இத்தாலி அதிர்ச்சி தகவல்... கரோனா நோய்த்தொற்றுக்கு 100 மருத்துவர்கள் பலி

by **ayyasamy ram** Fri Apr 10, 2020 2:40 pm

இத்தாலியில் கடந்த பிப்ரவரி மாதம் கரோனா நோய்த்தொற்று (கொவைட் -19) பரவத்தொடங்கியதில் இருந்து இதுவரை 100 மருத்துவர்கள் பலியானதாக அதிர்ச்சிகரமான தகவலை இத்தாலியின் முக்கிய மருத்துவர்கள் சங்கம் வியாழக்கிழமை தெரிவித்துள்ளது. மேலும் இத்தாலியில் கரோனாவுக்கு பாதிக்கப்பட்டவர்களில் 10 சதவீதம் பேர் சுகாதாரத்துறையில் பணியாற்றியவர்கள் என்று ஆய்வாளர்கள் தெரிவித்துள்ளனர்.

உலகையே அச்சுறுத்தி வரும் கரோனா நோய்த்தொற்றுக்கு உலக அளவில் தற்போது வரை 16 லட்சத்து 5 ஆயிரத்து 277 பேர் பாதிக்கப்பட்டுள்ளனர். 95,751 பேர் உயிரிழந்துள்ளனர். நோய்த்தொற்று பாதிப்பில் இருந்து 3 லட்சத்து 56 ஆயிரத்து 925 பேர் குணமடைந்துள்ளனர்.

உலக அளவில் நோய்த்தொற்று அதிகம் பலியான நாடுகளின் பட்டியலில் இத்தாலி முதலிடத்தில் உள்ளது. இத்தாலியில் நோய்த்தொற்றுக்கு இதுவரை 14 லட்சத்து 36 ஆயிரத்து 626 பேர் பாதிக்கப்பட்டுள்ளனர், 18,279 பேர் உயிரிழந்துள்ளனர். நோய்த்தொற்று பாதிப்பில் இருந்து 28 ஆயிரத்து 470 பேர் குணமடைந்துள்ளனர்.

இந்நிலையில், மேலும் அதிர்ச்சியான தகவல் வெளியாகி உள்ளது. கடந்த பிப்ரவரி மாதம் கரோனா நோய்த்தொற்று பரவத் தொடங்கியதில் இருந்து இதுவரை 100 மருத்துவர்கள் பலியாகி உள்ளதாகவும், இதில் ஓய்வுபெற்ற மருத்துவர்கள் அடங்குவர் என இத்தாலியின் முக்கிய மருத்துவர்கள் சங்கம் வியாழக்கிழமை தெரிவித்துள்ளது.

மேலும் 30 செவிலியர்கள் மற்றும் மருத்துவ உதவி பணியாளர்களும் பலியாகி உள்ளனர். இத்தாலியில் கரோனாவுக்கு பாதிக்கப்பட்டவர்களில் 10 சதவீதம் பேர் சுகாதாரத்துறையில் பணியாற்றியவர்கள் என்று ஆய்வாளர்கள் தெரிவித்துள்ளனர்.

நோய்த்தொற்றால் கடுமையாக பாதிக்கப்பட்டுள்ள ஐரோப்பிய நாடுகளில் இத்தாலி முதலிடத்தில் உள்ளது.

ஏப்ரல் 13 வரை நீட்டிக்கப்பட்டுள்ள ஊரடங்கு மற்றும் சமூக இடைவெளி நடவடிக்கைகளை எவ்வாறு, எப்போது எளிதாக்குவது என்பது குறித்து இத்தாலி அரசு ஆலோசனை நடத்தி வருகிறது.

தினமணி