'கொரோனா' சிகிச்சைக்கு, 'ரோபோ' தயார் இலவசமாக தரும் தனியார் நிறுவனம்

-
திருச்சி:

திருச்சி தனியார் நிறுவனம் தயாரித்துள்ள,
'ரோபோ'க்களை, கொரோனா தடுப்பு
நடவடிக்கைக்கு
இலவசமாக வழங்குவதாக அறிவித்துள்ளது.

திருச்சியில், 'புரபெல்லர் டெக்னாலஜிஸ்' என்ற
ரோபோட்டிக் நிறுவனம் செயல்பட்டு வருகிறது.
ட்ரோன், ரோபோ போன்றவற்றை வடிவமைத்து
தயாரித்து வரும் இந்நிறுவனம், 'ஜாபி' என்ற பெயரில்
ரோபோக்கள் தயாரித்து வருகிறது.

இதை, கொரோனா தடுப்பு நடவடிக்கைக்கு பயன்படுத்த
முன்வந்தால், இலவசமாக வழங்க தயார் என,
அந்நிறுவனத்தின் தலைமை செயல் அதிகாரி,
முகமது ஆஷிக் ரகுமான் தெரிவித்தார்.

தூய்மை பணி

அவர் கூறியதாவது:
எங்களின் தயாரிப்பான, 'ஜாபி' எனும் ரோபோவை
மருத்துவமனை ஊழியர்கள் மற்றும் துாய்மை பணியில்
ஈடுபடுபவர்களுக்கு மாற்றாக பயன்படுத்தும் வகையில்
வடிவமைத்துள்ளோம்.

தொற்று நோயால் பாதிக்கப்பட்டவருக்கு மருந்து, உணவு
ஆகியவற்றை கொண்டு போய் கொடுக்க இந்த
ரோபோக்களை பயன்படுத்தலாம்.மனித வடிவிலான
ஜாபி ரோபோ, வாய்ஸ் இன்டராக்டிவே தொழில்நுட்பம்
மற்றும் மொபைல் மூலமாக கன்ட்ரோல் செய்யப்பட்டு,
டாக்டர்களுக்கு உதவியாக செயல்படும் விதமாக,
வடிவமைக்கப்பட்டுள்ளது.

மற்றொரு தயாரிப்பான, 'ஜாபி மெடிக்' ரோவர் வகையான
ரோபோ, 20 கிலோ வரை கொண்டு செல்லும் வகையில்,
1 கி.மீ., வரை ரேடியோ கன்ட்ரோல் மூலம் இயக்கப்படும்
வகையிலும் உருவாக்கப்பட்டுள்ளது.

அத்தியாவசிய பொருள்

இதன் மூலம், தனிமைப்படுத்தப்பட்ட வீடுகளுக்கு, உணவு
மற்றும் அத்தியாவசிய பொருட்கள் கொண்டு போய் வழங்க
முடியும். மேலும், பாதிக்கப்பட்டு உள்ளவர்களின் அறையில்
கிருமி நாசினி தெளிக்கவும் பயன்படுத்தலாம்.

தற்போது, ஒன்பது, ஜாபி ரோபோவும், ஒரு ஜாபி மெடிக்
ரோபோவும் தயார் நிலையில் உள்ளன. இவற்றை கொரோனா
தடுப்பு மருத்துவ பணிகளுக்கு தேவைப்பட்டால், இலவசமாக
வழங்க தயாராக இருக்கிறோம்.

இவ்வாறு, அவர் கூறினார்.ஏற்கனவே, இவ்வகை ரோபோக்கள்
சீனா மற்றும் ஜப்பானில், கொரோனாவால் பாதித்தவர்களுக்கு
உணவு மற்றும் மருந்துகள் வழங்க பயன்படுத்தப்பட்டது.
-
-----------------------------
தினமலர்