ராஜ்யசபா எம்.பி.,பதவி யாருக்கு? அ.தி.மு.க.,-தி.மு.க.,வில் போட்டி

-
தமிழகத்தில் இருந்து, ஆறு ராஜ்யசபா எம்.பி.,க்களை தேர்வு செய்வதற்காக, இம்மாதம்தேர்தல் அறிவிப்பு வெளியாக உள்ளது. இப்பதவிகளை பெற, அ.தி.மு.க., மற்றும் தி.மு.க.,விலும், அவற்றின் கூட்டணி கட்சிகளிலும், கடும் போட்டி ஏற்பட்டுள்ளது. அதனால், யாருக்கு பதவி என்பது, இரு கட்சி வட்டாரத்திலும் கேள்விக்குறியாகி உள்ளது.

தமிழகத்தில், ஊரக உள்ளாட்சி தேர்தல், 27 மாவட்டங்களில் மட்டும் நடந்து முடிந்துள்ளது. மீதமுள்ள மாவட்டங்களில், எப்போது ஊரக உள்ளாட்சி தேர்தல் நடக்கும்; 37 மாவட்டங்களிலும், நகர்ப்புற உள்ளாட்சி தேர்தல் எப்போது நடக்கும் என்ற எதிர்பார்ப்பு, அனைத்து தரப்பினரிடமும் ஏற்பட்டுள்ளது.


ஏப்ரல், 1ல் நிறைவு


அந்த தேர்தல் வருவதற்கு முன், தமிழகத்தில், ராஜ்யசபா எம்.பி., தேர்தல் வர உள்ளது. தமிழகத்தில் இருந்து, 2014 ஜனவரியில், அ.தி.மு.க., சார்பில், சசிகலா புஷ்பா, செல்வராஜ், முத்துகருப்பன், விஜிலா சத்தியானந்த் ஆகியோர், ராஜ்ய சபா எம்.பி.,க்களாக தேர்வு செய்யப்பட்டனர்.

தி.மு.க., சார்பில் சிவா, அதன் கூட்டணி கட்சியான, மார்க்சிஸ்ட் கம்யூனிஸ்ட் கட்சி சார்பில், டி.கே.ரங்கராஜன் ஆகியோர் தேர்வு செய்யப்பட்டனர். இவர்களின் பதவிக்காலம், ஏப்ரல், 1ல் நிறைவடைகிறது.எனவே, அந்த ஆறுஎம்.பி., பதவிகளுக்கு, இம்மாதம் இரண்டாவது வாரத்தில், தேர்தல் அறிவிக்கப்பட உள்ளதாக,தகவல்கள் வெளியாகி உள்ளன.
தேர்தலுக்கான ஆயத்தப் பணிகள் துவக்கப்பட்டுள்ளன. தேர்தல் நடத்தும் அலுவலர் நியமனம் தொடர்பான கடிதப் போக்குவரத்து, சட்டசபை செயலகத்திற்கும், தேர்தல் ஆணையத்துக்கும் இடையே நடந்து வருகிறது.தமிழக சட்டசபையில், தற்போது, அ.தி.மு.க.,விற்கு, சபாநாயகருடன் சேர்த்து, 125எம்.எல்.ஏ.,க்கள் உள்ளனர்.

தி.மு.க.,வுக்கு, 100; அதன் கூட்டணி கட்சிகளான, காங்கிரசுக்கு, ஏழு; முஸ்லிம் லீக்கிற்கு, ஒரு எம்.எல்.ஏ., உள்ளனர். ஒரு சுயேச்சை,எம்.எல்.ஏ., உள்ளார். தற்போது கட்சிகளுக்கு உள்ள, எம்.எல்.ஏ.,க்கள் அடிப்படையில், அ.தி.மு.க., - தி.மு.க., தலா, மூன்று ராஜ்யசபாஎம்.பி.,க்களை பெற வாய்ப்புள்ளது. எனவே, போட்டியின்றி, எம்.பி.,க்கள் தேர்வு செய்யப்படுவர் என்று, எதிர்பார்க்கப்படுகிறது.


விருப்பம்


அ.தி.மு.க.,வில், ராஜ்ய சபா எம்.பி., பதவியை பெற, கடும் போட்டி உள்ளது. தற்போது பதவியில் இருப்போருக்கு, மீண்டும் வாய்ப்பு வழங்கப்படாது என்பதால், முன்னாள் அமைச்சர்கள் உட்பட பலரும், எம்.பி.,யாக விருப்பம் தெரிவித்துஉள்ளனர்.அ.தி.மு.க., கூட்டணி கட்சியான, தே.மு.தி.க., கடந்த முறை, பா.ம.க.,விற்கு, ஒரு ராஜ்யசபா பதவி வழங்கியது போல, தங்களுக்கும் வழங்கும்படி கோரியுள்ளது.

அதேபோல, பா.ஜ.,வும் கேட்பதாக, தகவல் வெளியாகி உள்ளது. ஆனால், மூன்று இடங்கள் மட்டுமே உள்ளதால், தங்கள் கட்சி யினருக்கு மட்டுமே வாய்ப்பு வழங்க, அ.தி.மு.க., தலைமை முடிவு செய்திருப்பதாக கூறப்படுகிறது.

தி.மு.க.,விலும், ராஜ்ய சபா எம்.பி.,யாக, பலரும் முயற்சித்து வருகின்றனர். அதற்கிடையே, மார்க்சிஸ்ட் கம்யூனிஸ்ட் கட்சி, ஒரு இடத்தை, தங்களுக்கு ஒதுக்கும்படி கோரி உள்ளது.அ.தி.மு.க., - தி.மு.க., ஆகிய இரு கட்சிகளிலும், ராஜ்யசபா எம்.பி., பதவிக்கு கடும் போட்டி ஏற்பட்டுள்ளதால், யாருக்கு பதவி என்பதை முடிவு செய்வதில், அக்கட்சிகளில் கடும் குழப்பம்ஏற்படுவது உறுதி.

- நமது நிருபர் -தினமலர்