வேகமாக காலியாகும் சென்னை குடியிருப்புகள்; வாடகை குறைந்தது: 'லீசு'க்கு திடீர் மவுசு

-
கொரோனா தாக்கம் காரணமாக, சென்னை, புறநகரில்,
ஏராளமான கடை, வீடுகள் காலியாகி வருகின்றன.
இதனால், வாடகை குறைக்கப்பட்டு வருகிறது.

வீடுகளை, ஆண்டு ஒப்பந்த அடிப்படையில், குத்தகைக்கு
விடுவதும் அதிகரித்து வருகிறது.

பாதிப்பு குறையவில்லை

சென்னையில், வீடு, கடைகளுக்கான வாடகை, 'அட்வான்ஸ்'
உள்ளிட்டவை, கடந்த சில ஆண்டுகளாக கணிசமான அளவு
உயர்ந்து வந்தது.

மேலும், வாடகை தாரர்களுக்கு பல்வேறு கட்டுப்பாடும்
விதிக்கப்பட்டது. கொரோனா பரவாமல் தவிர்க்கும் வகையில்,
மார்ச், 23ம் தேதி முதல், ஊரடங்கு பிறப்பிக்கப்பட்டது.

இதனால், அனைத்து தொழில்களும், இரண்டு மாதங்களுக்கு
மேலாக முடங்கின. சிறு, குறுந்தொழில் புரிய கடை எடுத்தவர்கள்,
வாடகை கொடுக்க முடியாமல் தவித்தனர்.

தற்போது, சென்னை புறநகரில், கொரோனா பாதிப்பு குறையாமல்
அதிகரித்து வருகிறது.அடுத்த, மூன்று மாதங்களுக்கு சகஜ
நிலைக்கு திரும்பாது என்பதை உணர்ந்து, பலர் வாடகைக்கு
எடுத்த கடைகளை, காலி செய்து வருகின்றனர்.

அதேபோல, சொந்த ஊர் திரும்பும் பலர், வீடுகளை காலி செய்து
வருகின்றனர். இதனால், சென்னை புறநகரில் ஏராளமான கடைகள்,
வீடுகள் காலியாகி வருகின்றன.

தென் சென்னையில் உள்ள பல, ஐ.டி., நிறுவனங்கள், தங்கள்
ஊழியர்களை வீட்டில் இருந்தபடி பணிபுரிய வசதி செய்து
கொடுத்துள்ளன. இதனால், பல லட்சம் ரூபாய் மதிப்புகள் வாடகை
கட்டடங்கள், காலியாகி வருகின்றன.

அட்வான்ஸ் தொகை

இவ்வாறு காலியாகும் பிரம்மாண்ட கட்டடங்கள், கடைகள் மற்றும்
வீடுகளில், தற்போதைய நிலையில், யாரும் வாடகைக்கு வரமாட்டர்.
இதனால், தங்கள் வாடகை, அட்வான்ஸ் தொகையை, கணிசமான
அளவு குறைத்து வருகின்றனர் உரிமையாளர்கள்.

தொழில் முதலீட்டுக்கு வசதியாக, பலர், தங்கள் வீடு, கடைகளை,
'லீசு'க்கு விடுவதில் ஆர்வம் காட்டி வருகின்றனர். இதனால், அடுத்த
சில மாதங்களில், கணிசமான கடைகள், வீடுகள் காலியாகும்
என்பதால், மேலும், வாடகை குறைய வாய்ப்பு உள்ளது என,
பொருளாதார நிபுணர்கள் கருத்து தெரிவித்து உள்ளனர்.

தினமலர்