கொரோனா தாக்கம்: உலக ஏழைகளில் 5ல் ஒருவர் இந்தியர்

**ayyasamy ram** · **ayyasamy ram** Thu May 28, 2020 7:29 pm

-
புதுடில்லி:
மிகவும் ஏழை மக்களைக் கொண்ட நாடு என்ற நிலையிலிருந்து இந்தியா,
குறிப்பிடத்தக்க முன்னேற்றம் அடைந்து வருவதாக உலக வங்கி அறிக்கை
முன்னர் பாராட்டியிருந்த நிலையில், கொரோனா வைரஸால் போடப்பட்ட
2 மாத ஊரடங்கு அத்திட்டத்தை சின்னாபின்னமாக்கியுள்ளது புள்ளி
விவரங்கள் வாயிலாக தெரிகிறது.

இந்தியாவில் ஏப்ரல் வரை கட்டுப்பாட்டுக்குள் இருந்த கொரோனா வைரஸ்
எண்ணிக்கை, மே 4 முதல் பல்கி பெருக தொடங்கிவிட்டது. தற்போது
1.5 லட்சத்துக்கும் மேற்பட்ட கொரோனா தொற்றுகளுடன் ஆசியாவின்
ஹாட்ஸ்பாட்டாக இந்தியா மாறியுள்ளது.

இந்த நிலையில் தொற்றுநோய் ஏற்படுத்தியிருக்கும் பொருளாதார அழிவின்
நேரடி விளைவாக 1.2 கோடி இந்திய மக்கள் தீவிர வறுமையில் தள்ளப்படுவார்கள்.
அதவாது உலக ஏழைகளில் 5-ல் ஒருவர் இந்தியாவில் இருப்பார்கள் என உலக
வங்கியின் புள்ளிவிவரங்கள் கூறுகின்றன. இவர்கள் ஒரு நாளைக்கு சராசரியாக
140 ரூபாய்க்கும் குறைவாக வருவாய் ஈட்டுபவர்கள் ஆவர்.

வைரஸை விட பசி இறப்பு அதிகரிக்கும்

வைரஸ் தாக்கத்திற்கு முன்பே கடந்த பத்தாண்டுகளாக இந்தியாவின் பொருளாதாரம்
மிக மெதுவான வேகத்தில் வளர்ந்து கொண்டிருந்தது. மார்ச் 25-ம் தேதி முதல் நடை
முறைக்கு வந்த ஊரடங்கு, அந்த வளர்ச்சியையும் தட்டி மூடிவிட்டது.

கடந்த
நாற்பதாண்டுகளில் முதல் முறையாக இந்த ஆண்டு பொருளாதாரம் முழுவதும்
சுருங்கிப்போகும் என துறை வல்லுநர்கள் கணித்துள்ளனர். இந்திய பொருளாதார
கண்காணிப்பு மையத்தின் மதிப்பீடுகளின்படி, கடந்த மாதத்தில் மட்டும் சுமார்
12.2 கோடி இந்தியர்கள் வேலையிலிருந்து வெளியேற்றப்பட்டுள்ளனர். அவர்களில்
பெரும்பாலானோர் தின கூலித் தொழிலாளர்கள் மற்றும் சிறு தொழில்களில்
பணியாற்றும் நபர்கள்.

“வறுமையைத் தணிக்க பல ஆண்டுகளாக எடுக்கப்பட்டு வந்த இந்திய
அரசாங்கத்தின் பெரும்பாலான முயற்சிகள் ஒரு சில மாதங்களில் தலைகீழாகிவிடும்.
ஊரடங்கினால் ஏற்பட்ட வீழ்ச்சி குறிப்பிடத்தக்க அரசியல் அபாயத்தைக் பிரதமர்
மோடிக்கு ஏற்படுத்தும். வைரஸை விட அதிகமான மக்கள் பசியால் இறக்கக்கூடும்.”
என்று சமூக ஆய்வாளர்கள் கூறுகின்றனர்.

உதவியின்றி உயிர் வாழ முடியாது

27 இந்திய மாநிலங்களில் சுமார் 5,800 வீடுகளில் ஆய்வு செய்து சேகரித்த வேலையின்மை
தரவுகளை, சிகாகோ பல்கலைக்கழகத்தின் பூத் ஸ்கூல் ஆஃப் பிசினஸ் பகுப்பாய்வு
செய்தது. அதன் மூலம் கிராமப்புறங்களில் மிகக் கடுமையான பாதிப்பு இருப்பதாக
ஆராய்ச்சியாளர்கள் கண்டறிந்தனர்.

மேலும் தொற்றுநோய் துயரங்களை விட ஊரடங்கினால் ஏற்பட்ட பொருளாதார துயரங்கள்
அதிகம். இதனால் உள்நாட்டில் 80% க்கும் மேற்பட்ட இந்திய குடும்பங்கள் வருமான
வீழ்ச்சியை அனுபவித்திருக்கிறார்கள். இவர்களில் பலருக்கு உதவி கிட்டாமல் போனால்
நீண்ட காலம் தாக்குப்பிடிக்க மாட்டார்கள் என்று அறிக்கையில் எச்சரித்துள்ளனர்.

தினமலர்

கொரோனா தாக்கம்: உலக ஏழைகளில் 5ல் ஒருவர் இந்தியர்

கொரோனா தாக்கம்: உலக ஏழைகளில் 5ல் ஒருவர் இந்தியர்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக