டிரம்ப் நிகழ்ச்சிக்கு ரூ.100 கோடி செலவு: புலம்பெயர் தொழிலாளர்களுக்கு செலவிடமுடியாதா? - மத்திய அரசுக்கு பிரியங்கா காந்தி கேள்வி

**ayyasamy ram** · **ayyasamy ram** Mon May 04, 2020 7:30 pm

புதுடெல்லி,

கொரோனா வைரஸ் பரவலை தொடர்ந்து மார்ச் 24ம் தேதி நாடு முழுவதும் ஊரடங்கு
அமல்படுத்தப்பட்டது. தமிழகம், ஆந்திரா, தெலுங்கானா, மராட்டியம் உள்ளிட்ட பல்வேறு
மாநிலங்களில் கட்டிட வேலை உள்ளிட்ட பணிகளை செய்து வந்த புலம்பெயர்
தொழிலாளர்கள் தங்கள் சொந்த ஊர்களுக்கு திரும்ப முடியாமல் தவித்தனர்.

இதேபோல் வெளிமாநிலங்களில் தங்கி படிக்கும் மாணவர்கள், மற்றும் சுற்றுலா சென்று
இருந்தவர்களும் தங்கள் ஊர்களுக்கு திரும்ப முடியவில்லை. தற்போது மீண்டும் ஊரடங்கு
வருகிற 17ம் தேதி வரை நீட்டிக்கப்பட்டு உள்ளது.
.
இந்த சூழலில் புலம்பெயர் தொழிலாளர்கள் சொந்த ஊர்திரும்ப மத்திய அரசு சிறப்பு
ரெயில்களை ஏற்பாடு செய்து உள்ளது. ஆனால் சில சிறப்பு ரெயில்களில்
தொழிலாளர்களிடம் கட்டணம் வசூலிப்பதாக கூறப்பட்டது. இதற்கு காங்கிரஸ் தலைவர்
சோனியாகாந்தி, காங்கிரஸ் எம்.பி ராகுல்காந்தி ஆகியோர் கடும் கண்டனம் தெரிவித்தனர்.
தொழிலாளர்களின் செலவை காங்கிரசே ஏற்கும் என கூறி இருந்தனர்.

இந்நிலையில் அமெரிக்க அதிபர் டிரம்ப்புக்காக ரூ.100 கோடி செலவிட்ட மத்திய அரசு,
புலம்பெயர் தொழிலாளர்களுக்காகச் செலவிட முடியாதா என்று காங்கிரஸ் பொதுச்
செயலாளர் பிரியங்கா காந்தி கேள்வி எழுப்பியுள்ளார்.

இதுகுறித்து பிரியங்கா காந்தி தனது டுவிட்டரில்,
“ குஜராத் வந்திருந்த அமெரிக்க அதிபரின் ‘நமஸ்தே டிரம்ப்’ நிகழ்ச்சிக்கு ரூ.100 கோடி
செலவிட முடியும். ரயில்வே அமைச்சகம் பிரதமர் கேர்ஸ் நிதிக்கு ரூ.151 கோடி நிதி
அளிக்க முடியும். அதேபோன்ற பங்களிப்பை வேதனையில் வாடும் புலம்பெயர்
தொழிலாளர்கள் பக்கம் மத்திய அரசு ஏன் அளிக்கவில்லை. அவர்களையும் இலவசமாக
ரயில்களில் சொந்த மாநிலம் அழைத்துச் செல்ல அனுமதிக்க முடியாதா?

வெளிநாடுகளில் வசிக்கும் இந்தியர்களை இலவசமாக விமானத்தில் அழைத்து
வருகிறீர்கள். ஆனால் உள்நாட்டில் புலம்பெயர் தொழிலாளர்களை சொந்த மாநிலத்துக்கு
அனுப்ப ரயில் டிக்கெட்டுக்கு கட்டணம் வசூலிக்கிறீர்கள். தேசத்தைக் கட்டமைப்பவர்கள்
தொழிலாளர்கள். ஆனால், அவர்களோ இங்கேயும், அங்கேயும் தடுமாற வேண்டிய
நிலைக்குத் தள்ளப்பட்டுள்ளனர். அதனால்தான் புலம்பெயர்ந்த தொழிலாளர்களைச்
சொந்த மாநிலம் அழைத்துச் செல்லும் ரயில் கட்டணத்தை காங்கிரஸ் செலுத்த முடிவு
செய்துள்ளது” என்று பதிவிட்டுள்ளார்.

இதனைத்தொடர்ந்து, மாநில அரசுகளின் வேண்டுகோளை ஏற்று சிறப்பு ரயில்கள்
இயக்கப்படுகின்றன என்றும், தற்போது நீட்டிக்கப்பட்டுள்ள ஊரடங்கால் சொந்த ஊர் திரும்பும்
தொழிலாளர்களுக்கான பயண கட்டணத்தில் ரயில்வே நிர்வாகம் 85 சதவீதமும்,
மாநில அரசு 15 சதவீதமும் செலுத்தும் என்று பா.ஜனதா விளக்கம் அளித்துள்ளது.

தினத்தந்தி

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக