ஊழலை உருவாக்கிய கலைஞன் காங்கிரஸ்: பா.ஜ., விமர்சனம்

**ayyasamy ram** · **ayyasamy ram** Wed Mar 11, 2020 3:59 am

புதுடில்லி: '
ஊழல் ஒரு கலை என்றால், அதை உருவாக்கிய கலைஞன் காங்கிரஸ்'
என, பா.ஜ., விமர்சித்துள்ளது.

நிதி நெருக்கடியில் சிக்கியுள்ள, 'யெஸ் பேங்க்' நிறுவனர் ரானா கபூரிடம்
அமலாக்கத்துறை விசாரணை நடத்தி வருகிறது. அதில், ரானா கபூரிடம்,
மிகவும் விலை உயர்த்த, 44 ஓவியங்கள் இருப்பது தெரிந்தது.

அதில் ஒரு ஓவியம், காங்கிரஸ் பொதுச் செயலர் பிரியங்கா, 2 கோடி
ரூபாய்க்கு, ரானா கபூருக்கு விற்றது என, தெரிய வந்தது. இந்த ஓவியம்,
மறைந்த ஓவியர், எம்.எப். உசேனால் வரையப்பட்டது. இந்த ஓவியத்தை,
பிரியங்காவின் தந்தையும், முன்னாள் பிரதமருமான ராஜிவுக்கு,
1985ல், உசேன் அன்பளிப்பாக வழங்கியுள்ளார்.

இந்நிலையில், இந்த விவகாரம் பற்றி, பாஜ., செய்திதொடர்பாளர்,
சம்பித் பாத்ரா, டில்லியில் கூறியதாவது: ஓவியங்களுக்கு உசேன் புகழ்
பெற்றது போல், ஊழலுக்கு புகழ் பெற்றது காங்கிரஸ். ஊழல் ஒரு கலை
என்றால், அதை உருவாக்கிய கலைஞன் காங்கிரஸ்.

இந்த ஓவியத்தை, காங்கிரஸ் நுாற்றாண்டு விழாவில், காங்கிரஸ் தலைவர்
என்ற முறையில், ராஜிவுக்கு, உசேன் வழங்கியுள்ளார். அதனால், அது
காங்கிரசின் சொத்து. பிரியங்காவுக்கு சொந்தமானதல்ல. இந்த விவகாரம்
பற்றி, முழுமையாக விசாரணை நடத்த வேண்டும். இவ்வாறு, அவர் கூறினார்.

தினமலர்