டோகோ(Togo) கால்பந்து வீரர்கள் காயத்துடன் தப்பினர் ; அங்கோலாவில் துப்பாக்கியால் சுடப்பட்டனர்

லூவாண்டா: ஆப்பரிக்க தேசிய கோப்பை கால்பந்து போட்டியில் பங்கேற்க சென்ற தோகா கால்பந்து வீரர்கள் மீது கடும் துப்பாக்கி சூடு நடத்தப்பட்டது. இதில் வீரர்கள் பலர் காயமுற்றனர். பஸ்சை ஓட்டி வந்த டிரைவர் கொல்லப்பட்டார். அங்கோலாவில் ஞாயிற்றுக்கிழமை ( நாளை ) ஆப்பரிக்க கோப்பை போட்டி துவங்கவிருக்கிறது. இந்த போட்டியில் பங்கேற்க மேற்கு ஆப்ரிக்க பகுதியில் உள்ள தோகா நாட்டு வீரர்கள் பஸ் மூலம் அங்கோலா வந்து கொண்டிருந்தனர். காங்கோவை கடந்து அங்கோலாவில் உள்ள கபிந்தா பகுதிக்குள் நுழைந்தபோது இந்த சம்பவம் நடந்தேறியுள்ளது. இங்கு மறைந்து இருந்த மர்ம நபர்கள் மிஷின்கன் மூலம் சரமாரியா பஸ்சை நோக்கி சுட்டுத்தள்ளினர். பஸ்சில் இருந்த வீரர்கள் தங்களது உயிரை காப்பாற்றிக்கொள்ள பஸ் இருக்கைகளின் ( சீட் ) கீழே பதுங்கி கொண்டனர். இதில் பல வீரர்கள் காயமுற்றனர். பஸ்சை ஓட்டி வந்த டிரைவர் குண்டு பாய்ந்து கொல்லப்பட்டார். சில நிமிடம் தாக்குதல் நடத்தியவர்கள் தப்பி ஓடி விட்டனர். சுமார் 20 நிமிடம் வரை இந்த தாக்குதல் நடந்துள்ளது. பின்னர் பாதுகாப்பு படையினர் வந்து மீட்டு ஆஸ்பத்திரிக்கு அனுப்பி வைத்தனர். இப்பகுதியில் உள்ள மலைவாழ் மக்கள் தங்களுடைய சுதந்திரத்திற்காக போராட்டம் நடத்தி வருகின்றனர். இவர்கள் இந்த தாக்குதலில் ஈடுபட்டிருக்கலாம் என கூறப்படுகிறது. தொடர்ந்து இது போன்ற தாக்குதல் நடத்துவோம் என இந்த அமைப்பினர் எச்சரித்துள்ளனர். இதனையடுத்து அங்கு பாதுகாப்பு பலப்படுத்தப்பட்டுள்ளதாக அங்கோலா விளையாட்டு துறை அமைச்சர் கூறியுள்ளார். தோகா வீரர்கள் திங்கட்கிழைமை நடக்கவிருந்த போட்டியில் பங்கேற்பதாக இருந்தனர். இந்த துப்பாக்கி சூடு சம்பவத்தில் வீரர்கள் காயத்துடன் உயிர் பிழைத்துள்ளனர். இந்த சம்பவம் ஆப்ரிக்காவில் பரபரப்பை ஏற்படுத்தியுள்ளது.


நாங்கள் நாய்கள் போல சுடப்பட்டோம் என தோகா விளையாட்டு வீரர் தாமஸ் தோசவி கூறியுள்ளார். இந்த அணியில் இருந்த செர்ஜ் அக்கோபோ , கோட்ஜோவி ஒபிலால் , இந்த அணியின் செய்தி தொடர்பாளர் உள்பட 4 பேர் பலத்த காயமுற்றுள்ளனர். எவ்வித தாக்குதல் நடந்தாலும் போட்டிகள் நடக்கும் என விளையாட்டை நடத்தும் ஆப்ரிக்கன் புட்பால் கான்படரேசஷன் நிர்வாகிகள் கூறியுள்ளனர்.


இந்த சம்பவம் குறித்து தோகா அணியின் கேப்டன் இம்மானுவேல் அபயர் கூறுகையில் ; எங்களது சகர வீரர்கள் கடுமையாக பாதிக்கப்பட்டுள்ளனர். ஒருவர் நினைவிழந்த நிலையில் உள்ளார். தற்போது அணி வீரர்களின் உடல்நலமே முக்கியம். எனவே நாங்கள் ஆப்ரிக்க கோப்பை போட்டியை புறக்கணிப்போம் அனைத்து வீரர்களளும் தங்களது இல்லத்திற்கு செல்ல விரும்புகின்றனர் என்றார்.


பாகிஸ்தானுக்கு, இலங்கை கிரிக்கெட் வீரர்கள் சென்ற போதும் இதேபோன்ற துப்பாக்கி சூடு நடத்தப்பட்டது .



நன்றி -தினமலர்