இத்தாலியை புரட்டிப்போட்ட கொரோனா; தனிமைப்படுத்தப்படும் 1.6 கோடி மக்கள்

-

-
ரோம்:
உலக நாடுகளைப் புரட்டிப்போட்டு வரும் கொரோனா
வைரசின் பாதிப்பின் உச்சமாக, வடக்கு இத்தாலியின்,
14 மாகாணங்களில் வசிக்கும், 1.6 கோடி மக்களை
தனிமைப்படுத்தி இருக்கிறது இத்தாலி அரசு.

சீனாவிற்கு அடுத்தபடியாக, ஐரோப்பிய கண்டத்திலேயே
கொரோனா வைரசால் மிகவும் பாதிக்கப்பட்டிருப்பது
இத்தாலி தான். அங்கு, இந்த வைரசால் உயிரிழந்தவர்களின்
எண்ணிக்கை, 233 ஆக அதிகரித்துள்ளது.

கடந்த 24 மணி நேரத்தில் மட்டும், 50 பேர் உயிரிழந்துள்ளனர்; ,
200க்கும் மேற்பட்டோர் பாதிக்கப்பட்டுள்ளனர்.

இத்தாலி பிரதமர் கியூசெப் கோண்டே தெரிவித்துள்ளதாவது:

இத்தாலியில் கொரோனா பாதிப்பு அதிகரித்துள்ளது.
கொரோனா பரவலைக் கட்டுப்படுத்த இத்தாலி முழுவதும்
உள்ள உடற்பயிற்சி கூடங்கள், நீச்சல் குளங்கள்,
அருங்காட்சியகங்கள் மற்றும் கேளிக்கை சேவைகள்
ஒட்டுமொத்தமாக மூட நடவடிக்கைகள் எடுக்கப்பட்டு
வருகிறது.

விளையாட்டு மற்றும் பொழுதுபோக்கு நிகழ்ச்சிகளும்
காலவரையறையின்றி ஒத்திவைக்கப்பட்டுள்ளன.
ஒரு கோடி மக்கள் வசிக்கும், இத்தாலியின் லோம்பார்டி
பிராந்தியமும், வெனிஸ், பர்மா, மொடெனா உள்ளிட்ட,
14 மாகாணங்களும் தனிமைப்படுத்தப்பட்டுள்ளன.

அவற்றில், மொத்தம் 1.6 கோடி மக்கள் தனிமைப்படுத்தப்
பட்டுள்ளனர். அமல்படுத்தப்பட்டுள்ள கொரோனா தடுப்பு
விதிமுறைகளை மீறுபவர்களுக்கு, மூன்று மாதங்கள்
சிறை தண்டனை விதிக்கப்படும்.இவ்வாறு அவர் எச்சரிக்கை
விடுத்துள்ளார்.

இத்தாலி அரசின் இந்த முடிவிற்குத் தனிமைப்படுத்தப்படும்
மக்கள் கடும் கண்டனங்களைத் தெரிவித்து வருகின்றனர்.
பலரும் சாலைகளில் கூடி, ஆர்ப்பாட்டங்களில் ஈடுபட்டுள்ளனர்
-
---------------
தினமலர்