மானபங்கம் செய்தால் ஐந்தாண்டு சிறை புதிய சட்டம் விரைவில் அமலாகிறது

புதுடில்லி:பெண்களை
பலாத்காரம் செய்பவர்களுக்கு ஜாமீனில் வெளிவர முடியாத படி ஐந்தாண்டு சிறை
தண்டனை அளிக்கும் சட்டத்தை கொண்டு வருவதற்கு, மத்திய அரசு நடவடிக்கை
மேற்கொண்டுள்ளது.அரியானாவில் முன்னாள் போலீஸ் அதிகாரி ரத்தோர், இளம் பெண்
ருச்சிகாவை மானபங்கபடுத்தியதால் அவர் தற்கொலை செய்து கொண்டார்.


இந்த
வழக்கு தொடர்பாக, ரத்தோருக்கு ஆறுமாத சிறை தண்டனை மட்டுமே அளிக்கப்பட்டது.
இதை எதிர்த்து, பலர் குரல் எழுப்பியதன் விளைவாக ரத்தோரின் போலீஸ் விருது
பதக்கம் பறிமுதல் செய்யப்பட்டு, அவர் மீது கடும் நடவடிக்கை எடுக்க
முயற்சிகள் மேற்கொள்ளப்பட்டு வருகின்றன.


இந்த
விவகாரத்தை தொடர்ந்து, மானபங்கம் செய்வோருக்கு ஐந்தாண்டு கடுங்காவல் சிறை
தண்டனை அளிக்க வழிவகுக்கும் சட்டதிருத்தத்தை மத்திய சட்டத்துறை அமைச்சகம்
உருவாக்கியுள்ளது. ஜாமீனில் வெளி வரமுடியாத இந்த சட்ட திருத்தத்துக்கு,
உள்துறை அமைச்சகத்தின் ஒப்புதல் கோரப்பட்டுள்ளது.


உள்துறை
அமைச்சகத்தின் ஒப்புதல் கிடைத்ததும், மானபங்கத்தால் பாதிக்கப்பட்ட பெண்
புகார் கொடுத்ததும், குற்றத்தின் தன்மைக்கு ஏற்ப இரண்டு முதல்
ஐந்தாண்டுகள் வரை ஜாமீனில் வெளிவர முடியாத தண்டனை அளிக்கும் சட்டம்
உடனடியாக அமலாகும். இது போன்ற கடுமையான சட்டங்களால் தான் கற்பழிப்புக்கு
ஈடான மானபங்க குற்றங்களை தடுக்க முடியும்' என, சட்டத்துறை அமைச்சர் வீரப்ப
மொய்லி தெரிவித்துள்ளார்.

தற்போது
மானபங்கம் என்பது 354 பிரிவு சட்டத்தின் படி குற்றமாக கருதப்படுகிறது.
இருப்பினும், இந்த குற்றத்தை செய்தவர் ஜாமீனில் வெளிவர வழி உள்ளது.
தற்போதுள்ள நடைமுறைப்படி இந்த குற்றத்துக்கு அதிகபட்சமாக இரண்டு ஆண்டு
மட்டுமே தண்டனை அளிக்க முடியும். விரைவில் இந்த நடைமுறை மாற்றப்பட உள்ளது.