ஆந்திராவில் 144 ரெயில்கள் ஓடவில்லை : போட்டி போட்டு மறியல்; மக்கள் கடும் அவதி

ஆந்திராவைப் பிரித்து தனி மாநிலம் அமைக்க கோரி தெலுங்கானா பகுதியில் தொடர் போராட்டம் நடந்து வருகிறது. இதே போல தனி மாநிலத்திற்கு எதிர்ப்பு தெரி வித்து கடலோர ஆந்திரா -ராயலசீமா பகுதிகளில் போராட்டம் வலுத்துள்ளது. இரு பகுதிகளிலும் 2 நாட்களுக்கு முன்பு வரை சாலை மறியல்தான் அதிக அளவில் நடந்து வந்தது.

நேற்று முதல் இரு தரப்பினரும் ரெயில் மறியலில் குதித்துள்ளனர். இந்த போட்டி மறியல் காரணமாக தெலுங்கானா, ராயலசீமா, கடலோர ஆந்திரா பகுதிகளில் இன்று 144 ரெயில்கள் ஆங்காங்கே நிறுத்தி வைக்கப்பட்டன. இதனால் ரெயில் பயணிகள் கடும் அவதிக்குள்ளானார்கள். பச்சிளம் குழந்தைகளுடன் வந்த பெண்கள் செய்வதறியாது திகைத்து நின்றனர்.

பயணிகள் பலர் ரெயில்வே நிர்வாகத்திடம் உணவு வசதி செய்து தருமாறு கோரிக்கை விடுத்தனர். இதை ஏற்று அவர்களுக்கு தேவையான உணவு, குடிநீர், வழங்க தென்மத்திய ரெயில்வே நடவடிக்கை எடுத்துள்ளது.

இன்று காலை சென்னையில் இருந்து திருப்பதிக்கு சப்தகிரி எக்ஸ்பிரஸ் ரெயில் புறப்பட்டு சென்றது. அந்த ரெயில் புத்தூர் வந்தபோது போராட்டகாரர்கள் திடீர் மறியலில் குதித்தனர். இதனால் ரெயில் அங்கேயே நிறுத்தி வைக்கப்பட்டது. அதில் பயணம் செய்த ஆயிரத்திற்கும் மேற்பட்ட தமிழக பக்தர்கள் புத்தூரில் தவித்த வண்ணம் உள்ளனர்.

ஆந்திரா முழுவதும் “பந்த்” நீடிப்பதால் இன்றும் பஸ்கள் ஓடவில்லை. அவை அனைத்தும் டெப்போக்களில் நிறுத்தி வைக்கப்பட்டுள்ளன. டெப்போக்களை சுற்றி பலத்த போலீஸ் பாதுகாப்பு போடப்பட்டுள்ளது.

இன்று நடைபெறும் முழு அடைப்பில் வன்முறை நிகழாமல் இருக்க 1450 பேர் முன் எச்சரிக்கையாக கைது செய்யப்பட்டனர். அவர்களை விடுவிக்க கோரி பல இடங்களில் மறியல் நடந்தன.

விஜயவாடாவில் இன்று கிருஷ்ணா பேரேஜ் பகுதியில் பொதுமக்கள் திடீர் மறியலில் குதித்தனர். இதனால் அப்பகுதியில் போக்குவரத்து பாதிக்கப்பட்டது.

ஆந்திர போலீஸ் டி.ஜி.பி. கிரிஷ்குமார் நிருபர்களிடம் கூறியதாவது:-

ஆந்திராவில் நேற்று நடந்த முழு அடைப்பின்போது பெரிய அளவில் வன்முறை இல்லை. நேற்று மட்டும் மாநிலம் முழுவதும் 220 இடங்களில் சாலை மறியல், 15 தர்ணா போராட்டம், 200 இடங்களில் தொடர் உண்ணாவிரதம், 175 நகரங்களில் பேரணி, 38 இடங்களில் சாகும்வரை உண்ணாவிரதம் நடந்தன. 2 இடங்களில் சில அரசியல் கட்சிகள் ரெயில் மறியலில் ஈடுபட்டன.

இவ்வாறு அவர் கூறினார்.