சர்வதேச போட்டியில் பங்கேற்க பண வசதியின்றி தவிக்கும் வீரர்

சிவகங்கை
: சிவகங்கை சூரக்குளத்தை சேர்ந்த தடகள வீரர் என்.நாகராஜ்(25), துபாயில்
நடக்கவுள்ள ஊனமுற்றோர் தடகள போட்டியில் பங்கேற்க பண வசதியின்றி
தவிக்கிறார். ஐந்தாவது வயதில் போலியோவால் பாதிக்கப்பட்ட இவர், கால்கள்
ஊனமுற்றபோதும் மனம் தளராமல் போட்டிகளில் ஆர்வமுடன் பங்கேற்று வருகிறார்.
கோவையில் நடந்த மாநில போட்டியில் குண்டு, வட்டு, ஈட்டி எறிதலில் வெள்ளி
பதக்கம் பெற்றார். டில்லியில் 2007 ல் நடந்த தேசிய போட்டியில் 4.90
மீட்டர் தூரம் குண்டு எறிந்து தங்கமும், 12.17 மீ., தூரம் வட்டு எறிந்து
வெள்ளியும் பெற்றார். அதே ஆண்டு பெங்களூருவில் ஜூனியர் தேசிய போட்டியில்
வட்டு எறிதலில் வெண்கலம் வென்றார்.


தளராமல் முயற்சி:
தளராத முயற்சியால் இதுவரை மூன்று தங்கம், எட்டு வெள்ளி, வெண்கலம்
பெற்றுள்ளார். இவர் பாரா ஒலிம்பிக் போட்டியில் பங்கேற்க முடிவு
செய்துள்ளார். இதற்காக பிப்., 8 முதல் 13 ம் தேதி வரை துபாயில் நடக்க உள்ள
சர்வதேச போட்டிகளில் பங்கேற்க உள்ளார். இதற்கான வீரர்கள் தேர்வு
டிசம்பரில், பெங்களூருவில் நடந்தது. இதில் தமிழகம் சார்பில் இவர் உட்பட 18
பேர் தேர்வு செய்யப்பட்டனர்.


பண வசதியின்றி தவிப்பு:
துபாய் செல்ல விமான டிக்கெட், நுழைவு கட்டணம், விசா, விளையாட்டு சாதன
செலவுக்கென 58 ஆயிரம் ரூபாய் தேவைப்படும். சலவை தொழிலாளியான இவரது தந்தை
காமாட்சியால், இவ்வளவு தொகை செலவிட முடியாது.

தடகள வீரர் நாகராஜ் கூறியதாவது:
எனக்கு விளையாட்டு மேம்பாட்டு ஆணைய பயிற்சியாளர் ரஞ்சித் குமார் பயிற்சி
அளிக்கிறார். அவரது பயிற்சியால் தேசிய போட்டியில் பதக்கம் பெற்றேன்.
சர்வதேச போட்டியில் பங்கேற்று பதக்கம் வெல்வதே லட்சியம். விளையாட்டு
ஆர்வலர்கள் நிதி உதவி அளிக்க வேண்டும், என்றார். இவருக்கு உதவி செய்ய
விரும்புவோர், "98437 53684' ல் தொடர்பு கொள்ளலாம்.
குடும்ப அரசியல் நடத்தி நாட்டை கொள்ளைடிக்கும் இரண்டு குடும்பங்கள் இவருக்கு பண வசதி செயலாமே !!!