மது போதைக்கு அடிமையாகி மீள முடியாத நபர்களுக்கு, 'ஆன்லைன்' மூலம் இலவசமாக மீட்பு உதவி

கோவை:
கொரோனா காரணமாக, 'டாஸ்மாக்' கடைகள் மூடப்பட்டுள்ளதால்,
மது போதைக்கு அடிமையாகி மீள முடியாத நபர்களுக்கு, 'ஆன்லைன்'
மூலம் இலவசமாக மீட்பு உதவி செய்யப்படுகிறது.

கொரோனா தொற்று பரவலை தடுக்கும் வகையில், நாடு முழுதும்,
21 நாள் ஊரடங்கு பிறப்பிக்கப்பட்டுள்ளது. கேரளாவில் மது கிடைக்காத
விரக்தியில், ஏழு பேர் தற்கொலை செய்துள்ளனர். தமிழகத்திலும்,
டாஸ்மாக் கடை மூடப்பட்டுள்ளதால், மது போதைக்கு அடிமையான
நபர்கள், மது கிடைக்காத விரக்தியில் உள்ளனர்.

இதுபோன்ற நபர்களுக்கு ஏற்படும் கை, கால் நடுக்கம், துாக்கமின்மை,
பதற்றம் போன்றவற்றில் இருந்து வெளிவர, மருத்துவர்களிடம் சிகிச்சை
பெறுவது அவசியம்.இவர்கள், மீண்டும் குடிப் பழக்கத்துக்கு திரும்பாமல்
இருக்க, 'ஆல்கஹாலிக்ஸ் அனானிமஸ்' - ஏ.ஏ., என்ற அமைப்பு உதவி
செய்கிறது.

இந்த அமைப்பைச் சேர்ந்த, கோவை நிர்வாகி ஒருவர் கூறியதாவது:

உலகளாவிய இந்த இயக்கம், 1935ம் ஆண்டில் இருந்து தொடர்ந்து
இயங்கி வருகிறது. கல்வித்துறை, அரசு அதிகாரிகள், போலீசார்
உதவியுடன் செயல்பட்டு வருகிறது.

தற்போது, டாஸ்மாக் கடைகள் மூடப்பட்டுள்ளதால், குடி நோயாளிகள்
பல்வேறு வகையில் அவதிஅடைந்து வருவதை காண முடிகிறது.
இந்த இக்கட்டான சூழ்நிலையில், அரசு உத்தரவுக்கு மதிப்பளித்து, '
ஆன்லைன்' மற்றும் மொபைல் போன் வாயிலாக கவுன்சிலிங்
நடத்தி வருகிறோம்.

தற்போதைய சூழலில், குடி பிரச்னையில் இருந்து விடுபட நினைத்தால்,
78711 86050, 94864 18123 என்ற உதவி எண்களை அழைக்கலாம்.
மேலும், www.aagsoindia.org என்ற இணையதளத்தில் தகவல்களை
பெறலாம். இவ்வாறு, அவர் கூறினார்.


தினமலர்