சூன்யமாகும் எதிர்காலம்: அச்சத்தில் அமெரிக்க வாழ் இந்தியர்கள்; 30 சதவீத பேருக்கு பொருளாதார பாதிப்பு

வாஷிங்டன்:
உலகையே உலுக்கிக் கொண்டிருக்கும் கெரோனா வைரசுக்கு,
அதிகம் பாதிக்கப்பட்ட நாடுகளில் அமெரிக்கா முதலிடம் வகிக்கிறது.
இந்நாட்டில் 25 லட்சம் பேருக்கும் மேல் வைரசால் பாதித்துள்ளனர்.
1.25 லட்சம் பேர் பலியாகி இருக்கின்றனர்.

அமெரிக்காவின் மொத்த மக்கள் தொகை 33 கோடி. இங்கு பல்வேறு
நாடுகளை சேர்ந்தவர்கள் நிரந்தரமாகவும், தற்காலிகமாகவும்
வசிக்கின்றனர். இந்நாட்டில் 29 லட்சம் இந்தியர்கள் வசிப்பதாக சமீபத்தில்
புள்ளி விவரங்கள் கூறுகின்றன.

இந்நிலையில், கொரோனா பெருந்தொற்றால் ஏற்பட்ட பொருளாதார
பாதிப்புகள் காரணமாக அமெரிக்காவில் 3.30 கோடி பேருக்கு வேலை பறி
போயுள்ளது. இதில், இந்தியர்களும் அடங்குவர். மேலும், கொரோனாவின்
பாதிப்பால் இங்கு வசிக்கும் இந்தியர்களுக்கு எதிர்காலம் பற்றிய அச்சம்
பெரியளவில் ஏற்பட்டுள்ளது.

இந்நாட்டில், ‘இந்தியா மற்றும் அமெரிக்க வாழ் இந்தியர்கள் ஆய்வு
அறக்கட்டளை’ என்ற அமைப்பு செயல்படுகிறது. இது, கொரோனாவின்
தாக்குதலால் அமெரிக்க வாழ் இந்தியர்களிடம் ஏற்பட்டுள்ள பொருளாதார
பாதிப்பு, அவர்களின் மனநிலை குறித்து சமீபத்தில் ஒரு ஆய்வு நடத்தியுள்ளது.

அதன் முடிவுகள் அதிர்ச்சி அளிப்பதாக அமைந்துள்ளது.
இந்த ஆய்வறிக்கையின் முடிவுகள் வருமாறு:

* கொரோனா காரணமாக அமெரிக்காவில் வாழும் இந்தியர்களில்
5ல் 2 பேருக்கு எதிர்காலம் பற்றிய கவலை அதிகம் வாட்டி எடுக்கிறது.
தங்களின் வேலை, எதிர்கால நிதி நிலவரம், குழந்தைகளின் படிப்பு
போன்றவை அவர்களுக்கு அச்சத்தை ஏற்படுத்தி இருக்கிறது.

* 30 சதவீத இந்தியர்களுக்கு பணப் பிரச்னையும், வேலை இழப்பு பிரச்னையும்
ஏற்பட்டு இருக்கிறது.

* ஆறு பேரில் ஒருவருக்கு கொரோனா தொற்று உறுதியாகி இருக்கிறது
அல்லது அவர்களுக்கு தெரிந்த குடும்ப உறுப்பினர்களுக்கு வைரஸ் பாதித்துள்ளது.

* ஒரு சில இந்தியர்களுக்கு மட்டுமே குடியுரிமை பிரச்னை ஏற்பட்டு இருக்கிறது.

* நான்கில் ஒருவருக்கு மன அழுத்தமும், எதிர்காலம் பற்றிய அவநம்பிக்கையும்
ஏற்பட்டுள்ளது. - அமெரிக்க வாழ் இந்தியர்களிடம் இந்த அமைப்பு இதுபோன்ற
ஒரு ஆய்வை நடத்தி இருப்பது இதுவே முதல் முறை.

* வாழ்க்கை முறையை மாற்றினர்

‘கொரோனாவால் ஏற்பட்ட பொருளாதார பாதிப்பு காரணமாக,
அமெரிக்க வாழ் இந்தியர்களில் பெரும்பாலானோர் தங்களுடைய
வாழ்க்கை முறையை மாற்றிக் கொண்டுள்ளனர். ஆடம்பர செலவுகளை
குறைத்து, சிக்கனத்தை கடைப்பிடிக்கின்றனர்,’ என்றும் ஆய்வில் தெரிய
வந்துள்ளது.

தினகரன்