லோக்சபாவில் பதாகை எடுத்து வரலாமா:விவாதிக்க ஓம் பிர்லா முடிவு

புதுடில்லி:
“லோக்சபாவில்,பதாகைகளை எடுத்து வர அனுமதி உண்டா,
இல்லையா என்பதை முடிவு செய்ய, விவாதம் நடத்த
வேண்டும்,” என, சபாநாயகர் ஓம் பிர்லா கூறினார்.

பார்லிமென்டில், பட்ஜெட் கூட்டத்தொடர் நடைபெற்று வருகிறது.
லோக்சபாவில் நேற்று திரிணமுல் காங்., - எம்.பி., சவுகதா ராய்,
2020ம் ஆண்டிற்கான, ஆயுர்வேத கல்வி மற்றும் ஆராய்ச்சி
நிறுவன மசோதா குறித்து பேசினார்.

அப்போது எழுந்து நின்று அமளியில் ஈடுபட்ட, பா.ஜ., -
எம்.பி.,க்கள், கையில் பதாகைகளை ஏந்தி கோஷமிட்டனர்.

அதில்,'மேற்கு வங்கத்தில், ஜனநாயகத்தை காப்பாற்றுங்கள்'
என, குறிப்பிடப்பட்டிருந்தது. அப்போது பேசிய சவுகதா ராய்,
அமளியில் ஈடுபடுவோரை அமைதியாக இருக்க உத்தரவிடுமாறு,
சபாநாயகரிடம் கேட்டுக்கொண்டார்.

அதைத்தொடர்ந்து பேசிய சபாநாயகர், “சபைக்குள்
பதாகைகளை கொண்டுவர அனுமதிக்கலாமா, வேண்டாமா
என்பது குறித்து முடிவு செய்ய, விவாதம் நடத்த வேண்டும்.
அதில், அனுமதி மறுக்கப்பட்டால், மீறி எடுத்துவரும் எம்.பி.,க்கள்
மீது, நடவடிக்கை எடுக்கப்படும்,” என்றார்.

இது குறித்து கருத்து தெரிவிக்குமாறு, காங்., - எம்.பி.,
ஆதிர் ரஞ்சன் சவுத்ரியிடமும் கேட்டுக்கொண்டார்.அவர்,
“இந்த விவகாரத்தில், ஒருமித்த கருத்து இல்லை,” என்றார்.

இதற்கிடையே, கேள்வி நேரத்தின் போது பேசிய திரிணமுல்
காங்., - எம்.பி., மஹூவா மொய்த்ரா, நாட்டின் வளர்ச்சி விகிதம்
குறித்த கேள்வியை கேட்க முற்பட்டார். அதற்கு ஓம் பிர்லா
அனுமதி மறுத்தார். இதனால், கோபமடைந்த மொய்த்ரா,
சபாநாயகர் பாரபட்சமாக நடந்து கொள்வதாக கூறினார்.

இதையடுத்து பேசிய சபாநாயகர், “மரியாதைக்குரிய
உறுப்பினரே. இது போன்ற தேவையற்ற வார்த்தைகளை
இனிமேல் உபயோகிக்க வேண்டாம். நான் பாரபட்சம்
காட்டுகிறேனா இல்லையா என்பதை இந்த சபை முடிவு
செய்யும்,” என்றார்.

தினமலர்