பழமை வாய்ந்த தலைமைச் செயலகம் இடிப்பு

ஐதராபாத்
ஒருங்கிணைந்த ஆந்திர மாநிலத்தின், பழமை வாய்ந்த தலைமைச்
செயலகத்தை இடித்து விட்டு, புதிய கட்டடம் கட்டும் பணியை
தெலுங்கானா மாநில அரசு துவக்கி உள்ளது.

தெலுங்கானாவில், முதல்வர் சந்திரசேகர ராவ் தலைமையிலான,
தெலுங்கானா ராஷ்ட்ரீய சமிதி ஆட்சி நடக்கிறது. இங்கு மாநில
பிரிவினைக்கு முன், ஒருங்கிணைந்த ஆந்திர மாநிலத்தின் தலைமைச்
செயலகம், ஐதராபாத் நகரில் செயல்பட்டு வந்தது;

இது மிகவும் பழமையான கட்டடம்.ஆந்திராவில் காங்கிரஸ், தெலுங்கு
தேசம் உள்ளிட்ட கட்சிகளின் தலைமையிலான அரசுகளின் எழுச்சிக்கும்,
வீழ்ச்சிக்கும் அசையா சாட்சியாக இந்த தலைமைச் செயலகம் இருந்து
வந்தது.

இங்கு, பல வரலாற்று முக்கியத்துவம் வாய்ந்த சம்பவங்கள்
அரங்கேறியுள்ளன. இந்நிலையில், தெலுங்கானா தனி மாநிலம் அமைந்த
பின், ஐதராபாத் நகரம், அந்த மாநிலத்தின் எல்லைக்குள் வந்தது.தலைமைச்
செயலகமும் பழைய இடத்திலேயே தொடர்ந்து செயல்பட்டு வந்தது.

இந்நிலையில், வாஸ்து, ஜோதிடம் போன்றவற்றில் நம்பிக்கையுள்ள
சந்திரசேகர ராவ், வாஸ்து நிபுணர்களின் அறிவுரைப்படி, தலைமைச்
செயலக கட்டடத்தை இடித்து விட்டு, அதே இடத்தில், 400 கோடி ரூபாய்
செலவில் புதிய தலைமைச் செயலகம் கட்டுவதற்கு கடந்தாண்டு அடிக்கல்
நாட்டினார்.

இதற்கு, எதிர்க்கட்சிகளும், பல்வேறு அமைப்புகளும் கடும் எதிர்ப்பு
தெரிவித்தன. 'தலைமைச் செயலக கட்டடம் நல்ல நிலையில் இருக்கும்போது,
அரசு பணத்தை வீணடிக்கும் வகையில் எதற்கு புதிய கட்டடம்?' என, பலரும்
தெரிவித்தனர். இது தொடர்பாக தெலுங்கானா உயர் நீதிமன்றத்திலும் வழக்கு
தொடரப்பட்டது. இதை விசாரித்த உயர் நீதிமன்றம், புதிய கட்டடம் கட்டுவதற்கு
சமீபத்தில் அனுமதி அளித்தது. இதையடுத்து, பழமை வாய்ந்த தலைமைச்
செயலகத்தை இடிக்கும் பணி, நேற்று துவங்கியது.

அடுத்த ஆண்டுக்குள் இதே இடத்தில் புதிய கட்டடத்தை கட்டுவதற்கு இலக்கு
நிர்ணயிக்கப்பட்டுள்ளது.

20 ஆயிரம் பேருக்குசிகிச்சை அளிக்கலாம்!

தலைமைச் செயலகத்தை இடிப்பதற்கு எதிர்ப்பு தெரிவித்து கர்நாடக மாநில,
பா.ஜ., செய்தி தொடர்பாளர் கிருஷ்ண ராஜ சாகர் கூறியதாவது:

மற்ற மாநிலங்களின் முதல்வர்கள் கொரோனா நோயாளிகளுக்காக மருத்துவ
மனைகள் அமைக்கும் பணியில் கவனம் செலுத்தி வருகின்றனர். டில்லி,
கர்நாடகா உள்ளிட்ட மாநிலங்களில் பிரமாண்ட மருத்துவமனைகள் மிக குறுகிய
காலத்தில் கட்டப்பட்டுள்ளன.

ஆனால், தெலுங்கானா முதல்வர், நல்ல நிலையில் உள்ள கட்டடத்தை இடிப்பதில்
கவனம் செலுத்துகிறார். பழைய தலைமைச் செயலக கட்டடத்தில், 20 ஆயிரம்
படுக்கை வசதிகளை ஏற்படுத்தி, தற்காலிக மருத்துவமனையாக மாற்றலாம்.

அதை செய்வதற்கு பதிலாக, அந்த கட்டடத்தை இடித்து, புதிய கட்டடம் கட்டுவதற்கு
மக்களின் வரிப் பணத்தை வீணடிக்கிறார்.இவ்வாறு, அவர் கூறினார்.

தினமலர்