நைட்டி, லுங்கி, பனியனுக்கு வந்தது வாழ்வு: கடை கடையாய் அலைந்து மக்கள் சோர்வு

-

-
சென்னை:

ஏறக்குறைய 50 நாளுக்கு மேல ஆகிப்போச்சு. சாப்பிட்டு தூங்கி.
டிவி பார்த்து சலிச்சு போய் டயர்டாகி திரும்பத் திரும்ப
தூங்குறதுக்கு எதுக்கு விதவிதமா டிரஸ் போடணும்னு,
வீட்டுக்குள்ளயே முடங்கி கிடந்த எல்லோரும் நைட்டி, லுங்கி,
ஷார்ட்ஸ்சுக்கு மாறிட்டாங்க.

ஆபீஸ், கோயில், ஷாப்பிங், பீச், பார்க், சினிமா தியேட்டருக்கு
எல்லாம் போக முடியல. இங்கே எல்லாம் அணிந்து போய்
அழகு காட்ட வேண்டிய டிரஸ் எல்லாம் பீரோவுலயே மடிப்புக்
கலையாம இருக்கு.

அதனால, இந்த லாக் டவுன்ல வீட்ல இருக்கிற ஆண்களுக்கு
லுங்கி, ஷார்ட்ஸ் மற்றும் பனியன்களும், பெண்களுக்கு
நைட்டியும்தான் பிரதான உடை. வாண்டுகளுக்கு உள்ளாடை
போடறதே ரொம்ப ஜாஸ்தி. பெரும்பாலும் அரை கால்சட்டை
தான்.

போட்ட நைட்டி, பனியன், லுங்கியை திரும்பத்திரும்ப பயன்
படுத்தியதால், நைந்து போய் விட்டன. வீட்டில் ரிலாக்சாக
அணிய மாற்று உடைக்கு வழியில்லை. ஏற்கனவே, கோடை
காலத்தில் காட்டன் உடைகளுக்கு மவுசு அதிகம் இருக்கும்.

இந்த ஆண்டு வெயில் வழக்கத்தை விட அதிகமாக
சுட்டெரிப்பதால், காட்டன் ஆடைகளுக்கு, நைட்டி, லுங்கி,
ஷார்ட்ஸ், பனியன் போன்றவற்றுக்கு தேவை அதிகரித்துள்ளது.

இந்த நேரத்தில், இருப்பதும் நைந்து போனதுதான் மக்களுக்கு
பெரிய கவலையாக உள்ளது.முழு ஊரடங்கு இருந்த
போதெல்லாம் மளிகை, காய்கறிக்கு அலைந்தவர்கள்,
இப்போது ஊரடங்கு கொஞ்சமாக தளர்த்தப்பட்டதும்.

நைட்டி, லுங்கி, பனியன்களை தேடி அலைய ஆரம்பித்து
விட்டார்கள். இவற்றை அதிகமாக ஸ்டாக் வைத்திருக்கும்
பெரிய ஜவுளிக் கடைகள் திறக்கப்படவில்லை.

சிறிய கடைகளில் இருந்த கொஞ்சம் ஸ்டாக்கும், தீர்ந்து
போய்விட்டது. அப்படியே இருந்தாலும் சைஸ் கிடைக்கல.
அதுவும் சிவப்பு மண்டல பகுதியில் வசிப்பவர்களுக்கு வந்த
சோகம் என்ன வென்றால், அங்கு சிறிய ஜவுளி கடைகளுக்கு
கூட அனுமதி கிடையாது.

வடசென்னையில் கூட பெரும் பகுதிகள் இப்படி இருக்கின்றன.
பல சிவப்பு மண்டலங்களில் இதுதான் பெரிய பிரச்னை.

அதனால், சிவப்பு மண்டலமாக அறிவிக்கப்பட்ட பகுதிகளில்
கள்ளத்தனமாக தான் வியாபாரம் நடக்கிறது என்கிறார்கள்.

அட, டாஸ்மாக் கடை மூடிய பகுதியில் சரக்கு வேணும்னா
மறைந்து போய் கள்ளத்தனமாக வாங்கலாம். நைட்டி, லுங்கிக்கு
கூடவா இப்படி ஒரு கதி என்று நொந்து கொண்டே நைந்து போன
லுங்கிக்குள் மறைத்து வாங்கிச் செல்வதைப் பார்த்தால்
பாவமாகத்தான் இருக்கிறது.

இரவு உடைவளர்ந்த கதை
----------------

* 1838ல் வெளியான ஒர்க் வுமன் கையேட்டில், பல்வேறு
நைட்கவுன் பற்றிய குறிப்புகள் இடம்பெற்றுள்ளன.

* 18ம் நூற்றாண்டில் இந்தியாவில் அறிமுகம் ஆனாலும்,
ஆங்கிலேயப் பெண்கள் மட்டுமே இதை இரவு உடையாக
அணிந்தனர்.

* 1970களில், மேக்ஸி, காஃப்தான் போன்ற சவுகரியமான
உடைகள், பெண்களின் பகல் நேர உடைகளாக
அங்கீகரிக்கப்பட்டன.

* விக்டோரியா மகாராணி காலத்தில் அறிமுகமான இந்த
இரவு உடை, காலத்துக்கு ஏற்ப பல்வேறு வடிவங்களை
பெற்றுள்ளது.

* சினிமாவில், அன்பே வா படத்தில் சரோஜாதேவி நைட்டி
அணிந்திருந்தார். அந்தாஸ் இந்திப் படத்தில் நாஜி பெண்
நைட்டி அணிந்திருந்த காட்சிகள் இடம்பெற்றன.

* 1980ல் மும்பையில் குஜராத்தி பெண்கள் நைட்டி அணிய
தொடங்கினர்

* தற்போது வீட்டில் உள்ள பெரும்பாலான பெண்களுக்கு,
இரவில் மட்டுமின்றி, எப்போதும் அணியும் உடையாக
நைட்டி மாறிவிட்டது.

ரம்ஜான் ஷாப்பிங்

ரம்ஜான் தொடங்கியதுமே இஸ்லாமியர்களுக்கு ஷாப்பிங்
தொடங்கிவிடும். நோன்பு ஆரம்பித்து இவ்வளவு நாள் ஆகியும்,
ஷாப்பிங் போக வழியில்லை. இதனால், திறந்திருக்கும் சிறிய
கடைகளிலும், சாலையோர கடைகள் மற்றும் தள்ளுவண்டியில்
ஆடை விற்பனை செய்வோரிடமும் வாங்க வேண்டிய நிலை
ஏற்பட்டுள்ளது.
--
-தினகரன்