அன்வார், வான் அஜீசா தேவாலயத் தாக்குதல்களை கண்டிக்கின்றனர்

கிள்ளான் பள்ளத்தாக்கில் மூன்று தேவாலயங்கள் மீது நடத்தப்பட்டுள்ள தீக்குண்டுத் தாக்குதல்களை எதிர்க்கட்சித் தலைவர் அன்வார் இப்ராஹிம் கடுமையாகக் கண்டித்திருக்கிறார்.

“அவை வெறுக்கத்தக்க நடவடிக்கைகள். அனைத்து வழிபாட்டு மையங்களையும் மதிக்குமாறு ஒவ்வொருவரையும் இஸ்லாம் தெளிவாகக் கேட்டுக் கொள்கிறது”, என்று அவர் ஓர் அறிக்கையில் கூறினார்.

கடந்த 12 மணி நேரத்தில் மூன்று தேவாலயங்களில் மேற்கொள்ளப்பட்ட தாக்குதலில் நல்ல வேளையாக உயிரிழப்பு ஏதும் இல்லை என்றும் அவர் சொன்னார்.

“அனைவரும் அமைதியாக இருப்பதோடு வெறுப்பைத் தரும் அத்தகைய நடவடிக்கைகளில் ஈடுபடக் கூடாது என்றும் நான் கேட்டுக் கொள்கிறேன்”, என்றார் அவர்.

எஞ்சியுள்ள எந்தப் பூசலும் சுமூகமாக தீர்க்கப்படும் என்றும் நம்பிக்கை தெரிவித்தார்.

கோலாலம்பூர் தேசா மெலாவத்தியில் உள்ள மெட்ரோ டபர்னெக்கல் தேவாலயம், பெட்டாலிங் ஜெயா ஜாலான் டெம்ப்ளரில் உள்ள அஷம்ப்சன் தேவாலயம் , பெட்டாலிங் ஜெயாவில் உள்ள லைப் சாப்பெல் ஆகியவை மீது மேற்கொள்ளப்பட்ட தீ வைப்புச் சம்பவங்கள் பற்றி அன்வார் கருத்துரைத்தார்.

அந்த சம்பவங்கள் மீது போலீசார் விசாரணையைத் தொடங்கியுள்ளனர்.

அந்த மூன்று தேவாலயங்களில் மெட்ரோ டபர்னெக்கல் தேவாலயத்திற்கு கடுமையான சேதம் ஏற்பட்டுள்ளது. சேத மதிப்பு 1.5 மில்லியன் ரிங்கிட் முதல் 2 மில்லியன் ரிங்கிட் வரை இருக்கலாம் என்று மதிப்பிடப்பட்டுள்ளது.

மற்ற இரண்டு தேவாலயங்கள் மீது வீசப்பட்ட தீக்குண்டுகள் வெடிக்காததால் அதிகச் சேதம் இல்லை.

இதுவரை அந்தச் சம்பவங்களுக்கு யாரும் பொறுப்பேற்கவில்லை. என்றாலும் கத்தோலிக்க சஞ்சிகை ஒன்று “அல்லாஹ்” என்ற சொல்லைப் பயன்படுத்துவதற்கு உயர் நீதிமன்றம் அனுமதி வழங்கியதின் தொடர்பிலான கோபம் அந்தத் தாக்குதல்களுக்குக் காரணமாக இருக்கலாம் என்று நம்பப்படுகிறது.

அந்தத் தாக்குதல்கள் குறித்து பிகேஆர் கட்சி அதிர்ச்சியும் வருத்தமும் அடைந்திருப்பதாக அதன் தலைவி வான் அஜீசா வான் இஸ்மாயில் கூறினார்.

“நமது நாட்டின் இணக்கமான உறவுகளைப் பாதிக்கக் கூடிய அந்த பொறுப்பற்ற வன்முறைச் சம்பவத்தை நாங்கள் வன்மையாக கண்டிக்கிறோம்”, என்றும் அவர் சொன்னார்.

“அல்லாஹ்” என்ற சொல்லை முஸ்லிம் அல்லாதார் பயன்படுத்துவது மீதான தகராறு சமயம் சம்பந்தப்பட்ட விஷயம் என்பதால் மற்ற சமயங்கள் மீதான சகிப்புத் தன்மையை வலியுறுத்தும் சமயப் போதனைகளுக்கு நாம் செவிசாய்க்க வேண்டும் என்றும் அவர் வலியுறுத்தினார்.