103 வயது தடகள வீராங்கனை உள்பட 15 சாதனை பெண்களுக்கு தேசிய விருது: ஜனாதிபதி ராம்நாத் கோவிந்த் வழங்கி கவுரவித்தார்

by **ayyasamy ram** Mon Mar 09, 2020 4:57 am

-
புதுடெல்லி,

சர்வதேச மகளிர் தினத்தையொட்டி பல்வேறு துறைகளில்
சாதனை புரிந்த பெண்களுக்கு மத்திய அரசு பெண்கள்
மற்றும் குழந்தைகள் மேம்பாடு துறையின் மூலமாக
‘நாரி சக்தி புரஸ்கார்’ (பெண் சக்தி விருது) தேசிய விருது
வழங்கி கவுரவித்து வருகிறது.

டெல்லியில் ஜனாதிபதி மாளிகையில் அமைந்துள்ள கலாசார
மையத்தில் நேற்று இந்த ஆண்டுக்கான ‘நாரி சக்தி புரஸ்கார்’
விருது வழங்கும் விழா நடைபெற்றது.

பெண்கள் மற்றும் குழந்தைகள் மேம்பாடு துறை மந்திரி ஸ்மிரிதி இரானி
முன்னிலையில் நடந்த விழாவில் பல்வேறு துறைகளில் ஆக்கப்பூர்வமாக
சாதனை படைத்துள்ள 15 பெண்களுக்கு ‘நாரி சக்தி புரஸ்கார்’ தேசிய
விருதுகளை ஜனாதிபதி ராம்நாத் கோவிந்த் வழங்கி கவுரவித்தார்.

நாரி சக்தி புரஸ்கார் விருது பெற்றவர்களில் குறிப்பிடத்தக்கவர்கள் விவரம் வருமாறு:-

* சண்டிகாரை சேர்ந்த 103 வயது தடகள வீராங்கனை, மான் கவுர்.
இவர் 93 வயதில் தடகள போட்டிகளில் கலந்து கொள்ளத்
தொடங்கினார். போலந்து நாட்டில் நடந்த உலக மாஸ்டர்ஸ்
தடகள போட்டியில் பங்கேற்று 4 தங்க பதக்கங்களை
( டிராக் அண்ட் பீல்டு) குவித்தவர். இவர் ‘பிட் இந்தியா’ இயக்கத்துடன்
தொடர்பு உடையவர். ஆக்லாந்தில் ஸ்கை டவர் உச்சிக்கு சென்ற
மிக வயதான நபர் இவர்தான்.

* பீகார் மாநிலம், முங்கர் பகுதியை சேர்ந்த பீனா தேவி.
‘காளான் பெண்’ என்று அழைக்கப்படுகிற 43 வயதான இவர்,
காளான் வளர்ப்பை 105 கிராமங்களில் பிரபலப்படுத்தியவர்.
இதனால் 1,500 பெண்களுக்கு வேலை வாய்ப்பு கிடைத்துள்ளது.

* உத்தரபிரதேச மாநிலம் கான்பூரை சேர்ந்த 58 வயதான கலாதேவி,
பெண் கொத்தனார் ஆவார். அங்கு திறந்தவெளி கழிப்பிடங்களை
ஒழிப்பதில் முக்கிய பங்கு வகிப்பவர்.

* ஜார்கண்ட் மாநிலத்தில் பெண் டார்ஜான் என்று அழைக்கப்படுகிற
47 வயது சமி முர்மு, 25 லட்சம் மரக்கன்றுகளை நடுவதில்
ஈடுபட்டுள்ளார். காடுகளை பாதுகாப்பதில் முக்கிய பங்கு வகிக்கிறார்.

* காஷ்மீர் லடாக் பகுதியை சேர்ந்த 40 வயதான நில்ஜா வாங்மோ
தொழில் அதிபர். லடாக்கி கலாசார உணவகம் நடத்தி வருகிறார்.
இதை நிர்வகிக்க 20 கடைக்கோடி கிராமங்களை சேர்ந்த பெண்களுக்கு
பயிற்சி அளித்துள்ளார்.

* மராட்டிய மாநிலம், புனேயை சேர்ந்த ராஷ்மி உர்த்வர்தேஷி.
இவர் மோட்டார் வாகன தொழில் துறையில் பெண்களை
ஊக்குவித்து வருகிறார்.

* உத்தரகாண்ட் மாநிலத்தை சேர்ந்த இரட்டையர்கள்
தாஷி மாலிக் மற்றும் நுங்ஷி மாலிக் சகோதரிகள்.
இவர்கள் 2013-ம் ஆண்டு எவரெஸ்ட் சிகரத்தில் ஏறிய முதல்
இரட்டை சகோதரிகள் என்ற சாதனையை படைத்தவர்கள்.

விருது அறிவிக்கப்பட்டவர்களில் கேரள மாநிலத்தை சேர்ந்த
பாகீரதி அம்மா நேரில் செல்ல இயலவில்லை என தகவல்கள்
கூறுகின்றன.

தினத்தந்தி