வீட்டுக்குள்ளே .....

**M.Jagadeesan** · **M.Jagadeesan** Fri Apr 03, 2020 10:10 pm

வீட்டுக்குள்ளே .....
=================
வீட்டுக் குள்ளே யிருந்திடுவீர் - நீர்
...வெளியே வந்திட வேண்டாமே !
வாட்டும் பசிப்பிணி யிருந்தாலும் - நீர்
...வாசல் தாண்ட வேண்டாமே !

என்ற கூக்குரல் இப்போது - தினம்
...எங்கும் ஒலிக்கக் கேட்கிறது
நின்று சொல்வது எளிதாகும் - அது
...நிஜத்தில் நடைமுறை சாத்தியமா ?

வேலை செய்ய வாய்ப்பில்லை - அவர்
...வேதனை தீரவும் வழியில்லை
பாலைத் தரையில் கொட்டுகிறார் - அந்தப்
...பாவம் யாரைச் சார்ந்திடுமோ ?

விளைந்த காய்கறி எல்லாமே - இங்கு
...விற்பனை செய்திட வழியில்லை
வளைந்து போன நெஞ்சத்தால் - அவர்
...வாழ்வும் குலைந்தது பஞ்சத்தால் !

கூலி வேலை செய்வோரின் - பெற்ற
...குழந்தை பசியால் அழுகிறது
தாலியை அடகு வைத்தாலும் - பசி
...தணிக்கும் கடைகள் திறக்கவில்லை

பள்ளி திறக்கும் முன்பாக - அவர்
...பணத்தைக் கட்டச் சொல்லுகிறார்
பிள்ளை பெற்ற பெற்றோர்கள் - விழி
...பிதுங்கி நிற்கும் நிலைக்கண்டீர் !

ஆயிரம் ரூபாய் கொடுக்கின்றார் - அது
...அற்பத் தொகையென அறியாரோ ?
நாயினும் இழிந்த வாழ்விதுபோல் - இந்த
...நாடு என்றும் கண்டதில்லை !

வராத நெருக்கடி வந்ததம்மா - இந்த
...வாழ்வின் விடியல் எப்போது ?
கொரானா கொல்லும் முன்பாக - பசி
...கொல்லும் என்பது உண்மையன்றோ !

பழிகள் எல்லாம் ஓரிடமாம் - அந்தப்
...பாவம் எல்லாம் வேறிடமாம்
வழியைத் திறந்தது சீனாதான் - அவர்
...வஞ்சனை செய்யும் மனிதரன்றோ !

ஊழிக் காலம் வந்ததுபோல் - இங்கு
...உயிர்கள் மடியும் நிலைகண்டு
தாழினைப் போட்டுக் கடவுளரும் - இங்குத்
..தன்னைத் தானே காத்தனரோ ?

**krishnaamma** · **krishnaamma** Sat Apr 04, 2020 9:12 am

மிக அருமை ஐயா, அனைவரின் உள்ளத்திலும் இருப்பதை அப்படியே கவிதையாக கொட்டிவிடீர்கள்..... மகிழ்ச்சி

வீட்டுக்குள்ளே .....

வீட்டுக்குள்ளே .....

Re: வீட்டுக்குள்ளே .....

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக