`டவுட் கேட்ட சிறுமி, வீட்டுக்கே வந்த ஆசிரியர்’ - `டீச்சர் ஆஃப் தி இயர்’ என்று புகழ்ந்த நெட்டிசன்கள்

ஊரடங்கு உத்தரவு அமலில் உள்ள பல நாடுகளிலும்
அத்தியாவசியப் பொருள்களுக்காக செயல்படும்
கடைகளைத் தவிர மற்ற அனைத்தும் மூடப்பட்டுள்ளன.
கல்வி நிறுவனங்களும் மூடப்பட்டுள்ளன.

ஆனால், அமெரிக்காவில் உள்ள மேடிசன் எனும் பகுதியைச் சேர்ந்த
ஒரு சிறுமியின் கல்வியை இந்த ஊரடங்கு நிறுத்திவிடவில்லை எனலாம்.
அந்தச் சிறுமி வீட்டில் இருந்தபடி படித்து வந்துள்ளார். அவரால்,
கணிதப்பாடத்தில் வந்த ஒரு கணக்கை சரியாகப் புரிந்துகொள்ள
முடியவில்லை. எனவே, தனது கணித ஆசிரியருக்கு மின்னஞ்சல் மூலம்
குறுஞ்செய்தி ஒன்றை அனுப்பியுள்ளார்.

ஆசிரியர் மின்னஞ்சலில் பதிலளிக்காமல் நேரடியாக
அவருடையே வீட்டுக்கே சென்றுள்ளார். சமூக விலகல் கடைப்
பிடிக்க வேண்டும் என்ற விதி இருப்பதால் ஆசிரியர்
வித்தியாசமான முறையில் சிறுமியின் சந்தேகத்தை தீர்த்து
வைத்துள்ளார்.

வெள்ளைப் பலகையை சிறுமியின் வீட்டுக்கு முன்பு
வைத்துள்ளார். சிறுமி வீட்டின் வாயிலில் இருந்த கண்ணாடி
கதவுக்குப் பின்னால் நின்றுள்ளார். இப்படியான சூழலில்
சிறுமிக்கு கணிதப்பாடத்தை நடத்தியுள்ளார்.

சிறுமியின் தந்தையான ஜோஷ் ஆண்டர்சன் இந்தக் காட்சியை
புகைப்படத்துடன் ட்விட்டரில் பகிர்ந்துள்ளார். ``என் மகள் ஆறாம்
வகுப்பு படிக்கிறார். கணிதப்பாடத்தில் ஏற்பட்ட சந்தேகம் குறித்து
அவரது ஆசிரியருக்கு மின்னஞ்சல் அனுப்பினார். அவர் வீட்டுக்கே
வந்து பாடம் நடத்தியுள்ளார்” என்று கேப்ஷனில் எழுதியுள்ளார்.

கிறிஸ்வாபா என்று பெயருடைய அந்த ஆசிரியரையும் அந்தப்
பதிவில் டேக் செய்துள்ளார். இவரின் பதிவு நெட்டிசன்களை
அதிகமாகக் கவர்ந்துள்ளது.

``டீச்சர் ஆஃப் தி இயர், இப்படியான ஆசிரியர்கள் நிச்சயம்
பாராட்டுதலுக்கு உரியவர்கள், விலைமதிப்பற்ற ஆசிரியர்,
எவ்வளவு கிரியேட்டிவான ஆசிரியர்” போன்ற கமென்டுகளை
நெகிழ்ச்சியுடன் பதிவிட்டு வருகின்றனர்.
-
---------------------------------
ராம் சங்கர் ச
நன்றி-விகடன்