சாலையில் கிடந்த 2,000 நோட்டை மருந்து தெளித்து எரித்த அதிகாரிகள்

ஊரடங்கால் வெறிச்சோடி கிடக்கும் சாலை.
அநாதையாக கிடந்த 2,000.
ஆனால், யாருமே அதை எடுக்கவில்லை.

தகவல் அறிந்து வந்த அதிகாரிகளும் அச்சத்தின் காரணமாக
தூரத்தில் இருந்து பல்வேறு கோணங்களில் குனிந்தும்,
நிமிர்ந்தும் பார்த்தனர்.

அவர்களுக்கும் அதை யார் இப்படி கல் வைத்து விட்டுச் சென்றது
என்று புரியவில்லை. விளைவு கிருமி நாசினி தெளித்து பின்னர்
காய வைத்து, மேல் அதிகாரிகளின் உத்தரவுப்படி அதை எரித்து விட்டனர்.

கொரோனா ஊரடங்கால் நாட்டில் என்னவெல்லாமோ நடந்து வருகிறது. குஜராத்தில் நடந்த சம்பவம், ரோட்டில் கிடந்த ரூபாய் நோட்டைக் கூட எடுத்து செல்ல மக்கள் கடும் அச்சமடைகின்றனர் என்பதை விளக்குகிறது.

குஜராத்தின் குட்டி நகரம் புனா.
இங்கு கடந்த 3 நாட்களுக்கு முன்பு சாலையில் ஒருவர் நடந்து சென்றுள்ளார். வழியில், சாலையில் நடுவில் ஒரு 2000 ரூபாய்
நோட்டு ஒன்று இருந்துள்ளது. அது பறக்காமல் இருக்க, அதன்
மீது கல் வைக்கப்பட்டிருந்தது.

யாராவது விளையாடுகிறார்களோ என்று சுற்றும், முற்றும் பார்த்துள்ளார். ஆனால், கண்ணுக்கு எட்டிய தூரம் வரையில்
ஆட்கள் யாரும் இல்லை. மீண்டும் ஒரு முறை ரூபாய் நோட்டை சுற்றிச்சுற்றி வந்து பார்த்துள்ளார்.

கொரோனா தொற்றியவர்கள் யாராவது வேண்டுமென்றே எச்சிலை துப்பி ரூபாய் நோட்டை சாலையில் வைத்து சென்றிருப்பார்களோ என்று அச்சம் அடைந்து அதை எடுக்கவே இல்லை.

இவர் சாலையில் எதையோ, சுற்றிச்சுற்றி வந்து பார்த்துக் கொண்டிருந்ததை பார்த்து, மேலும் சிலர் அங்கு கூடியுள்ளனர். அவர்களுக்கும் அதே எண்ணம்தான் தோன்றி உள்ளது.

எதற்கு வம்பு என்று நகராட்சி அதிகாரிகளுக்கு அவர்கள் தகவல் தெரிவித்தனர்.

ஜீப் போட்டுக் கொண்டு விரைந்து வந்தனர் அதிகாரிகள். வந்த நான்கு அதிகாரிகளும் ரூபாய் நோட்டை, நாலாபுறமும் சுற்றி வந்து பார்த்துள்ளனர். மண்டையை தீவிரமாக குடைந்து, யாராவது பதில் சொல்வார்களா என்று எதிர்பார்த்துள்ளனர்.

யாருக்குமே பதில் தெரியவில்லை. இதனால் அவர்கள் ஜீப்பில் இருந்த கிருமி நாசினியை கொண்டு வந்து, அந்த கல் முழுவதற்கும் அடித்துள்ளனர். அதன் பின்னர் ஒரு குச்சியால் கல்லை தள்ளிவிட்டு, அந்த ரூபாய் நோட்டுக்கும் கிருமி நாசினியை ஸ்பிரே செய்துள்ளனர்.
இப்போதும் அந்த நோட்டை எடுப்பதற்கும் அவர்களில் ஒருவரும் முன்வரவில்லை.

சரி என்று ஒரு அதிகாரி தனது மேலதிகாரிக்கு தகவல் தெரிவித்துள்ளார்.

‘‘சூப்பர் சார்...’’ என்று கூறிவிட்டு அதிகாரியின் போனை துண்டித்து அவர், தன்னிடம் அதிகாரி கூறிய அதிநவீன பார்முலாவை செயல்படுத்த ஆரம்பித்தார்.

அதாவது ரூபாய் நோட்டு பறந்து விடாமல், அதன் மீது ஏற்கனவே பயன்படுத்திய குச்சியை வைத்தவர், அடுத்த அதிகாரியிடம் தீப்பெட்டியை வாங்கி, நோட்டை கொளுத்தி விட்டார்.

முழுவதும் சாம்பலான பின்னர் அதிகாரிகள் அனைவரும் புறப்பட்டு போய்விட்டனர். இப்போது இந்த ரூபாய் நோட்டை சாலையில் கல்லை வைத்து போட்டுவிட்டு சென்றவர் யார் என்று போலீசார் அதிதீவிரமாக விசாரணை நடத்தி வருகின்றனர்.

கொரோனா பாதிப்பு... கோடை வெயிலின் தாக்கத்தை விட உச்சமாக இருக்கிறதா?

தினகரன்