அரையிறுதியில் இந்திய பெண்கள் அணி: உலக கோப்பையில் அசத்தல்

மெல்போர்ன்: 'டுவென்டி-20' உலக கோப்பை தொடரின் அரையிறுதிக்கு இந்தியப் பெண்கள் அணி முன்னேறியது. நியூசிலாந்துக்கு எதிரான லீக் போட்டியில் 4 ரன்கள் வித்தியாசத்தில் 'திரில்' வெற்றி பெற்றது.
ஆஸ்திரேலியாவில் பெண்களுக்கான 'டுவென்டி-20' உலக கோப்பை தொடர் நடக்கிறது. மெல்போர்னில் நடந்த 'ஏ' பிரிவு லீக் போட்டியில் இந்தியா, நியூசிலாந்து அணிகள் மோதின. 'டாஸ்' வென்ற நியூசிலாந்து அணி பவுலிங் தேர்வு செய்தது.

ஷபாலி நம்பிக்கை
இந்திய அணிக்கு மந்தனா (11) ஏமாற்றினார். ரோஸ்மேரி பந்துவீச்சில் தனியா (23), ஜெமிமா ரோட்ரிக்ஸ் (10) அவுட்டாகினர். கேப்டன் ஹர்மன்பிரீத் (1), வேதா (6) ஒற்றை இலக்கில் ஆட்டமிழந்தனர். ஷபாலி வர்மா (46) நம்பிக்கை அளித்தார். இந்திய அணி 20 ஓவரில் 8 விக்கெட்டுக்கு 133 ரன்கள் எடுத்தது. ஷிகா பாண்டே (10) அவுட்டாகாமல் இருந்தார்.

ஷிகா அசத்தல்
நியூசிலாந்து அணிக்கு ராகெல் (12), கேப்டன் சோபி டிவைன் (14) ஏமாற்றினர். சுஜீ பேட்ஸ் 6 ரன்கள் மட்டும் எடுத்தார். ராதா யாதவ் 'சுழலில்' கேட்டி (25) அவுட்டானார். அமெலியா கெர் பவுண்டரியாக விளாசி நெருக்கடி தந்தார். ஷிகா பாண்டே வீசிய கடைசி ஓவரின் கடைசி பந்தில் நியூசிலாந்து வெற்றிக்கு 5 ரன்கள் தேவைப்பட்டது. இதில் ஜென்சன் (11) ஆட்டமிழந்தார். நியூசிலாந்து அணி 20 ஓவரில் 6 விக்கெட்டுக்கு 129 ரன்கள் மட்டும் எடுத்து வீழ்ந்தது. இந்திய அணி 4 ரன்கள் வித்தியாசத்தில் 'திரில்' வெற்றி பெற்றது.

முதலிரண்டு போட்டிகளில் ஆஸ்திரேலியா, வங்கதேசத்தை வீழ்த்திய இந்திய அணி மூன்றாவது வெற்றியை பதிவு செய்துள்ளது. இதன் மூலம், 'ஏ' பிரிவில் மூன்று போட்டியிலும் வென்றுள்ள இந்திய அணி 6 புள்ளியுடன் முதல் அணியாக அரையிறுதிக்குள் நுழைந்தது.

நன்றி தினமலர்

ரமணியன்