சிம்பொனி நிறுவனம் மீது சென்னை உயர்நீதிமன்றத்தில் ‘மகாநதி’ ஷோபனா வழக்கு

மகாநதி’ ஷோபனா பாடிய ‘கந்த சஷ்டி கவசம்’: பாடல்களை வெளியிட சிம்பொனி நிறுவனத்துக்கு உயர் நீதிமன்றம் இடைக்காலத் தடை

‘உலகநாயகன்’ கமல்ஹாசன் நடிப்பில் வெளியாகி ‘சூப்பர்ஹிட்’ அடித்த திரைப்படம் “மகாநதி”. இந்தப் படத்தில் இடம்பெற்ற “ஸ்ரீரங்க ரங்கநாதனின் பாதம்…..” எனது தொடங்கும் பாடலின் மூலம் இன்றுவரை நெஞ்சங்கள் அனைத்திலும் பக்தியோடு கூடிய இசையால் நிறைந்து நிற்பவர் நடிகை ‘மகாநதி’ஷோபனா.

தற்செயலாக திரையில் தோன்றி நடிகையாக பெயர் பெற்றுவிட்டாலும், கர்நாடக இசையை முறைப்படி கற்றுத் தேர்ந்த ஒரு பாடகியாக புகழ் பெறுவதையே பெருமையாகக் கருதி, தனது நோக்கத்தையும் ‘மகாநதி’ ஷோபனா சாதித்துக் கொண்டார்.

இந்தநிலையில், மற்றைய பாடகர்களைப் போலவே இவரும் இசைத் தொகுப்புக்களை வெளியீடு செய்யும் உலகப் புகழ்பெற்ற நிறுவனங்களுடன் ஒப்பந்தம் செய்திருந்தார்.

‘மகாநதி’ ஷோபனாவும் தனது கர்நாடக இசைத்துறையில் பிரபலமாகத் தொடங்கிய ஆரம்பத்தில், சிம்பொனி நிறுவனத்துடன் ஒப்பந்தம் செய்து “கந்த சஷ்டி கவசம்” மற்றும் “டுவிங்கிள் டுவிங்கிள் லிட்டில் ஸ்டார்” ஆகிய தனது இரண்டு இசை ஆல்பங்களை, 1995ம் ஆண்டு காலப்பகுதியில் பாடி உருவாக்கியிருந்தார். குறித்த இசை தொகுப்புக்கள் ’சிம்பொனி’ மற்றும் ‘பக்தி எப்.எம்’ என்ற பெயரில் யூடியூப் சமூக வலைத்தளத்தினூடாக வெளியிடப்பட்டுள்ளன.

யூடியூப் தளத்தில் பதிவேற்றப்படுவதன் மூலம் பார்வையாளர்கள் மற்றும் பயனர்களின் எண்ணிக்கையைப் பொறுத்து குறித்த தரவேற்றப் பதிவுகளுக்கு வருமானம் கிடைத்து வரும் நிலையில், தன்னுடைய அனுமதி இல்லாமல் தன்னுடைய பாடல் இசைத் தொகுப்புகளை தரவேற்றம் செய்து சிம்பொனி நிறுவனம் வருமானம் பெறுவதை எதிர்த்து சென்னை உயர்நீதிமன்றத்தில் ‘மகாநதி’ ஷோபனா வழக்கு தொடர்ந்திருந்தார்.

இவ்வாறு தொடரப்பட்ட வழக்கில், ஷோபனா தரப்பில் முன்னிலையான சட்டத்தரணி ஹரிஹர அருண் சோமசங்கர் வாதிடும்போது, ஷோபனா 13 வயது சிறுமியாக இருந்தபோது, அவரிடம் சிம்பொனி நிறுவனம் செய்துகொண்ட ஒப்பந்தம் சட்டரீதியாக செல்லுபடியாகாது என வாதத்தை முன்வைத்தார்.

அத்துடன், Facebook இல் தனது பிரத்தியேக பக்கத்தில் பதிவேற்றப்பட்ட புகைப்படங்களை தனது அனுமதியை பெற்றுக்கொள்ளாமல் தரவிறக்கம் செய்து, குறித்த பாடல் தொகுப்புக்களில் பயன்படுத்தியமையும் சட்டவிரோதமானது என்ற மேலதிக வாதத்தையும் ஷோபனா சார்பில் அவரது சட்டத்தரணி முன்வைத்தார்.

இவ்வாறான சட்டவிரோத செற்பாடுகளில் ஈடுபட்டமையினால், குறித்த தனது இரண்டு இசை தொகுப்புக்களையும் சிம்பொனி நிறுவனம் வெளியிடுவதற்கு உயர்நீதிமன்றம் தடை உத்தரவு பிறப்பிக்க வேண்டுமென்று ஷோபனா முன்வைத்த வேண்டுகோளை ஏற்ற நீதிபதி எம்.எஸ்.ரமேஷ், ‘மகாநதி’ ஷோபனா பாடிய ‘கந்த சஷ்டி கவசம்’ மற்றும் ‘ட்விங்கிள் ட்விங்கிள் லிட்டில் ஸ்டார்’ ஆல்பங்களை வெளியிட சிம்பொனி நிறுவனத்துக்கு இடைக்காலத் தடை விதித்து உத்தரவிட்டார்.

தினமலர்