பார்வையாளர்கள் இல்லாமல் நடந்து முடிந்த அட்டாரி சுதந்திரதின விழா

-

-
அட்டாரி:
61 ஆண்டுகளில் முதன் முறையாக அட்டாரி எல்லைப்
பகுதியில் பார்வையாளர்கள் பங்கு பெறாமல் சுதந்திர
தின விழா நடந்து முடிந்தது.

பஞ்சாப் மாநிலம் அமிர்தசரஸில் இருந்து 35 கி.மீ தொலைவில்
உள்ளது அட்டாரி வாகா எல்லைப்பகுதி. இருநாட்டு எல்லைப்
பகுதியில் அமைந்துள்ள இங்கு தினந்தோறும் சூரியன்
அஸ்தமிக்கும் நேரத்தில் இருபுறங்களிலும் எல்லை வீரர்கள் தங்கள்
தேசிய கொடியை இறக்கும் நிகழ்ச்சி காண சுற்றுலாபயணிகள்
குவிவர்.
இது ஒரு சுற்றுலா தளமாகவும் அமைந்துள்ளது.

அதே போல் பாகிஸ்தானின் சுதந்திர தினநாளான ஆக.,14-ம் தேதி
அன்றும், நமது நாட்டின் சுதந்திரதின நாளான ஆக.,15-ம் தேதி
அன்றும் இரு நாட்டு வீரர்கள் இனிப்புகளை பரிமாறிக்கொள்வர்.

கடந்த சில ஆண்டுகளுக்கு முன்னர் காஷ்மீர் மாநிலம் புல்வாமா
பகுதியில் பாக்., ஆதரவுடன் நடைபெற்ற தாக்குதல் மற்றும் இந்தியா
நடத்திய சர்ஜிக்கல் தாக்குதல் காரணமாக
இப்பகுதியில் இனிப்புகள் வழங்குவது நிறுத்தப்பட்டுள்ளது.

தற்போதைய சூழ்நிலையில் கொரோனா வைரஸ் அச்சுறுத்தல்
டில்லி சுதந்திர தின விழாவிலும் எதிரொலித்தது. வழக்கம் போல்
நடைபெறும் நிகழ்ச்சி நிரல்கள் குறைக்கப்பட்டதோடு சமூக
இடைவெளியும் பின்பற்றப்பட்டது.

அதே நிலை தான் அட்டாரியிலும் நிகழ்ந்துள்ளது. 61 ஆண்டுகளில்
முன் எப்போதும் இல்லாத வகையில் பார்வையாளர்கள் இல்லாமல்
சுதந்திர தின விழா நடைபெற்றதாக அதிகாரிகள் தெரிவித்தனர்.

இது குறித்து பாதுகாப்பு அதிகாரிகள் கூறியதாவது: கொரோனா
வைரஸ் அச்சுறுத்தல் காரணமாக கடந்த மார்ச் மாதத்தில் இருந்து
பார்வையாளர்கள் வருகை இல்லாமல் தினமும் இரு நாட்டு தரப்பிலும்
கொடியை ஏற்றுவதுமற்றும் இறக்குவது வழக்கம் போல்
நடைபெறுகிறது.

சுதந்திர தின வழாவில் பிஎஸ்.எப். இயக்குனர் ஜெனரல்
சுர்ஜித்சிங் தேஸ்வால் கலந்து கொண்டார். என அதிகாரிகள்
தெரிவித்தனர்.

தினமலர்