மீண்டும் மனைவியாக நடிகை மீனா!

by **ayyasamy ram** Sat 8 Feb 2020 - 0:23

தன்னைப் பற்றியும், தமிழ் சினிமா பற்றியும்,
இயக்குனர், நடிகர் ராஜ் கிரண்:

அந்த காலத்தில், தயாரிப்பாளர்களுக்கு, சினிமா
கதை பற்றிய ஞானம் அதிகம் இருக்கும்; அவரும்,
கையில் ஓரளவுக்கு பணமும் வைத்திருப்பார்.

கதை எழுத என, ஒரு கூட்டம் இருக்கும். அவர்களிடம்
கதை கேட்டு, பிடித்து போனது என்றால், பிடித்த
கதையில் யாரெல்லாம் நடித்தால், நன்றாக இருக்கும்
என, தயாரிப்பாளர் யோசிப்பார்.

அது தொடர்பாக, பிறரிடமும் கலந்தாலோசித்து,
நடிக்க ஒப்பந்தம் செய்பவர்களுக்கு, ஒரு தொகையை,
'அட்வான்ஸ்' ஆக, தயாரிப்பாளர் கொடுத்து வருவார்.

இப்படித் தான், தமிழ் சினிமா உலகம் இருந்தது.
ஆனால், இப்போது ரொம்ப மாறி விட்டது; ரொம்ப
வேகமாக போய் கொண்டு இருக்கிறது.

இப்போதைய தயாரிப்பாளர்கள் யாரும், கதை கேட்பது
இல்லை. அதனால், கதை ஆசிரியர்கள் என்ற இனமே
இப்போது இல்லை. பெரிய ஹீரோக்களை வைத்து படம்
பண்ணினால், பெரிதாக லாபம் பார்க்கலாம் என
நினைத்து, பெரிய ஹீரோக்களின் சம்பளம் எவ்வளவு
எனக் கேட்டு, 'கமிட்' பண்ணி விடுகின்றனர்.

அந்த தயாரிப்பாளரிடம் செல்வாக்கு இருக்குமே
தவிர்த்து, வேறு எதுவும் இருக்காது. பைனான்சியர் தான்,
மொத்த பணமும் கொடுப்பார். தயாரிப்பாளருக்கு,
கடனை திருப்பிக் கொடுக்க வேண்டும் என்ற பொறுப்பை
தாண்டி, வேறு எந்த பொறுப்பும் இல்லை.

இது தான் இன்றைய நிலைமை.இதனால் தான், அந்த
காலத்தில், பெரிய நிறுவனங்களாக இருந்த, ஏ.வி.எம்.,
சூப்பர் குட் பிலிம்ஸ் போன்ற நிறுவனங்கள், படம்
தயாரிக்க, இப்போது முன் வருவதே இல்லை.

தமிழ் சினிமா தவிர்த்து, பிற மொழி படங்களில் நான்
நடித்ததில்லை. நான் நடிக்கும், குபேரன் படம் தான்,
முதல் முதலில், ஷைலாக் என்ற பெயரில், மலையாளத்தில்
வெளியாகிறது.

அதில் நானும், மம்மூட்டியும் நடிக்கிறோம். அய்யனார்
என்ற கதாபாத்திரத்தில் நான் நடிக்கிறேன். காமெடியில்,
மம்மூட்டி, இந்த படத்தில் அசத்தி இருக்கிறார்.

என் ராசாவின் மனசிலே படத்தில், நடிகை மீனாவுடன்
நடித்த பின், 28 ஆண்டுகள் கழித்து, குபேரன் படத்தில்
நடிக்கிறேன். இந்தப் படத்திலும் அவர், என் மனைவியாகத்
தான் நடிக்கிறார்.

என் ராசாவின் மனசிலே படத்தில் நடிக்கும் போது,
என் தோற்றத்தைப் பார்த்து, நடிகை மீனா பயப்படுவார்.
இப்போது, அவருடன் சேர்ந்து நடிக்கிறேன். எனினும்,
பழைய விஷயங்களை பேச முடியாத அளவுக்கு, நேரமே
இல்லாமல், ஷூட்டிங் நடந்து கொண்டிருக்கிறது.

வெளியே இருந்து பார்க்கிறவர்களுக்குத் தான் நான்
முரடனாக தெரிவேன். கோபக்காரர், அப்படி இப்படி என
சொல்லி வைத்துள்ளனர்.

ஆனால், எனக்குள்ளேயும் வடிவேலு, சூரி, சந்தானம்
எல்லாரும் இருக்கின்றனர்!
-
-------------------------------
தினமலர்