அமெரிக்காவில் ஏப்.,30 வரை சமூக விலக்கல் நீட்டிப்பு :2 லட்சம் பேர் இறப்பர்

**ayyasamy ram** · **ayyasamy ram** Tue 31 Mar 2020 - 9:22

வாஷிங்டன் :
'கொரோனா' வைரஸ் பாதிப்பு மற்றும் அதனால் உயிரிழப்பு ஏற்படுவது
அதிகரித்து வரும் நிலையில், ஏப்., 30 வரை சமூக விலக்கலை நீட்டிப்பதாக,
அமெரிக்க அதிபர், டொனால்டு டிரம்ப் அறிவித்துள்ளார்.

'சமூக விலக்கலை முறையாக பின்பற்றினால், உயிர் பலியை,
2 லட்சத்துக்குள் குறைக்க முடியும்' என, அவர் கூறியுள்ளார்.

நடவடிக்கை

கொரோனா வைரஸ் பாதிப்பு, உலகெங்கும் பெரும் தாக்கத்தை ஏற்படுத்தி
வருகிறது. மொத்தம் ஒரு லட்சத்து, 43 ஆயிரத்து, 25 பேருடன், அதிக பாதிப்பு
நாடுகளில், அமெரிக்கா தொடர்ந்து முதலிடத்தில் இருந்து வருகிறது.
உயிர் பலியும் ராக்கெட் வேகத்தில் உயர்ந்து வருகிறது. இதுவரை, 2,509 பேர்
இறந்துள்ளனர்.

இந்நிலையில், அதிபர், டொனால்டு டிரம்ப், 'வீடியோ கான்பரன்ஸ்' மூலம்,
நிருபர்களுக்கு அளித்துள்ள பேட்டியில் கூறியுள்ளதாவது:கொரோனா வைரஸ்
பாதிப்பு பரவாமல் தடுக்க, டாக்டர்கள் டெபோரா பிக்ஸ், ஆன்டனி பாசி
தலைமையில், சிறப்பு குழு உருவாக்கப்பட்டுள்ளது.

இந்தக் குழுவின் பரிந்துரைப்படி, பல நடவடிக்கைகளை எடுத்து வருகிறோம்.
தற்போது, சமூக விலக்கலை பின்பற்றி வருகிறோம். இந்த நடவடிக்கைகள்
எடுக்காவிட்டால், அமெரிக்காவில், 22 லட்சம் பேர் வரை உயிரிழக்க சாத்தியம்
இருந்தது.

நாட்டின் மொத்த மக்கள் தொகையில், பாதி பேருக்கு மேல், வைரஸ் தொற்று
ஏற்படும். அவ்வாறு வைரஸ் தொற்று ஏற்பட்டவர்களில், 50 சதவீதத்துக்கும்
அதிகமானோர் உயிரிழக்க நேரிடும் என்றும் எச்சரிக்கப்பட்டது.

நாம் இந்த வைரஸ் பாதிப்பை வெற்றி கொள்ள வேண்டும். வரும், ஏப்., 12ல், ஈஸ்டருக்கு
முன்பாக, இயல்பு நிலைக்கு திரும்புவோம் என, எதிர்பார்க்கப்பட்டது.
ஆனால், வைரஸ் பாதிப்பு தொடர்ந்து தீவிரமாக உள்ளது. வரும், ஜூன், 1ம் தேதிக்குள்
இயல்பு நிலைக்கு திரும்புவோம் என்று நம்புகிறோம்.

டாக்டர்கள் குழு அளித்துள்ள பரிந்துரையின்படி, சமூக விலக்கல் நடவடிக்கை,
ஏப்., 30 வரை நீடிக்கப்படுகிறது. இதை முறையாக கடைப்பிடித்தால், பலி எண்ணிக்கையை,
இரண்டு லட்சத்துக்குள் குறைக்க முடியும் என, நிபுணர்கள் கூறுகிறார்கள்.

அதனால், அமெரிக்க மக்கள் கட்டுப்பாட்டுடன், சமூக விலக்கலை, முழுமையாக கடைபிடிக்க
வேண்டும். இவ்வாறு, அவர் கூறியுள்ளார்.

**ayyasamy ram** · **ayyasamy ram** Tue 31 Mar 2020 - 9:24

கொரோனா பாதிப்பை, தேசிய மருத்துவ அவசர நிலையாக, டிரம்ப் சமீபத்தில் அறிவித்தார்.
மேலும், நியூயார்க் உள்பட பல மாகாணங்களில், தேசிய பேரிடராகவும் அறிவித்தார்.
நாட்டின், 50 மாகாணங்களில், 20 மாகாணங்களில், தலா ஆயிரத்துக்கும் மேற்பட்டோருக்கு
வைரஸ் பாதிப்பு ஏற்பட்டுள்ளது.பல மாகாணங்களில், முழு ஊரடங்கு அமல்படுத்தப்பட்டு
வருகிறது.

பொதுமக்கள் வெளியே செல்ல தடை விதிக்கப்பட்டுள்ளது. இதை மீறுவோருக்கு அபராதமும்
விதிக்கப்படுகிறது.

நடமாடும் சவக்கிடங்கு

நியூயார்க் நகரம் மிகக் கடுமையாக பாதிக்கப்பட்டுள்ளது. கொரோனா வைரஸ்
பாதிக்கப்பட்டோருக்கு சிகிச்சை அளிக்க போதிய மருத்துவமனைகள் இல்லை. இதற்கிடையே,
உயிரிழந்தோரின் உடல்களை வைப்பதற்கும், போதிய சவக் கிடங்குகள் இல்லை.

அதையடுத்து, குளிர்சாதன வசதி கொண்ட டிரக்குகள், நடமாடும், சவக் கிடங்காக பயன்
படுத்தப்படுகின்றன.

செலவை ஏற்க மறுப்பு

ஐரோப்பிய நாடான பிரிட்டனின் அரசக் குடும்பத்தைச் சேர்ந்த இளவரசர் ஹாரி மற்றும்
அவருடைய மனைவி, மேகன் மார்க்கெல், அரசக் குடும்ப வாழ்க்கையில் இருந்து
விலகுவதாக அறிவித்தனர். அதையடுத்து, வட அமெரிக்க நாடான, கனடாவில் தங்கியிருக்கப்
போவதாக அறிவித்தனர்.

இந்த நிலையில், அமெரிக்காவின் லாஸ் ஏஞ்சலஸ் நகருக்கு அவர்கள் குடி பெயர்ந்துள்ளதாக,
செய்திகள் வெளியாயின.'பிரிட்டன் அரசக் குடும்பத்தின் மீது மிகுந்த மதிப்பு வைத்துள்ளேன்.
அதே நேரத்தில், ஹாரி மற்றும் அவருடைய குடும்பத்துக்கான பாதுகாப்பு செலவுகளை அரசு
ஏற்காது. 'அவர்கள் அதற்காக பணம் செலுத்த வேண்டும்' என, சமூக வலை தளத்தில்
வெளியிட்டுள்ள செய்தியில், டிரம்ப் கூறியுள்ளார்.

ஆயிரத்தை தாண்டிய பலி

நியூயார்க் நகரில், வைரஸ் பாதிப்பு மிகவும் மோசமாக உள்ளது. பலி எண்ணிக்கை, ஆயிரத்தை
தாண்டியுள்ளது. 'வைரசால் உயிரிழந்தோர் எண்ணிக்கை, 728ல் இருந்து, 965ஆக உயர்ந்துள்ளது.
ஒரே நாளில், 237 பேர் உயிரிழந்துள்ளனர்.

ஒரு நாளில் பதிவான அதிகபட்ச பலி இதுவாகும்' என, நகர மேயர், ஆன்ட்ரூ கியூமோ கூறினார்.
ஆனால், அதன்பிறகு, பலி எண்ணிக்கை உயர, நியூயார்க்கில் மட்டும் உயிரிந்தோர் எண்ணிக்கை,
ஆயிரத்தை தாண்டியது.ஒரே நாளில், 7,000க்கும் மேற்பட்டோருக்கு வைரஸ் தொற்று ஏற்பட்டதால்,
நியூயார்க்கில் மட்டும், 59 ஆயிரத்து, 513 பேருக்கு வைரஸ்தொற்று உறுதியாகி உள்ளது.

இதற்கிடையே, நியூயார்க்கின் மத்திய பூங்காவில், 68 படுக்கைகள் கொண்ட மருத்துவமனை
அமைக்கும் பணி துவங்கியுள்ளது.

தினமலர்