பறவைகளுக்கு உணவளிக்காமல் இருப்பதில்லை!

-
ஏராளமான பறவைகளுக்கு, தினமும் உணவு அளிப்பதை
கடமையாக செய்து வரும், சென்னை, பம்மலை சேர்ந்த,
விஜயபிரியா:

தினமும் அதிகாலையில், மூன்று வாளிகளை எடுத்துக்
கொண்டு மொட்டை மாடிக்குச் செல்வேன். ஒரு பாத்திரம்
நிறைய பால் சாதம்; மற்றொன்றில் நன்கு ஊறிய அரிசி;
இன்னொன்றில் கம்பும், சோளமும் கலந்த உணவுக்கலவை.

ஆங்காங்கே சின்னச்சின்னக் குவியலாய் பால் சாதத்தை
வைத்து விட்டு, அங்கிருந்த மரப்பலகையிலும் திண்டிலும்,
ஊறிய அரிசியை இடைவெளி விட்டு வைப்பேன்.

கம்பு, சோளத்தை மொட்டை மாடி எங்கும், விதை தூவுவது
போலத் தூவி விடுவேன். காலை, 6:00 மணிக்கு, சூரியனின்
ஒளிக்கதிர்கள் மென்மையாய் பரவும் நேரத்தில்,
வானத்திலிருந்து, எல்லா திசைகளிலும், அந்த விருந்தாளிகள்
பறந்து வரத் துவங்குவர்.

கூட்டமாக வரும் காகங்கள், பால் சாதத்தை உண்டு,
சிறகுகளைப் படபடத்து நன்றியையும், உற்சாகத்தையும்
அறிவிக்கும். எங்கிருந்தோ ஒரே ஒரு கிளி வந்து உட்கார்ந்து,
ஒரே ஒரு கீச்சொலி எழுப்ப, அடுத்த நொடியே, சுற்றிலும்
மரங்களில் இருந்த நூற்றுக்கணக்கான கிளிகள், மொத்தமாய்
அந்த மரப்பலகைகளையும், திண்டுகளையும் ஆக்கிரமிக்கும்.

இதெல்லாம், தினமும் நான் காணும் காட்சிகள்.
முன்பெல்லாம் காகங்களுக்கு மட்டும் தான் உணவளித்து
வந்தேன்.

மூன்று ஆண்டுகளுக்கு முன், ஒரு நாள், என் வீட்டு வாசலில்
ஒரு கிளி இறகில் அடிபட்டுக் கிடந்தது. அந்தக் கிளியை மீட்டு,
அடிபட்ட இடத்தில் மருந்திட்டு, உணவளித்துப் பராமரித்தேன்.
நான்கு நாட்களுக்குப் பின், சரியானதும், அந்தக் கிளி பறந்து
சென்று விட்டது.

அதற்கடுத்த இரண்டு நாட்கள், காகங்களுக்கு உணவளிக்கும்
போது, மூன்று கிளிகள் வீட்டைச் சுற்றி வந்தன.அதற்கடுத்த நாள்,
கிளிகளுக்கும் உணவு வைத்துப் பார்ப்போமே என்று, தனியே
உணவு வைத்தேன். மூன்று கிளிகளும் அந்த உணவை உண்டு,
உற்சாகத்தோடு திரும்பின.

அதற்கடுத்த ஒரு வாரத்திலேயே, கிளிகளின் வரத்து தொடர்ந்து
அதிகரித்தது. இரண்டு ஆண்டுகளுக்கு முன், புறாக்களும் வரத்
துவங்கியிருக்கின்றன. இப்போது மினி சரணாலயமாக மாறி
இருக்கிறது என் வீடு.

நான், வெளியூர் சென்றாலும், பறவைகளுக்கு ஒரு நாளும்
உணவளிக்காமல் இருந்ததில்லை. மாற்று ஏற்பாடு செய்து
விட்டுத் தான், எங்கும் செல்வேன்.

புயல், மழை என்று எதற்காகவும்
நிறுத்தியதே கிடையாது. என் குடும்பத்தினர் ஒத்துழைப்பு
இல்லாவிட்டால், இது சாத்தியமேயில்லை.

என்னைப் பார்த்து விட்டு, அக்கம்பக்கம் இருக்கும் பலரும்,
கிளிகளுக்கு உணவு வைக்கத் துவங்கியுள்ளனர்!

----
சொல்கிறார்கள் - தினமலர்