– பிரிவிற்குப் பிறகான காலம் –

by **ayyasamy ram** Thu Apr 09, 2020 3:02 pm

அமைதியாக விலகிப் பிரிந்து
அவரவர் வேகலைளை
கவனிக்கலாமென
முன்கோபப் பொழுதொன்றில்
முந்திக்கொண்டு நான்தான்
முன்னறிவிப்புச் செய்தேன்
–
அதற்குப் பிறகு
என்னுடைய எந்த வேலையையும்
நான் கவனிக்கவில்லையெனினும்
உன்னுடைய எந்தெந்த வேலைகள்
நீ கவனித்திருப்பாயென்று
கண்டறிய முனைந்து முனைந்து
கறாராகக் கைவிட்டு விட்டேன்.
–
செல்பேசி புடைக்க நான்
சேமித்து வைத்திருந்த
உன் குறுஞ் செய்திகளை
மனம் சலித்ததொரு
மாலைப் பொழுதில்
குறி வைத்துக் குறிவைத்துக்
கொன்றொழித்துக் காலி செய்தேன்.
–
கண்ணில் படுவதும்
கைகளில் புழங்குவதுமாயிருந்த
உன் அன்பளிப்புகள் அனைத்தும்
பார்வையிலிருந்தும்
பயன்பாட்டிலிருந்தும்
அப்புறப் படுத்தப்பட்டுவிட்டன.
–
பரிகாசம்
செய்வது போல்
என்னைப் பார்த்துச்
சிரித்துக்கொண்டிருந்த
உன் பீங்கான் பொம்மையை கூட
மேசைக்கடியில்
கிடத்தப்பட்டுவிட்டது.
–
இப்போதெல்லாம்
எனக்குள் நீ இல்லையென்று
நொடிக்கொரு தரம்
நானாகவே முன்வந்து
தனிமையின் தருணங்களில்
தைரியமாகச் சொல்லிக்
கொள்கிறேன்
–
அன்றொரு நாள்
உன் பயணப் பேருந்து
நகரத் தொடங்கியதும்
ஜன்னலுக்கு வெளியே நீண்டு
நிதானமாக அசைந்தாடிய
உன் விரல்களுக்கு
விடையாக
யாரோ ஒரு குழந்தை
கையசைத்தபோது கூட
அசையாமல்
நின்றிருந்தேன் நான்.
–
இப்போது கூட…
–
நடைமேடைச் சீட்டு வாங்கி
எழும்பூர் ரயில் நிலையத்துக்குள்
நான் நுழைந்தது –
வைகை வண்டி போற
நடைமேடையில் நடந்தது
–
எஸ் 7 பெட்டியின் வாயிலில் நின்று
பயணிகள் பட்டியலில்
உன் பெயரைப் படித்தது – என
எல்லாமே எனக்கு
தற்செயலாக நிகழ்ந்துதான்.
–
பிறகு எதற்கு
அப்படிச் சிரிக்கிறாய் நீ
அந்தப் பக்கம் திரும்பிக்கொண்டு
–
=================================
>ஜெயபாஸ்கரன்
நன்றி: மல்லிகை மகள் – பிப்ரவரி,2012