1பி விசா' முறையில்
மாற்றம் செய்யப்படும்; 'கிரீன் கார்டு' எனப்படும் நிரந்தர 'குடியுரிமை
வழங்குவதற்கான கட்டுப்பாடுகள் நீக்கப்படும்' என, இந்தியர்களை
கவருவதற்காக, அதிபர் வேட்பாளர் ஜோ பிடன், பல்வேறு உறுதி
மொழிகளை அறிவித்துள்ளார்.

அமெரிக்க அதிபர் பதவிக்கான தேர்தல், நவ., 3ம் தேதி நடக்க
உள்ளது. இதில், குடியரசு கட்சி சார்பில், அதிபர் டொனால்டு டிரம்ப்
மீண்டும் போட்டியிட உள்ளார். ஜனநாயகக் கட்சி சார்பில், முன்னள்
துணை அதிபர், ஜோ பிடன் போட்டியிடுகிறார்.அமெரிக்க வாழ்
ஆப்ரிக்கர் மற்றும் இந்தியர்களின் ஓட்டுகளை பெறும் வகையில்,
ஆப்ரிக்கா மற்றும் இந்தியாவை பூர்வீகமாக கொண்ட, கமலா ஹாரிசை,
துணை அதிபர் வேட்பாளராக, ஜோ பிடன் அறிவித்துள்ளார்.

இந்த நிலையில், 13 லட்சம் அமெரிக்க வாழ் இந்தியர்களின் ஓட்டுகள்,
இந்தத் தேர்தலில் முக்கிய பங்கை வகிக்க உள்ளது.அமெரிக்க தேர்தல்
வரலாற்றில், இந்தியர்களை கவரும் வகையிலான தேர்தல் அறிக்கையை,
ஜனநாயகக் கட்சி முதல் முறையாக வெளியிட்டுள்ளது.

இந்தியாவின், 74வது சுதந்திர தினமான, நேற்று முன்தினம் இந்த அறிக்கை
வெளியிடப்பட்டுள்ளது. அதில் கூறப்பட்டுஉள்ளதாவது:அதிபராக ஜோ பிடன்
தேர்ந்தெடுக்கப்பட்டால், விசா முறைகள் உள்ளிட்டவற்றில் பல சீர்திருத்த
நடவடிக்கைகள் எடுக்கப்படும். வெளிநாடுகளைச் சேர்ந்தவர்கள், குறிப்பாக
இந்தியாவைச் சேர்ந்தவர்கள் அதிகம் பயன்படுத்தும், எச் 1பி விசா வழங்கும்
முறையில் சீர்திருத்தம் செய்யப்படும்.

அதேபோல், விசா பெற்றுள்ளோரின் குடும்பத்தாருக்கு, விசா வழங்குவதில்
உள்ள சிக்கல்களுக்கும் தீர்வு காணப்படும். மத ரீதியிலான பணிக்கு
வருவோருக்கு, விசா வழங்குவது வேகப்படுத்தப்படும். மதம், மொழி ரீதியிலான
பாகுபாடுகள் இல்லாமல், அனைவருக்கும் தேவையான உதவிகள் செய்யப்படும்.
கிரீன் கார்டு எனப்படும், நிரந்தர குடியுரிமை அளிப்பதில், தற்போது, ஒவ்வொரு
நாட்டுக்கும் ஒதுக்கீடு செய்யப்படுகிறது. இந்த முறை மாற்றப்படும்.

இதனால், குடியுரிமை கேட்டு இந்தியர்கள் நீண்ட காலம் காத்திருக்க வேண்டிய
நிலை தவிர்க்கப்படும்.இவ்வாறு, அதில் கூறப்பட்டுள்ளது.

'ஜோ பிடன் அதிபராக தேர்ந்தெடுக்கப்பட்டால், இந்திய ஆதரவு நிலைப்பாட்டையே
மேற்கொள்வார்' என, அவருடைய பிரசார குழுவினர் தெரிவித்துள்ளனர்.
வெளியுறவுத் துறை முன்னாள் அதிகாரியான, டோனி பில்கென், தற்போது
ஜோ பிடனுக்கான வெளியுறவுக் கொள்கையை வகுத்து வரும் குழுவில் இடம்
பெற்றுள்ளனர்.

ஜோ பிடனின் வெளியுறவு கொள்கைகள் குறித்த விவாதத்தின்போது,
டோனி பில்கென் கூறியதாவது:சர்வதேச அளவில் இந்தியா முக்கிய பங்காற்ற
வேண்டும் என்பதே, பிடனின் விருப்பம்.ஐ.நா., பாதுகாப்பு கவுன்சிலில், இந்தியாவுக்கு
நிரந்தர இடம் கிடைப்பதற்கு முழு உதவியையும் அளிப்போம்.

அமெரிக்கா - இந்தியா இடையேயான உறவை மேலும் வலுப்படுத்துவதே, பிடன்
நிர்வாகத்தின் முக்கிய நோக்கமாக இருக்கும். பிடன் நிர்வாகத்தின் முக்கிய
கூட்டாளியாக இந்தியா இருக்கும்.இவ்வாறு, அவர் கூறினார்.இந்தியர்களிடையே க
மலா பேச்சுதமிழகத்தின் சென்னையை பூர்வீகமாக கொண்ட, ஜனநாயகக் கட்சியின்
துணை அதிபர் வேட்பாளர், கமலா ஹாரிஸ், அமெரிக்க வாழ் இந்தியர்கள்
இடையேயான முதல் கூட்டத்தில் பங்கேற்றார். 'வீடியோ கான்பரன்ஸ்' முறையில்
நடந்த இந்த பிரசார கூட்டத்தில், ஜோ பிடனும் பங்கேற்றார்.

-


அப்போது, கமலா ஹாரிஸ் பேசியதாவது:

அமெரிக்க துணை அதிபர் தேர்தலில் போட்டியிடும், முதல்
தெற்காசியாவைச் சேர்ந்தவர் என்ற முறையில், உங்கள் முன் நிற்கிறேன்.
இந்தியாவின், 74வது சுதந்திர தினத்தையொட்டி அனைவருக்கும்
வாழ்த்துக்களை தெரிவித்துக் கொள்கிறேன்.

சென்னையில் பிறந்து வளர்ந்த என்னுடைய தாய் ஷியாமளா, படிப்பதற்காக
அமெரிக்கா வந்தார். அநீதியைக் கண்டால், அதை எதிர்த்து குரல் கொடுக்க
வேண்டும் என்று, என் தாய்க்கு, அவருடைய பெற்றோர் கற்றுத் தந்தனர்.
அது எனக்கும் கற்றுத் தரப்பட்டது.நம்முடைய வேரை நாம் மறக்கக் கூடாது
என்பதற்காக, என்னையும், என் சகோதரியையும் எங்களுடைய தாய்,
சென்னைக்கு அழைத்துச் சென்றுள்ளார்.

எங்களுடைய தாத்தாவின் கைகளை பிடித்து, கடற்கரைகளில் நடந்து
சென்றுள்ளேன். அப்போது, நாட்டின் சுதந்திரத்திற்காக போராடிய தலைவர்கள்
பற்றி, அவர் எங்களுக்கு சொல்லித் தந்தார்.சுட சுட இட்லியை விரும்பி
சாப்பிடுவதும், அங்கிருந்து தான் கற்றுக் கொண்டேன்.இவ்வாறு, அவர்
பேசினார்.

தினமலர்