பெரியவா திருவடி சரணம்

**krishnaamma** · **krishnaamma** Fri Jul 03, 2020 12:44 pm

பெரியவா திருவடி சரணம்

மஹா பெரியவா தஞ்சாவூருக்கு விஜயம் செய்த போது, ஒரு சாஸ்திரிகள் கூட்ட நெரிசலில் தம் இரண்டு வயது மகன் ஸ்ரீநிவாஸ் சங்கரனை தலைக்கு மேல் தூக்கிக் காட்டி, அவனைக் கன்னத்தில் போட்டுக் கொண்டு, வணங்கச் சொல்லிக் கீழே இறக்கினார்..

அப்போது அக் குழந்தை கழுத்தில் வில்வ மாலையுடன் இறங்கினான்! அப்பாவுக்கு ஆச்சரியம்!

சுவாமிகள் தலைக்கு நேராக சிறுவன் உயர்ந்து வந்த போது, சுவாமிகள் தம் கழுத்தில் இருந்த மாலையை எடுத்துச் சிறுவன் கழுத்தில் போட்டு விட்டார்!

எப்பேர்ப்பட்ட புண்ணியம் ! என எண்ணி மகிழ்ந்தார் தகப்பனார்...

மஹா பெரியவா அநுக்கிரஹத்தால் அந்தச் சிறுவனும், அவனது மூத்த சகோதரர்களும் படிப்பில் சிறந்த முறையில் தேர்ச்சி பெற்று, வாழ்க்கையில் படிப்படியாக உயர்ந்து, பெற்றோர் வாழ்த்தும் புதல்வர்களாக இருந்தார்கள்...

அவர்களின் தகப்பனார் சந்தனமரத்தில் ஒரு பாதுகை வாங்கி, அதனை மஹா பெரியவாளுக்கு ராஜமுந்திரி என்ற ஊரில், வியாச பூஜை நடந்த போது, அவருக்கு சமர்ப்பித்தார்..

பெரியவா, "இதை எங்கே பண்றான்?" என்று கேட்டு, அதனை அணிந்து கொண்டு பத்தடி நடந்தார்..

அதனை மீண்டும் அவரிடம் கொடுத்து ஆசி வழங்கினார்.. அவர் நமஸ்காரம் செய்து பயபக்தியுடன் பெற்றுக் கொண்டார்...

அதனைத் தலை மேல் தாங்கிக் கொண்டு வந்து, தாமரை போன்ற பீடம் செய்து, வீட்டின் பூஜையறையில் வைத்து இன்றும் ஒற்றுமையாக வழிபாடு செய்கிறார்கள்....