இந்தியாவில் கொரோனாவுக்கு பலி எண்ணிக்கை 437 ஆக உயர்வு

புதுடெல்லி,

இந்தியாவில் கொரோனா வைரஸ் பரவல் தொடர்ந்து தீவிரமடைந்துள்ளது.
கொரோனா பரவலை கட்டுப்படுத்த கடந்த மார்ச் 24ந்தேதியில் இருந்து
அடுத்த 21 நாட்களுக்கு நாடு முழுவதும் ஊரடங்கு உத்தரவு பிறப்பிக்கப்பட்டது.
கடந்த 14ந்தேதி ஊரடங்கு முடிவுக்கு வந்த நிலையில், கொரோனாவின்
தீவிரம் குறையவில்லை.

இதனை தொடர்ந்து அடுத்த 19 நாட்களுக்கு ஊரடங்கு நீட்டிக்கப்பட்டது.
110 கோடிக்கும் மேற்பட்ட மக்கள்தொகை கொண்ட இந்தியாவில் பொதுமக்கள்
ஒத்துழைப்புடன் கொரோனா பரவல் பெருமளவில் கட்டுக்குள் கொண்டு
வரப்பட்டு உள்ளது. தொடர்ந்து சமூக இடைவெளியை கடைப்பிடிக்கும்படி
மக்களிடம் அறிவுறுத்தப்பட்டு வருகிறது.

இதுவரை இல்லாத வகையில் இந்தியாவில் கடந்த 15ந்தேதி 1,076 பேருக்கு
கொரோனா பாதிப்பு உறுதி செய்யப்பட்டது. மொத்த பாதிப்பில் 10 சதவீதத்திற்கும்
கூடுதலாக, ஒரே நாளில் பாதிப்பு எண்ணிக்கை உயர்ந்தது அதிர்ச்சி ஏற்படுத்தியது.
எனினும் அடுத்த நாள் இந்த விகிதம் குறைந்தது.

இந்தியாவில் கொரோனா பாதிப்பு எண்ணிக்கை 12,380 ஆகவும், பலி எண்ணிக்கை
414 ஆகவும் நேற்று உயர்ந்தது. 10,477 பேர் கண்காணிப்பில் வைக்கப்பட்டு உள்ளனர்.
1,489 பேர் சிகிச்சை முடிந்து வீடு திரும்பியுள்ளனர்.

இந்நிலையில், மத்திய சுகாதார மற்றும் குடும்பநல அமைச்சகம் இன்று
வெளியிட்டுள்ள தகவலில், இந்தியாவில் கொரோனா பாதிப்பு எண்ணிக்கை
13,387 ஆகவும், பலி எண்ணிக்கை 437 ஆகவும் உயர்ந்துள்ளது. 11,201 பேர்
கண்காணிப்பில் வைக்கப்பட்டு உள்ளனர். 1,748 பேர் சிகிச்சை முடிந்து வீடு
திரும்பியுள்ளனர் என தெரிவித்துள்ளது.

இதேபோன்று நாட்டில் அதிக அளவாக மராட்டியத்தில் 3,205 பேருக்கு
கொரோனா பாதிப்பு ஏற்பட்டு உள்ளது. 300 பேர் குணமடைந்து உள்ளனர்.
194 பேர் பலியாகி உள்ளனர்.

தினத்தந்தி