ஒருவர் சிகிச்சையில் இருந்தாலும் சிவப்பு மண்டலமா?: பீகார் அரசு கேள்வி

by **ayyasamy ram** Thu May 07, 2020 11:40 am

பாட்னா:
ஒரே ஒரு கொரோனா நோயாளி மட்டுமே சிகிச்சையில்
இருக்கும் மாவட்டத்தை சிவப்பு மண்டலமாக எவ்வாறு
வகைப்படுத்தலாம் என மத்திய சுகாதாரத்துறை
அமைச்சகத்திடம் பீகார் அரசு கேள்வி எழுப்பியுள்ளது.

இந்தியாவில் வேகமாக பரவி வரும் கொரோனா வைரஸ்
பரவலை தடுக்க நாடு முழுவதும் 3வது கட்டமாக ஊரடங்கு
அமலில் உள்ளது. கடந்த வாரம் மத்திய அரசு சார்பில்,
பாதிப்பு எண்ணிக்கையை பொறுத்து பச்சை, ஆரஞ்சு,
சிவப்பு மண்டலங்களாக பிரிக்கப்பட்டு, அதற்கேற்றவாறு
சில தளர்வுகளையும் அறிவித்திருந்தது.

அதில், பீகாரின் கயா மாவட்டத்தை சிவப்பு மண்டலமாக
மத்திய அரசு வகைப்படுத்தப்பட்டிருந்தது. இதற்கான
விளக்கத்தை பீகார் அரசு, மத்திய சுகாதாரத்துறையிடம்
கோரியுள்ளது.

பீகாரில் இதுவரை 536 பேர் கொரோனாவால் பாதிக்கப்பட்டு,
4 பேர் உயிரிழந்துள்ளனர், 142 பேர் குணமடைந்து டிஸ்சார்ஜ்
ஆகியுள்ளனர்.

அங்குள்ள கயா மாவட்டத்தில் தற்போது ஒருவர் மட்டுமே
கொரோனாவுக்கு சிகிச்சை பெற்று வருகிறார். இது குறித்து
மாநில முதன்மை சுகாதார செயலர் சஞ்சய் குமார்
தெரிவித்துள்ளதாவது: கடந்த 11 நாட்களில், கயா மாவட்டத்தில்
கொரோனாவுக்கு புதிய வழக்குகள் எதுவும் பதிவாகவில்லை.

கடைசியாக ஏப்., 25 அன்று தான் பாதிப்பு பதிவாகியுள்ளது.
அம்மாவட்டத்தில் பாதிக்கப்பட்ட 6 பேரில் 5 பேர் குணமடைந்து
வீடு திரும்பியுள்ளனர். குணமடைந்தவர்கள் விகிதம் 83 சத
வீதமாக உள்ளது. தற்போது ஒருவர் மட்டுமே சிகிச்சையில்
உள்ள அம்மாவட்டத்தை சிவப்பு மண்டலமாக எவ்வாறு
வகைப்படுத்தலாம் என மத்திய சுகாதாரத்துறை
அமைச்சகத்திடம் பீகார் அரசு கேள்வி எழுப்பியுள்ளது.

இவ்வாறு அவர் தெரிவித்தார்.

தினமலர்