உ.பியில் சாலையில் கிடந்த ரூபாய் நோட்டு ; கொரோனா பரப்ப வீசியதாக பீதி

by **ayyasamy ram** Tue Apr 14, 2020 7:15 am

லக்னோ :
உ.பி மாநிலம் ரேபரேலியில் சாலையில் 500 மற்றும் 100 ரூபாய் நோட்டுகள்
வீசப்பட்டு கிடந்தது. கொரோனா அச்சத்தால் நோயை பரப்ப வீசப்பட்டதாகவும்
பீதி நிலவுகிறது.

கொரோனா வைரசின் தாக்கம் உலகின் பல நாடுகளையும் அச்சுறுத்தி வருகிறது.
இந்தியாவிலும் பாதிப்பு அதிகரித்து வருகிறது. உத்திர பிரதேச மாநிலத்தில்
ரேபரேலி மாவட்டத்தில் உள்ள சங்கேத் நகரில் கான்பூர் இணைப்பு சாலை பகுதியில்
ரூ.500 மற்றும் ரூ.100 நோட்டுகள் சாலையில் வீசப்பட்டு கிடந்ததாக கூறப்படுகிறது.

இதுகுறித்து போலீசாரிடம் தகவல் தெரிவிக்கப்பட்டது. ஏற்கனவே சில தினங்களுக்கு
முன்பு லக்னோவில் இது போன்று சாலையில் இரண்டு 500 ரூபாய் நோட்டுகள்
வீசப்பட்டு இருந்தன. இது பற்றியும் போலீசாருக்கு தகவல் தெரிவிக்கப்பட்டது.

அவ்வாறு கிடைத்த ரூபாய் நோட்டுகளை கைப்பற்றி போலீசார் தடயவியல்
நிபுணர்களின் உதவியுடன் அவற்றின் நம்பகத்தன்மையை சோதித்து வருகின்றனர்.

ரூபாய் நோட்டுகள் சாலையில் சிதறி கடந்தும் பலரும் எடுக்காமல் இருக்க காரணம்,
கொரோனா பயம்தான். சில நாட்களுக்கு முன் ரூபாய் நோட்டுகள் மூலமாகவும்
கொரோனா தொற்று பரவும். அவ்வாறு பணத்தின் மூலம் கொரோனாவை பரப்ப
சதிச்செயல்கள் செய்யப்பட்டு வருவதாகவும் சில தகவல்கள் உலா வருகின்றன.
இதனால் தான் போலீசாருக்கு தகவல் கொடுத்ததாக கூறப்படுகிறது.

தினமலர்