அமெரிக்க தடையை மீறி ஈரானுக்கு ஐரோப்பிய நாடுகள் உதவி

தெஹ்ரான்:
கடந்த, 2018ம் ஆண்டு, ஈரான் மீது அமெரிக்கா, பொருளாதாரத்
தடையை விதித்தது. ஏற்கனவே, பொருளாதாரத்தில்
பின்தங்கியிருந்த ஈரான், அமெரிக்கா விதித்த தடையால்
மிகவும் பாதிக்கப்பட்டது.

இந்நிலையில், ஆசிய நாடுகளில், சீனாவுக்கு அடுத்தபடியாக
கொரோனா வைரசால் அதிக பாதிப்பைச் சந்தித்துள்ள
நாடாக ஈரான் மாறியுள்ளது.

இதுவரை அங்கு, 3,000 பேர் உயிரிழந்துள்ளனர்.
47,593 பேர் கொரோனா தொற்றுக்குள்ளாகி போதுமான
மருத்துவச் சிகிச்சை கிடைக்காமல் தவித்து வருகின்றனர்.

ஈரான் அதிபர் ஹசன் ரூஹானி, 'போதுமான மருத்துவ
உபகரணங்கள் இன்றி, கொரோனாவால் பாதிக்கப்
பட்டவர்களுக்கு உரிய சிகிச்சை அளிக்க முடியவில்லை.
இருந்தும் அமெரிக்கா விதித்துள்ள தடையை மீறி,
கொரோனாவைச் சிறப்பாக எதிர்கொண்டு வருகிறோம்'
எனத் தெரிவித்திருந்தார்.

'தீய சிந்தனைகொண்ட எதிரி'

கடந்த பிப்., மாதம், கொரோனாவைக் கட்டுப்படுத்த ஈரானுக்கு
அமெரிக்கா உதவ முன்வந்தது. ஆனால், 'அமெரிக்காவிடமிருந்து
எந்த உதவியையும் பெற மாட்டோம். தடையை விதித்துவிட்டு
உதவி செய்வதாகக்கூறுவது விசித்திரமாகவுள்ளது.

அமெரிக்கா தீய சிந்தனைகொண்ட எதிரி' என, ஈரான் அரசு
தெரிவித்தது.

ஆனாலும், ஈரானிலிருந்து வரும் கொரோனா குறித்தான
தகவல்கள், அமெரிக்காவின் தடையையும் மீறி, உலக
நாடுகளை ஈரானுக்கு உதவிக்கரம் நீட்டச் செய்திருக்கின்றன.

அமெரிக்காவின் நட்பு நாடுகள்

அமெரிக்காவின் முக்கிய நட்பு நாடுகளின் பட்டியலில் முன்னணியில்
இருக்கும், ஐரோப்பிய நாடுகளான பிரிட்டன், ஜெர்மனி மற்றும்
பிரான்ஸ் மருந்துகள், மருத்துவ உபகரணங்களை ஈரானுக்கு
அனுப்பிவைத்துள்ளன.

அமெரிக்கத் தடையை மீறி, அமெரிக்காவின் நட்பு நாடுகள்
ஈரானுக்கு உதவிய விவகாரம், சர்வதேச அரசியலில், மிக
முக்கிய நிகழ்வாகக் கருதப்படுகிறது.

'அனைத்து நாடுகளும் பகையை மறந்து, ஒருவருக்கொருவர்
உதவி செய்தால் மட்டுமே, கொரோனா எனும் கொலைவெறி
பிடித்த வைரசை அழித்தொழிக்க முடியும்.

அந்த வகையில் ஈரானுக்கு ஐரோப்பிய நாடுகள் உதவியுள்ளது
பாராட்டுக்குரியது' என, பலரும் கருத்து தெரிவித்து வருகின்றனர்.

தினமலர்