கோவில்பட்டி கிளைச் சிறையில் உயிரிழந்த இருவருக்கு தலா ரூ.10 லட்சம் நிதி, குடும்பத்தில் ஒருவருக்கு அரசு வேலை வழங்கப்படும் : முதல்வர் பழனிசாமி உத்தரவு

சென்னை :
சாத்தான்குளம் வியாபாரிகள் குடும்பத்திற்கு தலா ரூ.10 லட்சம்
நிவாரண நிதி மற்றும் குடும்பத்தில் ஒருவருக்கு அரசு வேலை
வழங்கப்படும் என்று தமிழக முதல்வர் பழனிசாமி தெரிவித்துள்ளார்.

கோவில்பட்டி சிறையில் தந்தை, மகன் உயிரிழப்பு

தூத்துக்குடி மாவட்டம் கோவில்பட்டியில் உள்ள கிளைச் சிறையில்
விசாரணைக் கைதிகளாக இருந்த சாத்தான்குளத்தை சேர்ந்த
ஜெயராஜ் மற்றும் அவரது மகன் பென்னிக்ஸ் இருவரும் அடுத்தடுத்து
மரணம் அடைந்த சம்பவம் தமிழகத்தையே உலுக்கி உள்ளது.

ஊரடங்கு விதிகளை மீறி கடையை திறந்து வைத்தாக கூறி அவர்களை
கைது செய்த சாத்தான்குளம் போலீசார், காவல் நிலையத்தில் வைத்து
கடுமையாக தாக்கியதில் பலத்த காயம் ஏற்பட்டு அவர்கள் மரணம்
அடைந்ததாகவும், போலீசார் மீது நடவடிக்கை எடுக்க கோரியும் போராட்டம்
நடைபெற்று வருகிறது.

தலா ரூ.10 லட்சம் நிதி, குடும்பத்தில் ஒருவருக்கு அரசு வேலை

இந்நிலையில் செய்தியாளர்களுக்கு பேட்டி அளித்த முதல்வர் பழனிசாமி,
கோவில்பட்டி சிறையில் உயிரிழந்த ஜெயராஜ் மற்றும் பென்னிக்ஸ்
குடும்பத்திற்கு தனது ஆழ்ந்த இரங்கலை தெரிவித்துக் கொண்டார்.

சாத்தான்குளம் காவல் நிலைய உதவி ஆய்வாளர்கள் இருவர் மற்றும்
தலைமைக் காவலர்கள் இருவர் ஏற்கனவே பணியிடை நீக்கம் செய்யப்
பட்டதை செய்தியாளர்கள் சந்திப்பில் குறிப்பிட்ட அவர், காவல் ஆய்வாளர்
ஸ்ரீதர் காத்திருப்போர் பட்டியலில்வைக்கப்பட்டுள்ளதாகவும் கூறியுள்ளார்.

அத்துடன், மாஜிஸ்திரேட் விசாரணையின் அடிப்படையில் இருவர்
மரணத்திற்கு காரணமாக யார் இருந்தாலும் சட்டப்படி நடவடிக்கை
எடுக்கப்படும் என்பதையும் உறுதிப்பட தெரிவித்தார்.

அத்துடன் சாத்தான்குளம் வியாபாரிகள் குடும்பத்திற்கு தலா ரூ.10 லட்சம்
நிவாரண நிதி மற்றும் குடும்பத்தில் ஒருவருக்கு அரசு வேலை வழங்கப்படும்
என்றும் முதல்வர் பழனிசாமி அறிவித்துள்ளது குறிப்பிடத்தக்கது.

தினகரன்

லட்சங்கள் கொடுத்தால் உயிர் மீண்டு வருமா?