இ.எஸ்.ஐ.,யில் 'டயாலிசிஸ்' வசதி இல்லை; கொரோனா நோயாளிகள் அவதி

கோவை அரசு மருத்துவக் கல்லுாரி மற்றும் இ.எஸ்.ஐ.,
மருத்துவமனை கொரோனா பாதிப்புக்குள்ளாகும்
நோயாளிகளுக்கு சிகிச்சை அளிக்க சிறப்பு மருத்துவமனையாக
மாற்றப்பட்டுள்ளது. மருத்துவமனையில், 400 படுக்கைகள்
ஏற்படுத்தப்பட்டுள்ளன.

கோவை, திருப்பூர், நீலகிரி ஆகிய மாவட்டங்களில் கொரோனா
தொற்றுக்குள்ளாகும் நோயாளிகளும் இங்கு அனுமதிக்கப்படுகின்றனர்.

சிறப்பு சிகிச்சை அளிக்க, பல கோடி ரூபாய் செலவில் கட்டப்பட்ட
இம்மருத்துவமனையில், பல்வேறு வசதிகள் இல்லை. குறிப்பாக,
சர்க்கரை நோயாளிகளுக்கான டயாலிசிஸ் வசதி இல்லை.

இந்நிலையில், கோவை அரசு மருத்துவமனையில், பணிபுரியும்
ஊழியருக்கு நேற்று கொரோனா தொற்று உறுதியானது. அவர், இ.எஸ்.ஐ.,
மருத்துவமனையில் அனுமதிக்கப்பட்டார். அவர் சர்க்கரை நோயாளி
என்பதால் டயாசிலிசிஸ் செய்வது கட்டாயமானது.

ஆனால், இ.எஸ்.ஐ., மருத்துவமனையில் அதற்கான வசதி இல்லாததால்,
அவர் மீண்டும், கோவை அரசு மருத்துவமனைக்கு மாற்றப்பட்டார்.
ஆனால், மருத்துவமனையில் அனுமதிக்க டாக்டர்கள் அனுமதி மறுத்தனர்.
டீன் உத்தரவையடுத்து அவர் அங்கு அனுமதிக்கப்பட்டார்.

கோவை அரசு மருத்துவமனை டீன் காளிதாஸ் கூறுகையில்,

''கொரோனா பாதிப்புக்குள்ளாகும் சர்க்கரை நோயாளிகளுக்கு டயாலிசிஸ்
மேற்கொள்ள தனியாக வார்டு அமைக்கப்பட்டுள்ளது. இதனால்,
பிற நோயாளிகளுக்கு பிரச்னை இல்லை. மருத்துவமனையில் அனைத்து
முன்னேற்பாடுகளும் மேற்கொள்ளப்பட்டுள்ளன,'' என்றார்.

இ.எஸ்.ஐ., மருத்துவமனை டீன் நிர்மலா கூறுகையில்,
''இ.எஸ்.ஐ.,யில் பதிவு செய்த நோயாளிகளுக்கு சிகிச்சை அளிக்கப்பட்டு
வருகிறது. குறைந்த எண்ணிக்கையிலேயே சர்க்கரை நோயாளிகள் வருகின்றனர்.
அவர்களுக்கு இ.எஸ்.ஐ.,யுடன் ஒப்பந்தம் செய்துள்ள மருத்துவமனைகளில்
டயாலிசிஸ் மேற்கொள்ளப்படுகிறது.

இ.எஸ்.ஐ.,யில் விரைவில், டயாலிசிஸ் செய்வதற்கான வசதிகள் ஏற்படுத்த
உள்ளோம்,'' என்றார்.

தினமலர்