ஊரடங்கை தொடர முடிவு! தேதி பின்னர் அறிவிப்பு

சென்னை:
''தமிழகத்தில் ஊரடங்கை தொடர, அமைச்சரவை
கூட்டத்தில் முடிவு செய்யப்பட்டுள்ளது.

பிரதமர் முடிவை அறிந்த பின், தேதி அறிவிக்கப்படும்,''
என, தமிழக அரசின், தலைமை செயலர் சண்முகம்
தெரிவித்தார்.
-
பிரதமர் அறிவிக்கும் முடிவின் அடிப்படையில், தமிழக அரசு,
ஊரடங்கு முடிவை எடுக்கும். கொரோனா தொற்றுக்கான
, பி.சி.ஆர்., பரிசோதனை செய்ய, போதுமான உபகரணங்கள்
நம்மிடம் உள்ளன.

ஓரிரு நாட்களில், பரிசோதனை செய்ய வேண்டிய அனைவருக்கும்,
சோதனை நடத்தப்படும். அதன்பின், புதிதாக தொடர்புடைய
நபர்களை கண்டறிந்து, சோதனை செய்யப்படும்.
அப்போது, நோய் கட்டுக்குள் வரும் என, நம்புகிறோம்.

ஊரடங்கு நீட்டிக்கப்பட்டால், அடுத்து எடுக்க வேண்டிய முடிவுகளை,
முதல்வர் அறிவிப்பார். அரசு மருத்துவக்கல்லுாரிகள் அனைத்திலும்,
கொரோனா பரிசோதனை வசதிக்கு ஏற்பாடு செய்யும்படி, பிரதமர்
உத்தரவிட்டுள்ளார்.

மத்திய அரசு கூறுவதற்கு முன், 'ரேபிட் டெஸ்ட் கிட்' எனப்படும்,
உடனடி பரிசோதனை உபகரணம், ஒரு லட்சம் வாங்க, 'ஆர்டர்'
கொடுத்துள்ளோம்.

நான்கு நாட்களுக்கு முன், சீனாவில், இரண்டு லட்சம் வாங்க,
ஆர்டர் கொடுத்துள்ளோம். முதல் கட்டமாக, 50 ஆயிரம் வழங்க உறுதி
அளித்துள்ளனர். தனியார் மருத்துவமனையில், கட்டண விலக்கு அளித்தால்,
பரிசோதனையை தீவிரப்படுத்த முடியும் என, கூறியுள்ளனர்;
இதை, அரசு பரிசீலித்து வருகிறது.

மத்திய அரசு, நமக்கு வழங்க வேண்டிய நிதியை, முன்னதாக விடுவிக்க
கோரியுள்ளோம். 3.50 லட்சம் பேருக்கு, சிகிச்சை அளிப்பதற்கான
வசதிகளை ஏற்படுத்தி வருகிறோம். தேவையான மருந்துகள், போதுமான
அளவு இருப்பு உள்ளன. இவ்வாறு, அவர் கூறினார்.

கொரோனா பாதிப்பு 969 ஆக உயர்வு!

தமிழகத்தில், நேற்று, 58 பேருக்கு நோய் தொற்று இருப்பது உறுதியானது.
இதனால், பாதிக்கப்பட்டோர் எண்ணிக்கை, 969 ஆக உயர்ந்துள்ளது.
ஈரோட்டில், நேற்று ஒருவர் இறந்தார். அத்துடன் இறந்தவர் எண்ணிக்கை,
10 ஆக உயர்ந்துள்ளது. நேற்று நோய் உறுதிப்படுத்தப்பட்ட, 58 பேரில்,
நான்கு பேர், வெளிநாட்டில் இருந்துவந்தவர்கள்; மற்றவர்கள், அவர்களுடன்
தொடர்பில் இருந்தவர்கள்.

தினமலர்