ராமன் எத்தனை ராமனடி...

படம்: லக்ஷ்மி கல்யாணம்
இசை: M.S.விஸ்வநாதன்
வரிகள்: கண்ணதாசன்
குரல்: P.சுசீலா
ராகம்: சுப பந்துவராளி
-
------------------------

ராமன் எத்தனை ராமனடி
ராமன் எத்தனை ராமனடி - அவன்
நல்லவர் வணங்கும் தேவனடி - தேவன்
(ராமன் எத்தனை ராமனடி)

கல்யாண கோலம் கொண்ட - கல்யாணராமன்
காதலிக்கு தெய்வம் அந்த - சீதாராமன்
அரசாள வந்த மன்னன் - ராஜாராமன்
அலங்கார ரூபம் அந்த - சுந்தரராமன்
(ராமன் எத்தனை ராமனடி)

தாயே என் தெய்வம் என்ற - கோசலராமன்
தந்தை மீது பாசம் கொண்ட - தசரதராமன்
வீரம் என்னும் வில்லை ஏந்தும் - கோதண்டராமன்
வெற்றி என்று போர் முடிக்கும் - ஸ்ரீஜெயராமன்
(ராமன் எத்தனை ராமனடி)

வம்சத்திற்கொருவன் - ரகுராமன்
மதங்களை இணைப்பவன் - சிவராமன்
மூர்த்திக்கு ஒருவன் - ஸ்ரீராமன்
முடிவில்லாதவன் - அனந்தராமன்

ராமஜெயம் ஸ்ரீராமஜெயம்
நம்பிய பேருக்கு ஏது பயம்
ராமஜெயம் ஸ்ரீராமஜெயம்
ராமனின் கைகளில் நான் அபயம்!!!
-

“ராமன் எத்தனை ராமனடி”

கண்ணதாசன் ஒரு தயாரிப்பாளர் இல்லத்திற்கு சென்றபோது அவர்கள் வீட்டில் உள்ள அனைவரும் ஜெயராமன், சிவராமன் என்று ஏதோ ஒரு ராமனின் பெயரையே கொண்டிருந்தது கண்டு வியந்தாராம்.

மேலும் இலக்கியத்தில், ராமன் சொன்னபடி சீதையை காட்டில் விட்டு விட்டு திரும்பிய லட்சுமணன், அரண்மனையில் ராமன் அழுது கொண்டிருப்பதைக் கண்டு ‘நீதானே அண்ணா காட்டில் விட சொன்னாய்?’ என்று கேட்க, அதற்கு ராமன் ‘காட்டில் விட சொன்னவன் ‘ராஜா ராமன்’ ஆனால் இப்போது அழுது கொண்டிருப்பவன் ‘சீதா ராமன்’ என்றாராம்.

மேற்சொன்ன இரண்டு விஷயங்களும், இப்பாடல் எழுத கவிஞருக்கு ஒரு தூண்டு கோலாக அமைந்தது என்று கூறுவார்கள்.

கவிஞரின் கற்பனை மற்றும் சொல்லாட்சியோடு சேர்ந்து மெல்லிசை மன்னரின் இசை ஆளுமையையும் இந்தப் பாடல் சொல்லும்.

அதாவது, மூன்றாவது சரணத்தில் சந்த நடை மாறி, கூட்டு ஆராதனை (பஜன்) பாடல் போல மெதுவாக ஒரு தாள கதியில் ஆரம்பித்து பின் படிப்படியாக அதன் தாள வேகம் அதிகரித்து பின் மீண்டும் தொடங்கிய கதிக்கே வரும்.

இவ்வாறு செய்வதன் நோக்கம், கூட்டு பிரார்த்தனையில் அதில் பங்குபெறும் அனைவரது கவனமும் குவியும்.

காட்சியில் ராம மந்திரத்தின் ஆதாரமான ‘ராம் ராம்’ என்பதனை முழுவீச்சில் பாடும்போது, முதலில் வெறுப்புடன் இருக்கும் C K சரஸ்வதி உட்பட அனைவரும் ராம மந்திரம் வரும் பொழுது தலையாட்டி பங்கு கொள்வதை காணலாம்.

‘ராமன் எத்தனை ராமனடி’ என்ற பல்லவியின் முதல் வரி இரண்டாவது முறை பாடும் பொழுது ‘எத்தனை’ என்ற வார்த்தையை, அந்த வார்த்தையின் பொருளை உணர்த்தும் விதமாக பாடும் விதம்…

‘ராமன்’ என்ற வார்த்தை முடிந்தவுடன் ஒரு Pause கொடுத்துவிட்டு ‘எத்தனை ராமனடி’ என்று பாடும் திறமை…

‘அரசாள’ என்ற வார்தையாகட்டும் ‘வீரமென்னும்’ என்ற வார்தையாகட்டும் அந்த வார்த்தையின் தொனி…

மெல்லிசை மன்னர் எதிர்பார்ப்புக்கும் மேலாக சுசீலாம்மா பாடியிருப்பார்.

இப்பாடலின் ராகம் சுப பந்துவராளி என்று கேள்வி.
இது போல இன்னொரு பாடலை உருவாக்கக் கவியரசர் மெல்லிசை மன்னர் கூட்டணியால்தான் முடியும்.
——————————–நன்றி
jayaseelan